شىعىس قازاقستان وبلىستىق سايلاۋ كوميسسياسىنىڭ توراعاسى ەرسايىن نابيەۆ تاڭعى ساعات 7.00-دە اۋماقتىق سايلاۋ كوميسسيالارىنىڭ دەرەكتەرىنە سايكەس اۋداندىق ماڭىزى بار ءبىر قالادا, التى كەنتتە, 70 اۋىلدىق وكرۋگتە داۋىس بەرۋ باستالعانىن ايتىپ ءوتتى. وڭىردە سايلاۋ كەزىندە 221 سايلاۋ ۋچاسكەسى جۇمىس ىستەدى.
– تاۋەلسىزدىك العالى تۇڭعىش وكرۋگ سايلاۋى بولعاندىقتان, حالىق بەلسەنە قاتىستى. سايلاۋشىلاردىڭ سايلاۋ ۋچاسكەلەرىنە كەلۋى تۋرالى قوسىمشا اقپارات 10.00, 12.00, 14.00, 16.00, 18.00 جانە 20.00-دە وبلىستىڭ اۋماقتىق سايلاۋ كوميسسيالارىنىڭ ينتەرنەتتەگى رەسمي پاراقشالارىندا ۇسىنىلىپ وتىردى, – دەدى وبلىستىق سايلاۋ كوميسسياسىنىڭ توراعاسى ەرسايىن نابيەۆ.
ۇمىتكەرلەردىڭ كوبى ءۇرجار اۋدانىنىڭ ماقانشى اۋىلدىق وكرۋگىندە, كاتونقاراعاي اۋدانىنىڭ بەلقاراعايى, گلۋبوكوە اۋدانىنىڭ ۋشانوۆ اۋىلدىق وكرۋگىندە تىركەلگەن ەكەن. اتالعان وكرۋگتەردە ءتورت ادامنان, ودان وزگە 72 سايلاۋ وكرۋگىندە ءۇش ادامنان, قالعان 2 سايلاۋ وكرۋگىندە 2 كانديداتتان سايلاۋعا ءتۇستى. ۇمىتكەرلەردىڭ ەڭ جاسى – 26-دا, ول التاي اۋدانىنىڭ تۇرعىسىن اۋىلدىق وكرۋگىن باسقارۋعا ءۇمىتتى.
– ءوز اكىمدەرىن جۇرت ءوزى سايلاپ جاتىر. راس, حالىق كىم قالاي جۇمىس ىستەيتىنىن بىلەدى. بىلگەن سوڭ دا دۇرىس تاڭداۋ جاسايدى. ءادىل سايلاۋ ءوتتى دەپ ويلايمىن. ءوزىم ءۇرجار اۋىلىنىڭ بولاشاعى ءۇشىن داۋىس بەردىم, – دەيدى «100 جاڭا ەسىم» جوباسىنىڭ جەڭىمپازى سەرىكجان قاجىتاي.
سايلاۋ ۋچاسكەلەرىندە قوعامدىق ءتارتىپتى قامتاماسىز ەتۋ ءۇشىن وبلىستىق پوليتسيا دەپارتامەنتىنىڭ قىزمەتكەرلەرى كۇشەيتىلگەن رەجىمگە كوشتى. اكىمشىلىك پوليتسيا باسقارماسىنىڭ باستىعى ەرنار بازاروۆتىڭ ايتۋىنشا, ءاربىر سايلاۋ ۋچاسكەسىندە كەزەكشىلىكتى قامتاماسىز ەتۋ ءۇشىن 800-دەن استام پوليتسيا قىزمەتكەرى جۇمىلدىرىلعان. الايدا سايلاۋ ۋچاسكەلەرىندە قوعامدىق ءتارتىپتى بۇزۋ فاكتىلەرى تىركەلگەن جوق. سانيتارلىق تالاپتار دا قاتاڭ ساقتالدى.
شىعىس قازاقستان وبلىسى
