الەم سپورتشىلارىنىڭ الەۋمەتتىك جەلىلەردەگى پىكىرلەرىنە اناليز جاساي كەلە, توكيونىڭ وليمپيادالىق قالاشىعىنداعى تاماقتانۋ ورىندارىنا قاتىستى ەشقانداي ءمىن تاعىلماعانىن باعامداۋعا بولادى.
بۇعان دەيىندە بوكستان قازاقستان ەرلەر قۇراماسىنىڭ باس باپكەرى عالىمبەك كەنجەباەۆ شاكىرتتەرىنىڭ توكيو تورىندە قالاي تاماقتانىپ جۇرگەنى تۋرالى ايتىپ بەرگەن بولاتىن.
«تاعامدارى دا الۋان ءتۇرلى. ءتۇرلى اسحانالار بار. ىشىنەن وزىڭە قاجەتتىسىن تاڭداپ الۋعا بولادى. ۇلتتىق وليمپيادا كوميتەتى دە شەت قالىپ جاتقان جوق. ءار كەزدەگىدەي قوسىمشا توڭازىتقىشقا ءبارىن ۇيىمداستىرعانبىز. ءاردايىم وزىمىزبەن بىرگە قوسىمشا تاماق الىپ جۇرەمىز. مەيىز, جاڭعاق, بال, سياقتى اعزاعا قاجەت ونىمدەر بار. ازداپ قازى دا بار. بۇل ءبىرىنشى جارىس ەمەس. سوندىقتان, بىزگە بوي ۇيرەتۋ ۇيرەنشىكتى جايت», دەيدى عالىمبەك كەنجەباەۆ.
ۇيمداستىرۋشىلار تاراپىنان تاڭعى, تۇسكى جانە كەشكى اس بولىكتەرى بەكىتىلمەگەن, سوندىقتان سپورتشىلار قالاعان تاعامدارىن الا الادى.
وندا ءار ءتۇرلى تاعامدار ۇسىنىلعان. جاپون تاعامدارى, ەۋروپالىق تاعامدار جانە حالال بەلگىسى بار اس تا ۇسىنىلعان.
سونداي-اق مازىردە ءار ءتۇرلى كوكونىستەر مەن جەمىستەردەن جاسالعان سالاتتار, تاۋىق ەتى, اسشاياندار, سۋشي, كلاسسيكالىق كۇرىش جانە ماكارون, پيتستسا سەكىلدى تاعى دا باسقا تاعام بار.
فاست-فۋدتى سۇيەتىندەر ءۇشىن گامبۋرگەرلەر دە دايىندالادى.
دەسەرت ءۇشىن ءار ءتۇرلى كونديتەرلىك جانە ۆيتاميندەر جيىنتىعى بار ونىمدەر, جەمىستەر, تسيترۋس ۇسىنىلعان.
سپورتشىلار كوفە مەن شايدان باسقا, ۇلكەن توڭازىتقىشتان گازدالعان سۋسىندار مەن تازا سۋدى دا تاڭداي الادى.
ايتا كەتەيىك, سپورتشىلار ۇزىن ۇستەلدەردە ءبىر-بىرىنە قاراما-قارسى اۋقاتتانادى. ولاردى شىنى تەكتەس قورشاۋ ءبولىپ تۇر. توكيو وليمپياداسىنىڭ ۇيىمداستىرۋشىلارى سپورتشىلاردىڭ قاۋىپسىزدىگى ءبىرىنشى كەزەكتە تۇرعانىن باسا ايتادى. سوندىقتان تاماقتانۋ كەزىندە كوروناۆيرۋستىڭ تارالۋ قاۋپىن بولدىرماۋ نەمەسە ازايتۋ ءۇشىن بارىن سالعان.
