ۆولگودونوۆكا اۋىلىندا دا اۋىل تۇرعىندارى الدەنەشە رەت كوتەرگەن, جىلدار بويى شەشىمىن تاپپاي كەلە جاتقان وتكىر ماسەلەلەر از ەمەس. ونىڭ ەڭ باستىسى – مال جايىلىمىنىڭ تارلىعى. ال اۋىل تۇرعىندارى مال سۇمەسىمەن كۇن كورىپ وتىر. مەملەكەت تاراپىنان كورسەتىلىپ وتىرعان قامقورلىقتى ءتيىمدى پايدالانىپ, «سىباعا», «التىن اسىق» ءتارىزدى باعدارلامالار ارقىلى نەسيە الىپ, ءتورت ت ۇلىكتى كوبەيتۋگە تۇساۋ بولىپ وتىرعان دا وسى جايت.
اۋىل اكىمىن سايلاۋعا بايلانىستى وتكىزىلگەن جيىنعا رەسپۋبليكالىق «اۋىل» پارتياسى اتىنان قاتىساتىن ۇمىتكەر بەگىندىك كابەلدينوۆ جەرگىلىكتى جەردىڭ ماسەلەسىن جاقسى بىلەدى. سوندىقتان ءوز باعدارلاماسىن حالىقتىڭ مۇڭ-مۇقتاجىنا وراي جاساعان سىڭايلى.
اۋىل ماسەلەسى ەگجەي-تەگجەيلى قوزعالعان جيىنعا «اۋىل» پارتياسىنىڭ وبلىستىق جانە اۋداندىق ماسليحاتتارداعى دەپۋتاتتارى, قوعام بەلسەندىلەرى, اۋىل تۇرعىندارى قاتىستى. ۇمىتكەر ب.كابەلدينوۆتىڭ ايتۋىنا قاراعاندا, ەل پرەزيدەنتى قاسىم-جومارت توقاەۆتىڭ جايىلىمدىق جەرلەردى ەلدى مەكەن تۇرعىندارىنا قايتارىپ بەرۋ تۋرالى تاپسىرماسى ورىندالماعان. ءتيىمسىز پايدالانىپ جاتقان جەر بولا تۇرا, بۇل باعىتتا ۇمتىلىس جوق.
بيىلعىداي قۋاڭشىلىق جىلى جايىلىمدىق جانە شابىندىق جەر از بولۋى سەبەپتى ەل ءتورت ت ۇلىك مالىن ازايتىپ الۋى ابدەن مۇمكىن. سوندىقتان بۇل ماسەلە تاياۋ ارادا وڭىنان شەشىلۋگە ءتيىستى. جيىنعا قاتىسقان پارتيا توراعاسىنىڭ ورىنباسارى, س.سەيفۋللين اتىنداعى قازاق اگروتەحنيكالىق زەرتتەۋ ۋنيۆەرسيتەتىنىڭ رەكتورى قايرات ايتۋعانوۆ مالساق قاۋىمنىڭ شالعاي جەرلەردى يگەرۋى تۋرالى ۇسىنىسىن ايتتى. ءدال وسىنداي ماسەلە اقكول اۋدانىنا قاراستى ازات اۋىلىندا دا تۋىنداعان ەكەن. ول جەردە حالىقتىڭ مالىن سۋ كوزدەرى بار جايلاۋدا باعۋ ءۇشىن تۇتىنۋشىلار كووپەراتيۆى ۇيىمداستىرىلىپتى. شەشەننىڭ ايتۋىنا قاراعاندا, قيىندىقتان شىعار جولدىڭ ءبىرى وسى. ءبىر ايتا كەتەرلىگى, اتالعان جوباعا بۇگىنگى ۇمىتكەر ب.كابەلدينوۆتىڭ دە تىكەلەي قاتىسى بولعان ەكەن. ول – اقكول اۋدانىنداعى 13 اۋىلدىڭ تۇرعىندارىن كووپەراتيۆكە بىرىكتىرىپ, مال باعۋ تۋرالى ناسيحات جۇرگىزگەندەردىڭ ءبىرى.
جيىن بارىسىندا اۋىل تۇرعىندارىن جۇمىسپەن قامتۋ ماسەلەلەرى دە ءسوز بولدى. بۇل دا وزەكتى تاقىرىپتىڭ ءبىرى. اۋىل تۇرعىندارى بال اراسىن باعۋ, تاۋىق ءوسىرۋ ءتارىزدى جۇمىستاردى اتقارا الار ەدى. زەرتتەۋ ۋنيۆەرسيتەتىنىڭ بىلىكتى ماماندارى بۇل باعىتتا ءتيىمدى كەڭەس بەرۋگە دايىن.
اۋىلداعى وتكىر ماسەلەنىڭ ءبىرى – جول جايى. بىرنەشە جىلدان بەرى بيىك مىنبەلەردەن ايتىلىپ كەلە جاتقانىمەن, شەشىمىن تاپپاعان. جولدىڭ ناشارلىعى اۋىل تۇرعىندارىنىڭ جانىنا باتىپ وتىر. كەيبىرەۋلەردىڭ باسقا جاققا كوشىپ كەتۋ سەبەبى دە وسى.
جيىن بارىسىندا كوپشىلىككە ورتاق تاقىرىپ قامتىلدى. ول – قايتسەك اۋىلدىڭ اجارىن كوركەيتىپ, الەۋمەتتىك-تۇرمىستىق جاعدايىن جاقسارتامىز دەگەن كوكەيكەستى ساۋال. ايتىلعان پىكىرلەردەن تۇيىلگەن وي – اۋىلعا جاناشىر باسشىنى جۇرت ءوزى تاڭداۋعا ءتيىستى.
اقمولا وبلىسى,
ارشالى اۋدانى
