بۇل مەجەدە دينارا سادۋاقاسوۆا رەسەي بىرىنشىلىگى مەن كوپتەگەن اسا ءىرى حالىقارالىق جارىستاردىڭ بىرنەشە دۇركىن جەڭىمپازى, كوماندالىق ەسەپتەگى دۇنيەجۇزى جانە قۇرلىق چەمپيونى, بىلتىر «ۇمىتكەرلەر تۋرنيرىندە» توپ جارىپ, الەمدىك ءتاج ءۇشىن تالاسقان ايگىلى الەكساندرا گورياچكينامەن شەبەرلىك بايقاسۋدا.
بۇگىنگى تاڭدا فيدە رەيتينگىندە ەكىنشى ورىندى يەلەنىپ وتىرعان 22 جاستاعى ورىس قىزى ءبىرىنشى پارتيانى اق فيگۋرالارمەن وينادى. العاشىندا الەكساندرا قارسىلاسىن ءبىراز قىسپاققا الدى. الايدا سالقىنقاندىلىق تانىتقان سادۋاقاسوۆا قاۋىپتى جاعدايدان وڭاي قۇتىلدى. وسىلايشا, ول وسى جارىستىڭ باستى فاۆوريتتەرىنىڭ بىرىمەن ۇپاي ءبولىستى.
سونداي-اق, نانا دزاگنيدزە (گرۋزيا) مەن اننا مۋزىچۋك (ۋكراينا) جانە تان چجۋني (قىتاي) مەن ەكاتەرينا لاگنو (رەسەي) اراسىنداعى باسەكەلەردە دە تەڭ ەسەپ تىركەلدى. ال رەسەيلىك الەكساندرا كوستەنيۋك ءوزىنىڭ وتانداسى ۆالەنتينا گۋنينادان باسىم ءتۇستى.
سوچيدەگى جارىستا ەرلەر دە ونەر كورسەتۋدە. بۇل كۇندەرى ولار 1/8 فينالدىق مەجەدە كۇش سىناسۋدا. سول ساڭلاقتار اراسىنداعى سايىستاردىڭ قانداي ناتيجەمەن اياقتالعانى جايىندا گازەتىمىزدىڭ كەلەسى ساندارىنىڭ بىرىندە باياندايتىن بولامىز.
