وبلىستىق سايلاۋ كوميسسياسىنىڭ مۇشەسى ءاليا دۋانباەۆانىڭ ايتۋىنشا, سايلاۋعا بارلىعى 147 ۇمىتكەر تۇسكەن. ايماقتاعى بارلىق سايلاۋ ۋچاسكەسىندە ورتالىق سايلاۋ كوميسسياسىنىڭ نۇسقاۋلىعىنا ساي داۋىس بەرۋ كابينەتتەرى جاساقتالىپ, كانديداتتار تۋرالى مالىمەتتەر, كوميسسيا قۇرامى, سوت, پروكۋراتۋرا ورگاندارىنىڭ تەلەفون نومىرلەرى كورسەتىلگەن قاجەتتى اقپاراتتىق ستەندتەر, داۋىس بەرۋ كابينەتىنە ەنگەن سوڭ سايلاۋشىنىڭ ءوزىن-ءوزى قالاي ۇستاۋى كەرەكتىگىنە دەيىن تاپتىشتەپ تۇسىندىرىلگەن ەرەجەلەر ىلىنگەن. سايلاۋ ۋچاسكەلەرىندە كوروناۆيرۋسقا قارسى سانيتارلىق ساقتىق شارالارىنىڭ جان-جاقتى قاراستىرىلعانىن دا ايتا كەتكەن ءجون.
ءبىز تاريحي ماڭىزى ەرەكشە ساياسي ناۋقاننىڭ بارىسىن كوزبەن كورىپ, سايلاۋشىلارمەن تىلدەسىپ كورۋ ماقساتىندا تاڭعى ساعات جەتىدەن كەتە وبلىس ورتالىعىنا جاقىن ورنالاسقان قوستاناي اۋدانىنا قاراستى سادچيكوۆ اۋىلدىق وكرۋگىنە باردىق. مۇندا 1 640 سايلاۋشى تۇرادى. اۋىلدىق وكرۋگ اكىمى سايلاۋىنا ءۇش كانديدات ءتۇسىپ وتىر. ۇمىتكەرلەردىڭ ەكەۋى ءوزىن ءوزى ۇسىنعان. ال بىرەۋى – «اق جول» دەموكراتيالىق پارتياسىنىڭ وكىلى.
سايلاۋ ۋچاسكەسى اۋىلدىق مەكتەپكە ورنالاسقان ەكەن. ەسىك الدىندا قاڭتارىلعان كولىكتەر, كىرەسىلى-شىعاسىلى سايلاۋشىلار كوپ. قۇجاتتارىمىزدى كورسەتىپ, ىشكە ەنىپ, سايلاۋ ۋچاسكەسىنىڭ توراعاسى الەكساندر ريابيچەۆكە جولىقتىق.
– تاڭعى ساعات التىدان باستاپ جۇمىسقا كىرىستىك. سەيفتى اشىپ, كوميسسيا مۇشەلەرىنە سايلاۋ بيۋللەتەندەرىن ۇلەستىرىپ بەردىك. ولار بيۋللەتەندەردى تاعى ءبىر ساناپ الدى. بايقاۋشىلار مەن سەنىمدى تۇلعالار تىركەلىپ بولعان سوڭ, 6:30-دا سايلاۋشى بيۋللەتەن سالاتىن جاشىكتەرگە ءمور باستىق. ساعات تۋرا جەتىنى سوققاندا, ەلىمىزدىڭ گيمنى ورىندالىپ, سايلاۋ ۋچاسكەسىن اشتىق. سانيتارلىق نورماعا سايكەس بۇل سايلاۋعا 4 بايقاۋشى قاتىسىپ وتىر. اۋىل تۇرعىندارى سايلاۋعا بەلسەندى قاتىسىپ جاتىر. قازىر ساعات 7:40-تى كورسەتىپ تۇر, وسى ۋاقىت ارالىعىندا 50-دەن استام سايلاۋشى داۋىس بەرىپ ۇلگەردى, – دەدى الەكساندر ياكوۆلەۆيچ.
سايلاۋ بارىسىندا قانداي دا ءبىر زاڭعا قايشى دۇنيەلەردىڭ, كەمشىلىكتەردىڭ بولماعانىن بايقاۋشىلار دا ايتىپ وتىر.
– سايلاۋ ۋچاسكەسى بەلگىلەنگەن ۋاقىتتا اشىلدى. كىرەبەرىستە دارىگەرلەر كەزەكشىلىك ەتىپ تۇر, ول ءار داۋىس بەرۋشىنىڭ دەنە قىزۋىن ولشەپ, تەكسەرىپ وتكىزەدى. سايلاۋشىلار تاراپىنان دا, سايلاۋدى ۇيىمداستىرۋشىلار تاراپىنان دا ەشبىر زاڭ بۇزۋ ارەكەتى بولعان جوق, – دەدى «پارتيالىق ەمەس باقىلاۋ ورتالىعىنىڭ» وكىلى اڭساعان ءجۇرسىنوۆ.
– سايلاۋ ۋچاسكەسى اشىلعالى وسىندا ءجۇرمىن. وبلىستىڭ باس سانيتارلىق دارىگەرى شىعارعان قاۋلىنىڭ تالاپ-ەرەجەلەرى تولىق ساقتالۋدا. سايلاۋشىلار كىرەبەرىستە قولدارىن انتيسەپتيكپەن تازالاپ كىرۋدە, سونداي-اق بارلىق داۋىس بەرۋشىلەرگە جەكە قورعانىش زاتتارى – بەتپەردە, مەديتسينالىق قولعاپ, ءتىپتى قالامعا دەيىن بەرىلىپ جاتىر. ودان كەيىن جەكە كۋالىگىن كورسەتكەن داۋىس بەرۋشىگە بيۋللەتەن بەرىلىپ, سايلاۋشىلار ءوزى تاڭداعان كانديداتقا داۋىستارىن بەرىپ جاتىر. ەشبىر زاڭ بۇزۋشىلىق ورىن العان جوق, سايلاۋ ەل زاڭناماسىنا سايكەس ءوتىپ جاتىر, – دەدى سايلاۋ بارىسىن باقىلاپ وتىرعان «اق جول» پارتياسىنىڭ وكىلى گالينا دۋدينا.
سادچيكوۆ اۋىلىنىڭ تۇرعىنى التىن ەرجانوۆا سايلاۋ بارىسىن ۇمىتكەرلەردىڭ ءبىرىنىڭ سەنىمدى ادامى رەتىندە باقىلاپ وتىر ەكەن.
– سايلاۋ زاڭ تالاپتارىنا ساي ءوتىپ جاتىر. تۇرعىندار كوپ كەلىپ جاتىر. بۇل ناۋقاننىڭ باستى ماقساتى بارىنە تۇسىنىكتى. بۇگىن اۋىل حالقى ءوزى جاقسى بىلەتىن, ىسكەر, تاجىريبەلى ازاماتتى تاڭداۋعا ءتيىس دەپ ويلايمىن. بولاشاق اكىمىمىز اۋىلىمىزدىڭ بۇگىنى مەن ەرتەڭىن تەڭ ويلاپ, بارلىق كۇش-جىگەرىن سالىپ, وسى ەلدىڭ كوركەيۋىنە, تۇرعىنداردىڭ ءومىر ساپاسىنىڭ جاقسارۋىنا, جۇمىس ورىندارىنىڭ كوپتەپ اشىلۋىنا بار كۇش-جىگەرىن جۇمسايدى دەگەن سەنىمدەمىن, – دەدى بايقاۋشى.
سايلاۋ ۋچاسكەسىنە ەرتە كەلگەندىكتەن, اۋىلدىق وكرۋگ بويىنشا ەڭ ءبىرىنشى داۋىس بەرگەن تۇرعىنمەن تىلدەسۋدىڭ ءساتى ءتۇستى. ءۇش بالانىڭ اناسى سۆەتلانا چەرەپانوۆا ءوزى تاڭداۋ جاساعان ۇمىتكەرگە سەنەتىنىن جەتكىزدى.
– مەن بۇگىن سايلاۋعا ەڭ ءبىرىنشى بولىپ كەلدىم. ءدال 7:00-دە وسى جەردە بولىپ, ءوز تاڭداۋىمدى جاسادىم. توراعانىڭ قولىنان سىيلىق الدىم. جالپى, ءبىزدىڭ اۋىلىمىز ءۇشىن بۇل سايلاۋدىڭ ماڭىزى زور. ويتكەنى بۇعان دەيىن اۋىل اكىمىن اۋداندىق ءماسليحات سايلايتىن. ەندى حالىق ءوزى سايلاعان سوڭ, وسى اۋىلدى جاقسى بىلەتىن, جاناشىر, جەرگىلىكتى ازامات اكىم بولاتىن شىعار دەگەن ۇمىتتەمىز. مىسالى, مەنىڭ ءۇش بالام بار, بىراق اۋىلدا مەكتەپ جانىنداعى بالالار ورتالىعى جۇمىس ىستەپ تۇرعانىمەن, ءالى كۇنگە دەيىن جەكە بالاباقشا جوق. بولاشاق اكىم وسى ماسەلەنى شەشۋگە كۇش سالادى دەگەن ۇمىتتەمىن, – دەدى س.چەرەپانوۆا.
قوستاناي وبلىسى
