كوروناۆيرۋس • 21 شىلدە، 2021

«جەڭە المايمىز»: كولگىنوۆ كوروناۆيرۋسقا قاتىستى ۇندەۋ جاسادى

434 رەت كورسەتىلدى

نۇر-سۇلتان قالاسىنىڭ اكىمى التاي كولگىنوۆ قالا تۇرعىندارىنا ءوزىن، جاقىندارىن جانە اينالاسىنداعى جانداردى قورعاۋ ءۇشىن ۆاكتسينا الۋعا شاقىردى، دەپ جازادى Egemen.kz

«كوروناۆيرۋس ىندەتىن لوكداۋن، شەكتەۋ شارالارىن ەنگىزۋ ارقىلى جەڭە المايمىز. بۇل شارالار COVID-19 ينفەكتسياسىنىڭ تارالۋ كورسەتكىشىن ۋاقىتشا تومەندەتۋگە عانا مۇمكىندىك بەرەدى، ال بۇل ءوز كەزەگىندە ناۋقاستاردى امان الىپ قالۋعا سەپتىگىن تيگىزەدى.

پاندەميانى ۆاكتسيناتسيا ارقىلى عانا جەڭۋگە بولادى. ۇجىمدىق يممۋنيتەتتى قالىپتاستىرۋ ارقايسىمىزعا تىكەلەي بايلانىستى. سەبەبى ۇجىمدىق يممۋنيتەت قالىپتاسقاندا عانا وقۋشىلار مەن ستۋدەنتتەر ساباعىن وففلاين رەجيمدە وقي الادى، سول سياقتى كاسىپورىنداردىڭ ءبارى كارانتيندىك شەكتەۋسىز جۇمىس ىستەيتىن بولادى. ەڭ باستىسى – ادام ءولىمىنىڭ سانى ازايادى. بۇل جاي ساندار ەمەس، ارقايسىسىندا ءبىر ادامنىڭ ءومىرى مەن ولاردىڭ وتباسىلارىنىڭ تاعدىرى تۇر!

مەملەكەت باسشىسىنىڭ تاپسىرماسى اياسىندا مەديتسينا مەكەمەلەرىنىڭ دارىگەرلەرىمەن ەپيدەميولوگيالىق احۋالدى تالقىلادىق.

ءبىرىنشى. ءموبيلدى بريگادالار سانىن ارتتىرۋ.

قالادا كوروناۆيرۋس ينفەكتسياسىن جۇقتىرعان ناۋقاستاردىڭ ۇيىنە باراتىن 186 بريگادا بار. ولار ناۋقاستاردىڭ دەنساۋلىعىن تەكسەرىپ، پتر الادى، سونداي-اق قارىم-قاتىناستا بولعان ازاماتتاردى تەكسەرەدى. بريگادالار سانىن تاعى 100 بىرلىككە كوبەيتۋدى تاپسىردىم. ەندى 300-گە جۋىق ءموبيلدى بريگادا قىزمەت ەتەتىن بولادى.

ەكىنشى. مەديتسينا مەكەمەلەرىن بارىنشا جابدىقتاۋ.

مەديتسينا مەكەمەلەرىن قاجەتتى اپپاراتتارمەن جابدىقتاۋدى بيىل دا جالعاستىرامىز. ماسەلەن، قوسىمشا جىلجىمالى رەنتگەن اپپاراتتارى، پاتسيەنت مونيتورلارى، پەرفۋزورلار جانە ت.ب. جەتكىزىلدى.

مىسالعا وتكەن جىلدىڭ وزىندە مەديتسينا مەكەمەلەرى 1 مىڭنان استام فلۋومەترمەن، 330-دان استام وتتەگى كونتسەنتراتىمەن، 50-دەن استام وكپەنى جاساندى جەلدەتۋ اپپاراتىمەن تولىقتاي جابدىقتالدى. سونداي-اق، كت اپپاراتتارى، تسيفرلى رەنتگەنوگرافيالىق جۇيەلەر، وتتەگى رەزەرۆۋارلارى جانە ت.ب. ورناتىلدى.
بۇل باعىتتاعى جۇمىستار ارى قاراي دا جالعاسۋدا.

ءۇشىنشى. ءدارى-دارمەكپەن قامتاماسىز ەتۋ.

ءدارى-دارمەكتەر مەن جەكە قورعانىس قۇرالدارىنىڭ ەكى ايلىق قورى بولۋى ءتيىس.

ءتورتىنشى. ۆاكتسيناتسيا قارقىنىن ارتتىرۋ.

مەديتسينا مەكەمەلەرىنىڭ بارىندە، سول سياقتى ءىرى ساۋدا ويىن-ساۋىق ورتالىقتارى مەن ساۋدا ۇيلەرىندە ۆاكتسيناتسيالاۋ پۋنكتى اشىلدى. سونىمەن قاتار، ەڭبەك ۇجىمدارىن ۆاكتسيناتسيالاۋ ءۇشىن كوشپەلى بريگادالار ۇيىمداستىرىلدى. قازىر 318 مىڭنان استام ادام ۆاكتسينا الدى.

سونداي-اق، سانيتارلىق نورمالاردى ساقتاۋ بويىنشا مونيتورينگتىك توپتاردىڭ جۇمىسى كۇشەيتىلدى.

ۆاكتسيناتسيا – جاي عانا تاڭداۋ ەمەس. الدىڭىزدا ەكى تاڭداۋ تۇر: ۆاكتسيناتسيا ارقىلى تولىققاندى سالاۋاتتى ءومىردى تاڭدايسىز نەمەسە اۋرۋحانا توسەگىنە تاڭىلىپ، ىندەتپەن كۇرەسۋىڭىزگە تۋرا كەلەدى. سەبەبى كوروناۆيرۋس ادام اعزاسىن السىرەتىپ، دەنساۋلىققا قاتتى سوققى بەرەدى. مۇنداي قاۋىپتى شاقتا دەنساۋلىعىڭىزدى قاتەرگە تىكپەڭىز. ۆاكتسيناتسيا عانا ءوزىڭىزدى، جاقىندارىڭىزدى جانە اينالاڭىزداعى ادامداردى قورعاۋعا مۇمكىندىك بەرەدى!»، دەپ جازدى ەلوردا اكىمى.

سوڭعى جاڭالىقتار

الماتىدا تروللەيبۋس ورتەندى

وقيعا • 24 ماۋسىم، 2022

تۇركپا-نىڭ اتاۋى وزگەرەدى

پارلامەنت • 24 ماۋسىم، 2022

ۇقساس جاڭالىقتار