مەديتسينا • 14 شىلدە، 2021

جۇكتى ايەلدەر مەن بالالاردى قالاي قورعايمىز؟

350 رەت كورسەتىلدى

الماتىدا ىندەت قايتا بەلەڭ الىپ تۇرعانىن ساندار دايەكتەيدى. ەگەر ستاتيستيكا سەنىمسىزدىك تۋدىرسا، قورقىنىشتى بولسا دا ايتايىق، ريتۋالدىق، ياعني جەرلەۋ بيۋرولارىنا تۇسەتىن تاپسىرىستار قايتا كوبەيگەن.

سونىمەن، سوڭعى تاۋلىكتەگى مالىمەت­تەرگە سايكەس تەك 14 شىل­دەدە 640 الماتىلىق جاڭادان ىن­دەت جۇقتىرعانى بەلگىلى بولدى. بۇل كۇندەرى ينفەكتسيالىق ستاتسيو­نارلاردا 1 947 ادام ەمدەلىپ جات­سا، ونىڭ ىشىندە 168 بالا بار. جالپى رەانيماتسيا جانە قارقىن­دى تەراپيا بولىمشەسىندە 133 ناۋ­قاس جاتىر.

قىسقاسى، الماتى «قىزىل اي­ماقتان» شىعا الماي تۇر. س.اسفەن­دياروۆ اتىنداعى قازاق ۇلت­تىق مەديتسينالىق ۋنيۆەرسي­تەتىنىڭ جۇقپالى جانە تروپيكالىق اۋرۋلار كافەدراسىنىڭ پروفەسسورى كۇلاش قۇرمانوۆا: «سوڭعى زەرتتەۋلەر كورسەتكەندەي، ء«ۇندى» شتامىنىڭ قاۋىپتىلىگى سول، اۋرۋ­حا­ناعا جاتۋ مەن ءولىم قاۋپى جو­عارى. كوروناۆيرۋس ينفەكتسياسىنان كەيىن دەرتتىڭ اۋىرلىعىنا قا­را­ماستان ەندوتەليت، تامىرلى ميكرو جانە ماكروترومبوز تۇرىندە اسقىنۋلار بايقالادى، ياعني ءار­تۇرلى اعزالار مەن جۇيەلەرگە اسەر ەتۋى مۇمكىن»، دەيدى.

ۆيرۋستىڭ مۋتاتسياسى تۋرالى سۇ­راققا پروفەسسور «قۇرامىندا رنق بار كوروناۆيرۋس تابيعاتتا جوعارى قۇبىلمالى يە»، دەپ جا­ۋاپ بەردى. ەگەر پوپۋلياتسيادا ۇجىم­دىق يممۋنيتەت قالىپتاسسا، ۆيرۋس مۋ­تا­تسياعا ۇشىرامايدى، ويتكەنى ول تەك ءتىرى جاسۋشالاردا كوبەيە الا­دى.

پروفەسسور سونىمەن قاتار بالالار مەن جاستاردىڭ اعزاسىندا COVID-19-عا قارسى انتيدەنەلەر جوق ەكەنىن اتادى. بالالار جاڭا «دەلتا» شتامىمەن 5 ەسە ءجيى اۋى­را باستادى. سوندىقتان ك.قۇر­مانوۆانىڭ ايتۋىنشا، قازاق­ستان بالالاردى ۆاكتسينالاۋ قا­جەتتىلىگى تۋرالى ويلانۋى كەرەك. بۇل ماسەلەنى عالىمدار، ەپيدە­ميولوگتەر جانە كلينيكتەر تال­قىلاۋى ءتيىس.

ورايى كەلىپ تۇرعاندا توقتالا كە­تۋ كەرەك، تاياۋ كۇندەرى الماتى اكىم­دىگى فرانتسيانىڭ جەتەكشى دارىگەرلەرىنىڭ قاتىسۋىمەن جۇك­تى ايەلدەر مەن بوساناتىن ايەل­دەردىڭ دەنساۋلىعىن قورعاۋ بو­يىنشا ۆەبينار وتكىزىپ، پاندەميا جاع­دايىندا انا مەن بالانىڭ دەنساۋلىعىن قورعاۋ شارالارىن تالقىلاعان بولاتىن.

ۆەبينارعا الماتى مەن پاريج­دەگى جەتەكشى اۋرۋحانالار­­­دىڭ اكۋ­شەر-گينەكولوگتەرى، نەونا­تولوگتارى، انەستەزيولوگ-رەانيماتولوگتەرى قاتىسىپ، پاندەميا كەزىندە جۇكتى ايەلدەر مەن جاڭا تۋىلعان نارەستەلەردى پەريناتالدى كۇتۋ تاجىريبەلەرىمەن ءبولىستى. تاجىريبە الماسۋ بو­سان­دىراتىن مەديتسينالىق ۇيىم­داردىڭ پراكتيكالىق دارىگەر­لەرىنە، مەديتسينالىق ۇيىم­دار­دىڭ باسشىلارىنىڭ جۇمىسىن جاق­سارتۋعا سەپتەسەدى دەگەن سەنىم بار.

وسى باعىتتا الماتىدا انا مەن ءسابي ءولىمىنىڭ الدىن الۋ بو­يىنشا كەشەندى جوسپار جۇزەگە اسىرىلىپ جاتىر. جۇكتى، بوسانعان ايەلدەرگە ۋاقتىلى بىلىكتى كومەك كورسەتۋ ءۇشىن ءموبيلدى توپتار قۇرىلدى، العاشقى مەديتسينالىق-سانيتارلىق كومەك دەڭگەيىندە قالانىڭ كوپسالالى توبى دەڭ­گەيىندە قاۋىپ توبىنداعى جۇكتى ايەل­دەر بويىنشا كونسيليۋمدار وتكىزىلەدى.

فرانتسياداعى Port Royal – AP-HP پەريناتالدىق ورتالىعىنىڭ اكۋشەر-گينەكولوگى وليۆيا ان­سەلەم كوروناۆيرۋس ينفەكتسياسىن جۇقتىرعاننان كەيىن ءارتۇرلى جاستاعى جۇكتى ايەلدەر اراسىندا جۇرگىزىلگەن زەرتتەۋدىڭ الدىن الا ناتيجەلەرىمەن تانىستىردى. كۆي جۇقتىرعان جۇكتى ايەلدەر ءۇشىن اسقىنۋلاردىڭ اراسىندا پرەەكلامپسيا بولۋى مۇمكىن. بۇل – جۇكتىلىكتىڭ 20-اپتاسىنان كەيىن داميتىن جانە جوعارى قان قىسىمىمەن، پروتەينۋريامەن، ءجيى ىسىنۋمەن سيپاتتالاتىن جۇك­تىلىكتىڭ اسقىنۋى. سونىمەن بىرگە ينفەكتسيانىڭ انادان بالاعا جۇعۋ جاعدايلارى تۋىلعانعا دەيىن دە، بوسانعاننان كەيىن دە تىركەلگەن.

سونداي-اق رەانيماتسيالىق شارالاردى باسقارۋ جانە نەوناتالدى كومەك كورسەتۋ ماسەلەلەرى قاراستىرىلدى. دوكتور ەلي حادج پورت رويال جانە پروفەسسور ۆالەري بيران جۇكتى نەمەسە بوساناتىن ايەلدەگى بار اۋرۋلاردى ەسكەرە وتىرىپ، ەمدەۋدىڭ نۇكتەلى ءادىسىن اتاپ ءوتتى.

ۆەبيناردىڭ سوڭىندا قاتى­سۋشىلار جۇكتى ايەلدەردىڭ قاۋىپ توبىنا جاتاتىنىن جانە وسى سانات­تاعىلارعا پروفيلاكتيكالىق شارالاردى كۇشەيتۋدىڭ، قاجەت بولسا پسيحولوگيالىق كومەك كور­سەتۋدىڭ ماڭىزىن اتاپ ءوتتى. جۇكتى ايەلدەردىڭ دەنساۋلىعىن ساقتاۋ ءۇشىن قاۋىپسىز ورتا قاجەت.

بۇعان قوسا ماماندار كۆي-ءدىڭ سيمپتومدى ناۋقاستارىنىڭ ۇلەس سالماعىنىڭ ارتا تۇسكەنىن ايتۋدا. ماسەلەن، وتكەن اپتانىڭ 7 كۇنىندە الدىڭعى 7 كۇنمەن سالىستىرعاندا ىندەت 1،5 ەسەگە وسكەنى انىقتالعان ەدى.

سوڭعى اپتادا جاس قۇرىلىمىن تالداۋ بالالار مەن جاستارعا «دەلتا» شتامىنىڭ تەز جۇعا­تىنىن كورسەتتى. ماسەلەن، 1 جاسقا دەيىنگى ناۋقاس بالالاردىڭ ۇلەسى سالماعى 0،7%-دان 2،8% دەيىن وسسە، 14 جاسقا دەيىنگى بالالاردا 0،4%-دان 15،0% دەيىن، 15-19 جاس ارالىعىنداعى جاسوسپىرىمدەردە 0،8%-دەن 5،2% دەيىن جانە 40-59 جاستاعى ازاماتتار اراسىندا 1،5%-دان 24،7% دەيىن وسكەنى انىقتالدى. سوندىقتان قالا بيلىگى تۇرعىندارعا بالالار مەن جاسوسپىرىمدەردىڭ جاعدايىنا ەرەكشە نازار اۋدارىپ، ولاردىڭ ادامدار كوپ شوعىرلانعان جەرلەرگە بارۋىنا تىيىم سالۋلارى كەرەك ەكەنىن قايتا-قايتا قاپەرگە سالىپ وتىر.

 

الماتى

 

سوڭعى جاڭالىقتار

دوللار ارزاندادى

قارجى • كەشە

ۇقساس جاڭالىقتار