1992 جىلدان بەرى ۆيتەبسكىدە ءداستۇرلى تۇردە وتەتىن ونەر دوداسى قانشاما ونەرپازدىڭ جۇلدىزىن جاقتى. اسىرەسە ەلىمىز ءۇشىن ايتۋلى مەرەكەگە اينالعانى جاسىرىن ەمەس. ءتىپتى شەتەلدىكتەر بۇگىندە «سلاۆيان بازارى» بايقاۋىن «قازاق بازارى» دەپ وزگەرتۋ كەرەك دەپ ازىلدەيدى ەكەن. تەرەڭنەن ويلاعان جانعا مۇنىڭ ءوزى ەل ءۇشىن ۇلكەن مارتەبە.
العاشقى بولىپ ءسوز تىزگىنىن العان مادەنيەت جانە سپورت ۆيتسە-ءمينيسترى نۇرعيسا داۋەشوۆ رۋحيانىڭ جەڭىسى – تاۋەلسىزدىگىمىزدىڭ 30 جىلدىعىنا ارنالاتىنىن تىلگە تيەك ەتتى.
«وسى جەردە مادەنيەت جانە سپورت ءمينيسترى اقتوتى رايىمقۇلوۆانىڭ اتىنان ارنايى العىسىمىزدى بىلدىرگىمىز كەلەدى. جەڭىستىڭ جولى قاشاندا اۋىر. ءسىزدىڭ شىعارماشىلىق ىزدەنىسىڭىز, ەرەكشە تالانتىڭىز الەمدى تاڭعالدىردى. بۇل – مەملەكەتىمىزدىڭ ابىرويى. ونەر سالاسىندا قانداي دا ءبىر بايگە بولسىن, قانجىعامىز بوس قايتقان ەمەس. اسىرەسە, «سلاۆيان بازارىندا». كەشە مەملەكەت باسشىسى قاسىم-جومارت توقاەۆ تا الەۋمەتتىك جەلى ارقىلى جەكە قۇتتىقتاۋىن جولدادى. قازاق قىزىنىڭ توپ جارۋى تاۋەلسىز ەلىمىزدىڭ جاستارىن جىگەرلەندىرەتىنىنە سەنىم مول. وعان قوسا جەڭىستى جالعاپ, بالالار اراسىنداعى بايقاۋدا دا ءبىزدىڭ امينا اسحاتقىزى دا ديپلومات اتاندى. بۇل دا ۇلكەن دارەجە», دەدى ن.داۋەشوۆ.
ۆيتسە-ءمينيستردىڭ ايتۋىنشا, الداعى ۋاقىتتا ونەر يەسىنىڭ بۇدان دا ۇلكەن ساحنالاردى باعىندىرۋىنا جاعداي جاسالادى. بۇل ءسوزدى «قازاق ۇلتتىق مۋزىكا اكادەمياسىنىڭ» رەكتورى ايمان مۇساقوجاەۆا دا قولدادى.
ء«بىزدىڭ شاكىرتىمىز 7 جىل بويى ۇزبەي ىزدەنۋدىڭ ناتيجەسىندە ەلدىڭ مارتەبەسىن اسقاقتاتتى. ۇستازداردىڭ ەڭبەگى كول-كوسىر. ونى ايتپاي كەتكەنىمىز بولماس. رۋحيا – جاڭا جۇلدىز. قازاق ەستراداسىن جاڭا بەلەسكە كوتەرەتىنىنە سەنىمدىمىز. الداعى ۋاقىتتا نورۆەگيادا قازاقستاننىڭ مادەنيەت كۇندەرى وتەدى. بۇيىرسا, سول شارادا رۋحيا دا ونەر كورسەتەدى. ودان دا باسقا جاس انشىلەر بۇگىندە الەم ساحناسىن باعىندىرىپ ءجۇر. بۇگىندە ەلىمىزدىڭ مادەني جەتىستىكتەرى كوڭىلگە قۋانىش ۇيالاتادى», دەدى ا.مۇساقوجاەۆا.
ءباسپاسوز ءماسليحاتى بارىسىندا «حابار» تەلەارناسىنىڭ ديرەكتورى دينارا بيسەمبينا بايقاۋدىڭ تىكەلەي ەفيردەن كورسەتىلۋى ۇلت ءۇشىن ۇلكەن ماقتانىش ەكەنىن جەتكىزدى. الداعى ۋاقىتتا دا حالىقارالىق ونەر فەستيۆالىن كورەرمەنگە دەر كەزىندە ۇسىنىپ, حالىقتىڭ جەڭىستى ءساتتىڭ كۋاگەرى بولۋىنا جول اشاتىنىنا ۋادە ەتتى.
ودان كەيىن رۋحيا بايدۇكەنوۆانىڭ ءوزى ءسوز الىپ, ەل-جۇرتىنا ىزگى ءىلتيپاتىن ءبىلدىردى.
«مەن ءانشى بولۋدى بالا كۇنىمنەن ارماندايتىنمىن. ءتىپتى تۇعىرعا قونعان ءساتتى حالىقپەن بىرگە تويلاسام دەپ تە قيالعا شومعان كەزدەرىم بولعان. ارمانىم الداماپتى. بۇل – مەنىڭ عانا ەمەس, سىزدەردىڭ دە جەڭىستەرىڭىز. شىنى كەرەك, 3 جىل قاتارىنان ىرىكتەۋگە قاتىستىم. العاشىندا قازىلار القاسى ارىقتاۋىمدى تالاپ ەتتى. ول كەزدە 95 كيلوگرامم بولاتىنمىن. سولاي ءسۇرىندىم. ەكىنشى جولى جۇلدىزىم جانبادى. قانشا تىرىسقانىممەن بايقاۋعا جولداما الا المادىم. سودان ءۇمىتىم ءۇزىلىپ, بيىل بارماي-اق قويسام با دەپ ويلاعانمىن. بىراق ديماش قۇدايبەرگەننىڭ ءوزى قولقالادى. مەنى ىرىكتەۋگە جەتەكتەپ اپارعانداي بولدى. بۇل ماعان ۇلكەن سەنىم بەردى. قازىلار القاسىنىڭ مۇشەسى, حالىق ءارتىسى روزا رىمباەۆانىڭ كوزى ماعان ءتۇستى. بىردەن مەنىڭ لايىق ەكەنىمدى ايتىپ, ارقاما قانات بىتىرگەندەي كۇيگە بولەدى», دەيدى ر.بايدۇكەنوۆا.
ونەرپاز مەكتەپ تابىلدىرىعىن اتتاعان ساتتەن باستاپ ۆوكالمەن اينالىسىپ كەلەدى ەكەن. ءوزىنىڭ تۋىپ-وسكەن جەرى تالدىقورعان قالاسىنداعى ونەر مەكتەبىندە سەرىكجامال نۇسىپقىزىنان 7 جىل ساباق العان. ۇستازىنىڭ ۇنەمى قاسىنان قالماي, بار بىلگەنىن بويىنا سىڭىرگەن. ءسويتىپ 15 جاسىندا قازاق ۇلتتىق ونەر ۋنيۆەرسيتەتىنىڭ كوللەدجىنە تۇسەدى. بۇگىندە سول ءبىلىم ورداسىنىڭ 3-كۋرس ستۋدەنتى.
بريفينگتە «سلاۆيان بازارى» حالىقارالىق ونەر فەستيۆالىنىڭ ەلدەگى رەسمي وكىلى قارلىعاش ابدىكارىموۆا جەرلەسىنىڭ جەڭىسىنە ءشۇبا كەلتىرمەگەنىن ايتادى. ول 20 جىلدان بەرى بايقاۋدىڭ ىشىندە جۇرگەننەن كەيىن, ءوزى توپقا قوسار تۇلەكتىڭ قارىم-قابىلەتىن, شىعار بيىگىن الىستان اڭدايتىن بولعان.
ء«بىزدىڭ ءاربىر قاتىسۋشىمىز ساحنادان تۇسكەنگە دەيىن ۋايىمداپ جۇرەمىن. ارينە, ءوزىڭنىڭ بالالارىڭنىڭ جاقسى ونەر كورسەتكەنىن قالايسىڭ. ءبىزدىڭ ۇتقان جەرىمىز, ىرىكتەۋدى ءادىل وتكىزىپ, ەڭ مىقتى جۇيرىكتى تاڭداعانىمىز. رۋحيا نەگىزگى قارسىلاسىنان جالپى ەسەپتە 4 ۇپاي جوعارى بولدى. بۇل – وڭاي شارۋا ەمەس. ونداعى كورەرمەندەر تالعامپاز, كىمنىڭ كىم ەكەنىن, ونىڭ تالابىن بىردەن اڭعارىپ قويادى. مەنىڭشە, رۋحيا جەرگىلىكتى كورەرمەننىڭ ەسىندە قالارى انىق», دەدى ق.ابدىكارىموۆا.
ەڭ عاجابى, بايقاۋ بارىسىندا ديماشتىڭ جانكۇيەرلەرى رۋحياعا جاقتاسقان ەكەن. دودا باستالماس بۇرىن, تۇسكى تاماققا ءانشى قىز كوجە ىشكىسى كەلەدى. سەبەبى ۇيىمداستىرۋشىلار ۇسىنعان ءمازىر ونىڭ كوڭىلىنەن شىقپاسا كەرەك. مۇنى ەستىگەن ديماشتىڭ جانكۇيەرلەرى جينالىپ, قازاقتىڭ قىزىنا ارنايى كوجە ازىرلەيدى. مۇندايدى كۇتپەگەن ونەر يەسى توسىلىپ قالادى. قازاقتىڭ اتىن الەمگە شىعارعان ديماشتى قاي جەردە دە قولدايتىن وسىنداي شىنايى جانكۇيەرلەرى بارىنا ريزاشىلىعىن بىلدىرەدى. ولاردىڭ بارلىعى قازاقتىڭ كوك تۋىن ۇستاپ, بايقاۋ بويى رۋحيانى قولداعان كورىنەدى.
ءباسپاسوز سوڭىندا «سلاۆيان بازارى-2021» بايقاۋىنىڭ جەڭىمپازى رۋحيا بايدۇكەنوۆا اتا-اناسىنا, مادەنيەت جانە سپورت ءمينيسترى اقتوتى رايىمقۇلوۆا, الماتى وبلىسىنىڭ اكىمى اماندىق باتالوۆقا جانە قولداۋ بىلدىرگەن بارشا حالىققا ءىلتيپاتىن ءبىلدىردى.
