سەناتورلار اسكەري بولىمدەردىڭ جەكە قۇرامىمەن كەزدەسىپ, اسكەري قىزمەتشىلەردىڭ ماتەريالدىق-تەحنيكالىق جابدىقتالۋىمەن جانە تىنىس-تىرشىلىگىمەن تانىستى. سەناتتىڭ حالىقارالىق قاتىناستار, قورعانىس جانە قاۋىپسىزدىك كوميتەتىنىڭ توراعاسى مۇحتار قۇل-مۇحاممەد بولىمشەلەردىڭ جوعارى دەڭگەيدەگى جاۋىنگەرلىك دايىندىعى مەن زاماناۋي تەحنيكالىق قۇرالدارمەن جابدىقتالعانىن اتاپ ءوتتى.
دەپۋتاتتار سونىمەن قاتار «اسكەري قىزمەت جانە اسكەري قىزمەتشىلەردىڭ مارتەبەسى تۋرالى» زاڭدى ىسكە اسىرۋ, ونىڭ ىشىندە اسكەري قىزمەتشىلەردى الەۋمەتتىك جانە ماتەريالدىق-تەحنيكالىق قامتاماسىز ەتۋگە بايلانىستى ماسەلەلەردى تالقىلادى.
پارلامەنتشىلەر توتەنشە جاعدايلار سالدارىنان زارداپ شەككەن ادامدارعا مەديتسينالىق جانە پسيحولوگيالىق كومەك كورسەتۋ مىندەتتەرى جۇك-تەلگەن تجم اپاتتار مەديتسيناسى ورتالىعىنىڭ قىزمەتىمەن دە تانىستى.
«كاسىبي مەديتسينالىق اۆاريالىق-قۇتقارۋ قىزمەتىن دامىتۋ قاجەت. قازا بولعاندار سانىن ازايتۋدا ول اسا ماڭىزدى», دەدى سەناتور قايرات قوجامجاروۆ.
سەناتتىڭ سالالىق كوميتەتى توراعاسىنىڭ وڭىرلەرگە ساپارى الماتى قالاسىنداعى ماشينا جاساۋ كاسىپورىندارىندا جالعاستى.
مۇحتار قۇل-مۇحاممەدكە قارۋ-جاراق پەن اسكەري ماقساتتاعى تاۋارلاردى شىعارۋعا باعىتتالعان كاسىپورىنداردىڭ وندىرىستىك قۋاتى كورسەتىلدى.
اڭگىمە بارىسىندا «قورعانىس ونەركاسىبى جانە مەملەكەتتىك قورعانىستىق تاپسىرىس تۋرالى» زاڭدى ىسكە اسىرۋعا, اتاپ ايتقاندا, باعا بەلگىلەۋگە, جەرگىلىكتىلەندىرۋ دەڭگەيىن ارتتىرۋعا, قورعانىستىق تاپسىرىس اياسىندا ۇزاقمەرزىمدى شارتتار جاساسۋعا, سونداي-اق كاسىپورىنداردىڭ بورىش جۇكتەمەسىن تومەندەتۋ مەن قارجى رەسۋرستارىنىڭ قولجەتىمدىلىگىنە بايلانىستى ماسەلەلەر كوتەرىلدى.
«سالاداعى پروبلەمالاردى جۇيەلى تۇردە شەشۋ قاجەت. ءبىر جاعىنان, وتاندىق كاسىپورىندارعا قولداۋ كورسەتۋ كەرەك, ەكىنشى جاعىنان, اسكەري بولىمشەلەردىڭ قاجەتتىلىكتەرىن قازىرگى زامانعى ءارى شىن مانىندە سۇرانىسقا يە قارۋ-جاراق پەن اسكەري تەحنيكامەن بارىنشا قاناعاتتاندىرۋ قاجەت», دەدى مۇحتار قۇل-مۇحاممەد.
سەناتورلار ولگا پەرەپەچينا مەن ەرىك سۇلتانوۆ سولتۇستىك قازاقستان وبلىسى اققايىڭ اۋدانىنىڭ فەرمەرلەرىمەن كەزدەسۋ بارىسىندا ءسۇتتى مال شارۋاشىلىعىن دامىتۋدىڭ كەلەشەگى تۋرالى ايتتى.
دەپۋتاتتار سونداي-اق اۋىل شارۋاشىلىعىن ودان ءارى جاڭعىرتۋ جانە تسيفرلاندىرۋدىڭ ماڭىزىن اتاپ ءوتتى. دەپۋتاتتار ءسۇت-تاۋار فەرماسىنىڭ جۇمىسىنداعى وسى ادىستەردىڭ ناتيجەلەرىمەن تانىستى. 1600 باس ءىرى قاراعا ەسەپتەلگەن بۇل كەشەن سالاداعى ءىرى جوبالاردىڭ ءبىرى بولىپ سانالادى.
اۋىلدى دامىتۋ ءۇشىن زاماناۋي تەحنولوگيالاردى ەنگىزۋمەن قاتار, كادر تاپشىلىعى پروبلەماسىن شەشۋ دە ماڭىزدى. «ەڭبەك» مەملەكەتتىك باعدارلاماسى اۋىل تۇرعىندارىن ەڭبەك كۇشى تاپشى وڭىرلەرگە كوشىرۋگە باعىتتالىپ وتىر. ولگا پەرەپەچينا مەن ەرىك سۇلتانوۆ استراحانكا اۋىلىندا ەلىمىزدىڭ وڭتۇستىك وڭىرلەرىنەن وسى جاققا كوشىپ كەلگەن ازاماتتارعا قانداي جاعداي جاسالعانىن ءبىلدى.
«بۇل باعدارلاما ەلىمىزدىڭ سولتۇستىك ايماقتارىنان حالىقتىڭ كەتۋىن ازايتۋعا مۇمكىندىك بەرەدى جانە ءوڭىردىڭ ادام رەسۋرستارى مەن كادرلىق الەۋەتى جاقسارتاتىن بولادى. سولتۇستىك قازاقستان وبلىسىن دامىتۋدىڭ كەشەندى جوسپارىنا ەنگىزىلۋى وسى جۇمىستىڭ ەرەكشە ماڭىزىن كورسەتىپ وتىر», دەدى ەرىك سۇلتانوۆ.
سەناتورلار سونداي-اق قىزىلجار اۋدانى چاپاەۆ اۋىلىنداعى 720 باس سيممەنتال اسىل تۇقىمدى مالعا ارنالعان ءسۇت-تاۋارلى كەشەنىندە بولدى. كەشەن ديرەكتورى دەپۋتاتتاردى اگروكاسىپورىن جۇمىسىنىڭ قۇرىلىمىمەن جانە نەگىزگى وندىرىستىك-شارۋاشىلىق كورسەتكىشتەرىمەن تانىستىردى.
«قازىرگى ۋاقىتتا مەملەكەت شارۋالارعا قولداۋ كورسەتۋدە. وڭىردە ءسۇتتى مال شارۋاشىلىعىن دامىتۋ جونىندە باعدارلامالار تابىستى جۇمىس ىستەۋدە. الداعى ۋاقىتتا مەملەكەتتىك قولداۋ مەن جەكە ينۆەستيتسيالار ەسەبىنەن سالانى قارجىلاندىرۋ ۇلعايادى دەپ ويلايمىن», دەپ اتاپ ءوتتى ەرىك سۇلتانوۆ.
سەنات دەپۋتاتتارى التىنبەك نۇح ۇلى مەن نۇرجان نۇرسيپاتوۆ شىعىس قازاقستان وبلىسىنا ساپارى اياسىندا سەمەي قالاسىندا پەداگوگيكالىق كوللەدج وقىتۋشىلارىمەن كەزدەستى.
دەپۋتاتتار مۇعالىمدەردىڭ سۇراقتارىنا جاۋاپ بەرىپ, ولارعا قاشىقتان وقىتۋدى زاڭنامالىق قامتاماسىز ەتۋگە قاتىستى جاقىندا سەناتورلار قابىلداعان زاڭنىڭ ەرەجەلەرىن ءتۇسىندىردى.
«تۇزەتۋلەر «قاشىقتان وقىتۋ» ۇعىمىن ناقتىلايدى جانە ونى وتكىزۋ ءتارتىبىن بەلگىلەگەن. سونداي-اق وقۋلىقتاردى ساپالى دايىنداۋدىڭ جەكەلەگەن ەرەجەلەرى ەنگىزىلدى», دەدى سەناتور التىنبەك نۇح ۇلى.
سەناتور نۇرجان نۇرسيپاتوۆ سەسسيا بارىسىندا اتقارىلعان جۇمىستار تۋرالى ايتا كەلىپ, ينكليۋزيۆتى ءبىلىم بەرۋ تۋرالى قابىلدانعان زاڭنىڭ جاڭالىقتارىنا جان-جاقتى توقتالدى.
«زاڭدا ينكليۋزيۆتى جانە ارنايى ءبىلىم بەرۋدىڭ نورماتيۆتىك قۇقىقتىق بازاسىن جەتىلدىرۋ, سونداي-اق ەلىمىزدىڭ زاڭناماسىن ادام قۇقىقتارىنىڭ جالپىعا بىردەي دەكلاراتسياسى جانە مۇگەدەكتەردىڭ قۇقىقتارى تۋرالى كونۆەنتسيا قاعيداتتارىنا سايكەس كەلتىرۋ جونىندەگى مىندەتتەر شەشىلگەن», دەدى ول.
سەناتورلاردىڭ پاۆلودار وبلىسى پروكۋراتۋراسىنىڭ باسشىلىعىمەن كەزدەسۋى بارىسىندا پالاتانىڭ اعىمداعى جىلعى زاڭ شىعارۋ قىزمەتى تۋرالى ءسوز بولدى. قىلمىستىق پروتسەسكە, قۇقىق قورعاۋ قىزمەتىنە جانە سايلاۋعا بايلانىستى زاڭناماعا ەنگىزىلگەن تۇزەتۋلەرگە ەرەكشە نازار اۋدارىلدى.
