ال وسى قوعامدى ەلەڭ ەتكىزگەن ەلەۋلى وقيعاعا الەۋمەتتىك جەلىدە ءۇن قوسقانداردىڭ كوپشىلىگى ەلدىڭ جوعارعى بيلىگىنىڭ گازەت سىنىنا دەر كەزىندە دەن قويىپ, جۇرت كۇتكەندەي, قاتاڭ شارا قولدانعانىنا قۇپتاۋ ءبىلدىرىپ جاتقاندا ايىرتاۋ اۋداندىق گازەتىنىڭ باس رەداكتورى ورنىنان الىنعان اكىمدى قيماعان كوڭىل-كۇيىمەن قونىس اۋدارۋشى اعايىنداردىڭ ار-نامىسىنا تيەتىن اۋىر ءسوز ايتىپ, ءوزىنىڭ ۇلتتىق سانا-سەزىمىنىڭ, ازاماتتىق پاراساتىنىڭ تومەندىگىن اڭعارتتى. تەك الەۋمەتتىك جەلى وقىرماندارى «يت تەرىسىن باسىنا قاپتاعانداي» قىلىپ, ولتىرە سىناعان سوڭ ءوز جازباسىن ءوشىرىپ, جۇرتتان كەشىرىم سۇرادى.
تەرىسكەيدەگى قىزىلجار وڭىرىنە قونىس اۋدارۋ تاقىرىبى كەشەلەرى الەۋمەتتىك جەلىدە تاعى دا كوتەرىلدى. بۇل جولى سولتۇستىك قازاقستان وبلىسىنىڭ مامليۋت اۋدانىنداعى بوستاندىق اۋىلىندا جاڭادان بوي كوتەرگەن كوز قىزىعارلىقتاي ادەمى تۇرعىن ۇيلەر كوپشىلىك نازارىنا ۇسىنىلعان ەكەن. وعان ءوز پىكىرىن بىلدىرگەن ءبىر سولتۇستىكقازاقستاندىق سول ۇيلەردى جانە توپىراعى قۇنارلى جەردى وڭىرگە قونىس اۋدارىپ كەلىپ جاتقان وزگە ەتنوس وكىلدەرىنەن قىزعاناتىندىعىن اشىق ايتىپ, تاعى دا ولاردىڭ ار-نامىسىنا تيەتىن سوزگە بارىپتى. قازىرگى تاڭدا ەلىمىزدە قالىپتاسقان دەموگرافيالىق احۋالدان حابارى شامالى, مەملەكەتتىڭ ىشكى ساياساتىنىڭ ءيىسى مۇرنىنا بارمايتىن, كوز الدىنداعىدان باسقانى كورمەيتىن, وي-تۇسىنىگى تايىز, اسىرە ۇلتشىلدىق دەرتىنە ۇشىراعان پەندەنىڭ ءسوزى. «ادامزاتتىڭ ءبارىن ءسۇي, باۋىرىم دەپ!», دەگەن ۇلى اباي ۇلاعاتىن دا ۇقپاعان ءبىر بايعۇس-اۋ ول...
ال الەۋمەتتىك جەلىدەگى اڭگىمەگە ارقاۋ بولعان بوستاندىق اۋىلىنا «ەڭبەك» باعدارلاماسى بەرىپ وتىرعان مۇمكىندىكتى ءمۇلت جىبەرمەي پايدالانىپ, تۇرعىن ۇيلەر سالىپ, 3 دۇنگەن وتباسىسىن شاقىرىپ اكەلىپ قونىستاندىرعان وسى ەلدى مەكەننىڭ تۋماسى, كاسىپكەر ەرلىك مۇحامەدجانوۆ – وي-ءورىسى كەڭ, تۋعان اۋىلىنىڭ دا, تۇتاس ەلىنىڭ دە تاعدىرىن تەرەڭ پايىمداپ, ءباز بىرەۋلەرشە قۇر اۋىزبەن وراق ورماي, قولىنان كەلەتىن ناقتى ءىستى تىندىرىمدى اتقارىپ, جاقسى اتى شىعىپ جۇرگەن ۇلتجاندى ازامات. ول وسىلايشا جابىلۋعا جاقىن تۇرعان جەرگىلىكتى قازاق ورتا مەكتەبى وقۋشىلارىنىڭ قاتارىن تولىقتىردى. سەبەبى ءاربىر دۇنگەن وتباسىسىندا 5-6 بالادان بار. جامبىل وبلىسىنىڭ قورداي اۋدانىندا قازاقشا بىلمەي وسكەن دۇنگەندەر ەندى وزدەرىن قۇشاق جايا قارسى العان قازاق اۋىلىندا بالالارىن قازاق تىلىندە وقىتىپ, وزدەرى دە مەملەكەتتىك ءتىلدى ۇيرەنۋگە تىرىسىپ جاتىر. وڭىردەگى ۇزدىك ءبىلىم ۇيالارىنىڭ ءبىرى سانالاتىن بوستاندىق ورتا مەكتەبىنىڭ مۇعالىمدەرى ەندى ەرتەڭىنە الاڭدامايدى.
ءومىر بويى جەر تىرمالاپ, باۋ-باقشا وسىرۋمەن شۇعىلدانىپ وسكەن دۇنگەندەر جەرگىلىكتى تۇرعىندارعا ەڭبەكسۇيگىشتىكتىڭ ۇلگىسىن كورسەتىپ ءجۇر. «تاياق شانشىساڭ, جەتەك ءوسىپ شىعادى» دەيتىندەي, اسا قۇنارلى قارا توپىراقتى ەرىنبەي كۇتىپ-باپتاپ, باعبانشىلىقپەن اينالىسىپ, تابىس تاۋىپ ءجۇر. ولارعا جەر بولسا, جەتەدى ەكەن, «اۋىلدا جۇمىس جوق», دەپ ەشكىمگە مۇڭ شاقپاپتى.
قازىرگى الماعايىپ زاماندا ەلىمىزدىڭ سولتۇستىك ايماعىنداعى ءارتۇرلى سەبەپپەن بولاشاعى ب ۇلىڭعىرلانعان بوستاندىق سياقتى قازاق اۋىلدارىنان ەرلىك مۇحامەدجانوۆ سىندى «ەلىم!» دەگەن ەرلەر شىعىپ, وڭتۇستىك وڭىرلەردەگى قازاقتارعا قوسا, جەرمەن جۇمىس ىستەۋگە شەبەر دۇنگەن, وزبەك, ۇيعىر اعايىنداردىڭ وتباسىلارىن كوشىرىپ اكەلىپ جاتسا, تالاي «التىن بەسىگىمىزدىڭ» اجارى كىرىپ, ءتۇتىنى ءتۇزۋ ۇشىپ سالا بەرەرى انىق.
ۇلى دالا توسىندە تاعدىر تابىستىرعان سان ۇلت پەن ۇلىستىڭ ءبىر-اق تۋعان جەرى, ءبىر-اق وتانى بار, ول – قازاقستان. ەندەشە ەل ازاماتتارىن تۋىپ-وسكەن ءوڭىرى مەن ەتنوسىنا قاراپ ءبولىپ-جارىپ, الالاۋدان اۋلاق بولايىق, اعايىن. قاسيەتتى تاۋەلسىزدىگىمىزدىڭ تۇعىرى – حالقىمىزدىڭ بىرلىگى ەكەنىن ەستەن شىعارمايىق.
