قالانىڭ كريمينالدىق پوليتسياسىنىڭ مالىمەتىنشە, الاياقتار Instagram جەلىسىنىڭ بەلسەندى قولدانۋشىلارىن پايدالانادى.
«الاياقتار, ادەتتە, ءسىزدى جازىلۋشىلار سانىنا قاراي تاڭدايدى. جازىلۋشىلارى كوپ كەز كەلگەن ادام «كوك بەلگىنى» العىسى كەلەدى - ول ءسىزدىڭ پاراقشاڭىزدىڭ جالعان ەمەسىن جانە ونى Instagram اكىمشىلىگى راستايتىنىن بىلدىرەدى. الاياقتار وزىنە قاجەت ادامدى تاڭداعاننان كەيى Instagram-داعى جالعان قولداۋ قىزمەتى پاراقشاسىنان سىزگە حابارلاما جىبەرىپ, سىزگە «كوك بەلگى» ستاتۋسى بەرىلگەنى تۋرالى تىكەلەي SMS-حابارلاما جىبەرەدى. ول ءۇشىن ءسىز Instagram-ىڭىزدىڭ قۇپيا ءسوزىن ەنگىزۋ ءۇشىن سىلتەمەگە ءوتۋىڭىز كەرەك بولادى. قۇپيا ءسوزدى ەنگىزۋ ارقىلى اۆتوماتتى تۇردە ءوتىنىمىڭىز قابىلدانعانى جانە ءۇش كۇن ىشىندە قارالاتىنى تۋرالى جازىلعان پاراقشاعا تۇسەسىز. بىرنەشە ساعاتتان كەيىن ءوزىڭىزدىڭ پاراقشاڭىزعا كىرۋ مۇمكىندىگىنەن مۇلدەم ايىرىلاسىز. وسىدان كەيىن ۇيالى تەلەفونىڭىزعا نەمەسە WhatsApp-قا پاراقشاڭىزدىڭ بۇزىلعانى تۋرالى جانە شامامەن 200-1000 اقش دوللارىن تولەۋ كەرەك دەگەن حابارلامالار كەلە باستايدى», دەدى الماتى قالاسى پوليتسيا دەپارتامەنتى باسشىسىنىڭ ورىنباسارى رۇستەم ءابدراحمانوۆ.
وسى تىزبەكتى قولدانۋ ارقىلى ينتەرنەتتەگى الاياقتىق دەرەگى بويىنشا تەك كەيىنگى بىرنەشە كۇندە التى ادام الماتى پوليتسياسىنا شاعىم تۇسىرگەن.
«مۇندا ازاماتتار قابىلداۋى قاجەت اقپاراتتىق قاۋىپسىزدىك شارالارى ماڭىزدى. سىزدەن ءاردايىم وسىنداي حابارلامالارعا كۇماندانىپ, ولارعا سىن كوزبەن قاراۋىڭىزدى سۇرايمىز. ءبىز ساق بولۋعا جانە قىراعىلىق تانىتۋعا شاقىرامىز», دەدى رۇستەم ءابدراحمانوۆ.
