«بۇگىن جاپونيا استاناسى توكيو قالاسىندا XXXII جازعى وليمپيادا ويىندارىنىڭ الاۋى تۇتاندى. ءتورت جىلدا ءبىر كەلەتىن ءدۇبىرلى دودا بۇكىل الەمنىڭ نازارىن اۋداراتىن ايتۋلى باسەكە ەكەنى انىق. پاندەميا سالدارىنان بيىلعى الاماننىڭ ءبىر جىلعا كەشىكتىرىلۋى دە ونىڭ ءباسىن ارتتىرا تۇسەتىنى ءسوزسىز.
وليمپيادا ويىندارىنا قازاقستاندىق سپورتشىلار دا اتتاندى. ولار سپورتتىڭ 27 تۇرىنەن باق سىنايدى. توكيوعا اتتانار الدىندا مەملەكەت باسشىسى قازاقستان قۇراماسىن قابىلداپ, اتلەتتەرىمىزگە ساتتىلىك تىلەگەن ەدى. سول جيىندا پرەزيدەنتىمىز جاھاندىق سايىستىڭ قازاقستان تاۋەلسىزدىگىنىڭ 30 جىلدىعىمەن قاتار كەلۋىنە ءمان بەرىپ, وسىنداي مەرەيلى كەزەڭدە وليمپيادا تۇعىرىنا كوتەرىلۋ تۇتاس ۇلتتىڭ ابىرويىن اسقاقتاتار ايرىقشا ءسات ەكەنىن ايتتى.
سوندىقتان جالاۋى جەلبىرەگەن جازعى ويىنداردا سىنعا تۇسەتىن بارلىق سپورتشىلارىمىزعا ساتتىلىك تىلەيمىز! ەلدىڭ نامىسى مەن سەنىمىن ارقالاعان اتلەتتەرىمىزگە كۇش-قۋات بەرسىن! ءبىر-بىرىمىزدەن ءسۇيىنشى سۇرار جەڭىستى كۇندەر كوپ بولسىن!», دەپ جازدى ول.
