العاشىندا ۇيىمداستىرۋشىلار ويىندى تاماشالاۋعا مىڭداعان ادامعا رۇقسات بەرۋ ماسەلەسىن قاراستىرعان-دى. الايدا ۋاقىت وتە كەلە الەمدە ىندەتتىڭ جاڭا تۇرلەرى پايدا بولىپ, جۇقتىرعاندار سانى كوبەيگەن سايىن وليمپيا ويىندارىن كورەرمەنسىز وتكىزۋ ماسەلەسى قولداۋ تاپتى. جاپونيانىڭ پرەمەر-مينيستر يوسيحيدە سۋگا وتكەن اپتادا توكيو وليمپياداسىنىڭ قاۋىپسىزدىگىن قامتاماسىز ەتۋ ءۇشىن بارىن سالۋعا ۋادە بەردى.
«مەن قاۋىپسىزدىكتى قامتاماسىز ەتۋ ءۇشىن قولدان كەلگەندى جاسايمىن, سونىڭ ىشىندە شەكاراداعى باقىلاۋ شارالارى دا نازاردا بولادى. بۇل ويىنداردى قاۋىپسىز وتكىزۋ ۇكىمەتتىڭ موينىندا ەكەنىن بىرنەشە قايتارا ايتتىم», دەدى پرەمەر-مينيستر سۋگا.
وليمپيا ويىندارىن ۇيىمداستىرۋشىلار وتكەن اپتادا ءىس-شارا كورەرمەنسىز وتەتىنىن جاريالاعان. بۇعان توكيودا 22 تامىزعا دەيىن كەزەكتى توتەنشە جاعدايدىڭ جاريالانۋى سەبەپ بولىپ وتىر. ەل استاناسىندا ىندەت جۇقتىرعاندار سانى كوبەيگەندىكتەن, بيلىك وكىلدەرى وسىنداي قاتاڭ شارا قابىلداۋعا ءماجبۇر بولعان. وسىلايشا, جاپونيا ۇكىمەتى وليمپيا ويىندارىندا, جازعى دەمالىس ماۋسىمىندا جانە تامىزدىڭ ورتاسىندا تويلاناتىن بون مەرەكەسىندە حالىقتىڭ ەل ىشىندە ساپارلاپ, ءارى-بەرى قوزعالىسىن ازايتۋدى كوزدەيدى. بۇل – ەلدەگى پاندەميا باستالعالى ءتورتىنشى توتەنشە جاعداي. حالىق ىشىندە نارازىلىق بىلدىرگەندەر دە از ەمەس. ماسەلەن, Kyodo اگەنتتىگىنە سۇحبات بەرگەن تۇرعىندار اراسىندا ىندەتتىڭ تاعى ءورشىپ كەتۋىنە الاڭداپ, قاتاڭ شارانىڭ قانشالىقتى ءتيىمدى ەكەنىن سۇراققا العاندار بار. دەسە دە بيلىك وكىلدەرى وتانداستارىن تۇسىنىستىك تانىتىپ, بىرلەسە ارەكەت ەتۋگە شاقىرىپ وتىر.
ال بىرنەشە جىل اسىعا كۇتكەن ءىس-شارانى تاماشالاي المايتىن كورەرمەندەردىڭ كوڭىل كۇيى ايتپاسا دا تۇسىنىكتى. شەتەلدىك تۋريستەردىڭ كەلۋ-كەلمەۋى ەكىتالاي ەكەنى و باستان بەلگىلى بولعانىمەن, جەرگىلىكتى تۇرعىندار ءۇشىن ءالى دە مۇمكىندىك بار ەدى. وعان قوسا, بۇكىل الەم تاماشالايتىن وليمپيا ويىندارىنا دەمەۋشىلىك بىلدىرگەن كومپانيالاردىڭ دا بۇل جاڭالىققا اسا ءماز بولماعانى بەلگىلى. ويتكەنى ولاردىڭ كوبى حالىق تولى سپورت سارايلارىندا ءوز تاۋارلارىن نە قىزمەتتەرىن جارنامالاۋعا كەلىسكەن.
ءتىپتى ويىندى قايتا شەگەرىپ, كەيىنگە قالدىرسا بولماس پا ەدى دەگەندەر دە بار. قالاي بولعاندا دا, وسىنشاما قيىندىق پەن كەدەرگىگە قاراماستان وتكەلى جاتقان ەڭ ماڭىزدى سپورت مەرەكەسىنە ساناۋلى كۇن قالدى.
جاپونيانىڭ دايىندىعىنا كەلەر بولساق, حالىقارالىق وليمپيادا كوميتەتىنىڭ باسشىسى توماس باح سەيسەنبىدە توكيونى پاندەميا سالدارىنان تۋىنداعان قيىن جاعدايعا قاراماستان, وليمپيا ويىندارىن وتكىزۋگە «دايىندىعى ەڭ مىقتى» ۇيىمداستىرۋشى قالا رەتىندە اتاپ ءوتتى. ول ءوز سوزىندە جاپون حالقىن ءىس-شارانىڭ بارلىق قاۋىپسىزدىك شاراسىن ساقتاي وتىرىپ وتەتىنىنە, سونداي-اق ىندەتپەن كۇرەستە ەڭ قاتاڭ شارالاردىڭ قابىلدانىپ جاتقانىنا سەنىمدى بولۋعا شاقىردى. ء«بىزدىڭ ورتاق ماقساتىمىز – ويىندى قاۋىپسىز وتكىزۋ, سول جولدا بىرلەسە ارەكەت ەتەمىز», دەدى حوك باسشىسى.
جاپونيانىڭ دەنساۋلىق ساقتاۋ ءمينيسترى: «ەگەر وليمپيادادا ىندەتتىڭ تارالۋى ۇدەمەسە – ونىڭ ءساتتى وتكەنى», دەگەن پىكىردە. ول تۇرعىندارعا جارىستاردى ۇيدەن تاماشالاۋ قاجەتتىگىن ەسكەرتتى.
ويىنداردىڭ كورەرمەنسىز ءوتۋى – ماڭىزدى شەشىمدەردىڭ ءبىرى ەكەنى ءسوزسىز. وعان ەۋروپاداعى فۋتبول جارىسىنان كەيىن كوروناۆيرۋستىڭ «دەلتا» شتامىن جۇقتىرعاندار سانىنىڭ كوبەيگەنى تۋرالى حابارلار اسەر ەتكەن بولۋى مۇمكىن. سەبەبى دانيا, فينليانديا, رەسەي, شوتلاندياداعى ناۋقاستاردىڭ وسى جارىسپەن بايلانىسى بارى انىقتالعان. وسىلايشا, ءۇندىستاندا تابىلعان جاڭا شتامم الەمگە تاراپ كەتتى. الايدا ونىڭ قايدا, كىمنەن, قالاي جۇققانىن زەرتتەپ وتىرۋ مۇمكىن ەمەس. سول سەبەپتى, جاپون بيلىگى حالىقتىڭ دەنساۋلىعىنا قاۋىپ توندىرمەس ءۇشىن ءتورت جىلدا ءبىر كەلەتىن ءىرى جارىستى بارىنشا قاتاڭ جاعدايدا وتكىزۋگە بەل بايلاپ وتىر.
