وسىنداي كورسەتكىشتەرگە بايلانىستى 18 شىلدەدەن باستاپ شىعىس قازاقستان «سارى ايماققا» ءوتتى. ايماقتىڭ مەديتسينالىق مەكەمەلەرى ەپيدەميالىق جاعداي ۋشىعىپ بارا جاتسا دا ساقاداي ساي. ازىرلىكتەرى جوعارى. دەنساۋلىق ساقتاۋ باسقارماسىنىڭ مالىمەتىنشە, وبلىستىڭ ينفەكتسيالىق ستاتسيونارلارىندا 4 مىڭعا جۋىق توسەكتىك ورىن بار. قازىر ينفەكتسيالىق توسەك قورىنىڭ 14 پايىزىندا عانا ناۋقاستار جاتىر. تارقاتىپ ايتار بولساق, وسكەمەندەگى ينفەكتسيالىق ستاتسيونارلاردا 257 ادام, سەمەيدە 226 ادام, وبلىستىڭ باسقا قالالارى مەن اۋداندارىندا 78 ادام ەم الۋدا. ال رەانيماتسيالىق توسەكتىك ورىننىڭ سانى – 345. ازىرگە ونىڭ 15 پايىزى عانا قولدانىستا. وسكەمەندە – 23 ادام, سەمەيدە – 21 ادام, وبلىستىڭ باسقا قالالارى مەن اۋداندارىندا 9 ادام جانساقتاۋ بولىمىندە جاتىر. ورشىگەن ىندەتتىڭ الدىن الۋ ءۇشىن سانيتارلىق تالاپتاردى ورىنداۋ مەن ەكپە الۋ قاجەت دەسەدى دارىگەرلەر. سونىمەن قاتار اق حالاتتىلار يممۋندىق پلازمانىڭ تيىمدىلىگىن دالەلدەپ وتىر. ەستەرىڭىزگە سالا كەتسەك, وبلىستىق قان ورتالىعى ماماندارى كوروناۆيرۋسپەن اۋىراتىن ناۋقاستاردى ەمدەۋ ءۇشىن ەلىمىزدە ءبىرىنشى بولىپ يممۋندىق پلازما دايىنداي باستادى.
– پلازمانى اۋىرعان العاشقى ءۇش كۇندە پايدالانسا, ناتيجە بار. الايدا ناۋقاستانعان ادام بىردەن دارىگەرگە جۇگىنبەيدى. التى اي بۇرىن ناۋقاستارعا يممۋندىق پلازما پايدالانا باستادىق. قازىر سارالاپ وتىرساق, سول ەم-شارالاردىڭ پايداسى بار. قازىرگى ۋاقىتتا 2 مىڭ 373 دوزامىز بار. جىل باسىنان 813 ناۋقاسقا پلازما قۇيىلدى, – دەيدى وبلىستىق قان ورتالىعى ديرەكتورىنىڭ ورىنباسارى سۆەتلانا شمۋرىگينا.
شىعىس قازاقستان وبلىستىق قان ورتالىعى ماماندارىنىڭ حابارلاۋىنشا, پلازما تاپسىرۋعا 6 مىڭ 882 ادام نيەت بىلدىرگەن. دونورلاردى ىرىكتەۋ ءۇشىن قاتاڭ تالاپتاردى ەسكەرە وتىرىپ, ءتۇرلى سەبەپتەر بويىنشا 80%, ياعني 5 533 ادام شەتتەتىلدى. يممۋندىق پلازمانى 1 291 ادام تاپسىردى. ونىڭ ىشىندە 903 ادام وبلىستىق قان ورتالىعىندا, 435 ادام سەمەي قالاسىنىڭ قان ورتالىعىندا تاپسىردى. ناتيجەسىندە, وڭىردە COVID-19 ىندەتىنە قارسى 4 مىڭ دوزانىڭ يممۋندىق پلازماسى دايىندالىپ, جوسپار 100% ورىندالدى.
شىعىس قازاقستان وبلىسى
