فوتولاردى تۇسىرگەن ەرلان ومار. Egemen Qazaqstan
ساپار بارىسىندا دەلەگاتسيا مەملەكەتتىك ورمان قورىن تولىقتىرۋ ماقساتىندا ىسكە اسىپ جاتقان جۇمىستارمەن تانىستى. ەستەرىڭىزگە سالا كەتەيىك, قر پرەزيدەنتى قاسىم-جومارت توقاەۆتىڭ 2020 جىلى قازاقستان حالقىنا جولداۋىندا بەس جىل ىشىندە ەلىمىزدى اۋقىمدى كوگالداندىرۋ مىندەتىن قويعان بولاتىن. تاپسىرما اياسىندا 2 ملرد اعاش ەگۋ جوسپارلانعان. ول ءۇشىن 5 جىل ىشىندە رەسپۋبليكالىق بيۋدجەتتەن 22 ملرد تەڭگە, جەرگىلىكتى بيۋدجەتتەردەن 60 ملرد تەڭگە ءبولۋ جوسپارلانىپ وتىر.
جوبا اياسىندا شامامەن 610 مىڭ دانا سەكسەۋىل, 555 مىڭنان استام قاراعاي, 193 مىڭنان استام ۇيەڭكى, 132 مىڭنان استام شەگىرشىن, 100 مىڭنان استام قايىڭ جانە باسقا دا اعاش تۇرلەرىن وتىرعىزۋ جوسپاردا بار. ول ءۇشىن قر ەكولوگيا, گەولوگيا جانە تابيعي رەسۋرستار مينيسترلىگى ورمان شارۋاشىلىعى جانە جانۋارلار دۇنيەسى كوميتەتىنىڭ «رەسپۋبليكالىق ورمان سەلەكتسيالىق تۇقىم ءوسىرۋ ورتالىعى» رمقك «سولتۇستىك ايماق» فيليالىندا جۇمىس قارقىندى ءجۇرىپ جاتىر.
اعاش تۇقىمدارى الدىمەن ارنايى تۇتىكتە, كونتەينەردە وسىرىلەدى.
ءار كونتەينەردە 20 دانا وسكىن ساقتالادى.
كەيىن وركەن توپىراق سالىنعان ىدىستارعا اۋىستىرىلىپ, اشىق اسپان استىنا شىعارىلادى. بۇل ونىڭ جەرگىلىكتى اۋا رايىنا بەيىمدەلۋى ءۇشىن قاجەت.
تامىر جايىپ, وسە باستاعان اعاش وركەندەرى كەلىسىمشارت بويىنشا قاجەتتى ايماقتارعا جىبەرىلەدى. ورتالىق ماماندارىنىڭ ايتۋىنشا, جىبەرىلگەن وركەننىڭ 80-85%-ى تامىر الىپ كەتەدى.
لابوراتوريادا تۇقىمدى ءوسىرىپ, ونى وتىرعىزۋعا دايىن شىبىق كۇيىنە دەيىن جەتكىزۋ پروتسەسسى 8-9 ايعا سوزىلادى.
بۇگىندە «بۋراباي ۇلتتىق پاركىندە» 5 گەكتار جەرگە 40 مىڭ قاراعاي وتىرعىزىلعان. كۇتىپ-باپتاۋ ءۇشىن جۇمىس جۇرگىزىلىپ جاتىر.
ەكى جىلدىق قاراعاي اعاشىنىڭ بيىكتىگى نەبارى 5-10 سانتيمەتردى قۇرايدى. ولار ءوسىپ, 2 مەترلىك اعاشقا اينالۋى ءۇشىن 10 جىل ۋاقىت كەرەك. جالپى جوبا باستالعالى بەرى بيىلعى جىلعى كوكتەمدە 81,5 ملن اعاش وتىرعىزىلعان. كۇزدە تاعى 48,2 ملن اعاش وتىرعىزۋ جوسپارلانىپ وتىر. اتالعان جوبا تولىقتاي ورىندالعان كەزدە ەلىمىزدەگى ورمان كورسەتكىشى 4,8%-دان 5%-عا دەيىن ارتادى.
