وڭتۇستىك كاسپي تسيكلونىنىڭ اسەرىنەن رەسپۋبليكانىڭ باسىم بولىگىندە اۋا رايى قۇبىلمالى بولادى, جاڭبىر جاۋادى, نايزاعاي جارقىلدايدى.
ەلدىڭ سولتۇستىگىندە, سولتۇستىك-شىعىسىندا جانە ورتالىعىندا نوسەر جاڭبىر جاۋادى. تەك وڭتۇستىك-باتىس پەن باتىستا جاۋىن-شاشىنسىز اۋا رايى كۇتىلەدى. رەسپۋبليكا بويىنشا كەي جەرلەردە داۋىل, بۇرشاق, جەلدىڭ كۇشەيۋى, وڭتۇستىك جانە وڭتۇستىك-باتىستا شاڭدى داۋىل كۇتىلەدى, سولتۇستىك-باتىستا جانە ورتالىقتا تۇمان تۇسەدى.
سولتۇستىك قازاقستان, اقمولا وبلىستارىنىڭ كەي جەرلەرىندە بۇرشاق, داۋىل تۇرۋى ىقتيمال, جەل 15-20 م/س دەيىن كۇشەيەدى.
تاڭەرتەڭ جانە كۇندىز تۇركىستان وبلىسىندا شاڭدى داۋىل بولادى.
جامبىل وبلىسىندا بۇرشاق جاۋىپ, جەلدىڭ جىلدامدىعى 23-28 م/س كۇشەيەدى.
الماتى وبلىسىنىڭ تاۋلى اۋداندارىندا كۇندىز بۇرشاق ءتۇسۋى مۇمكىن, كەي جەرلەرىندە جەل ەكپىنى 25 م/س-كە دەيىن كۇشەيەدى.
قوستاناي وبلىسىندا تۇمان تۇسەدى, كۇندىز باسىم بولىگىندە جەل تۇرادى.
ماڭعىستاۋ, قىزىلوردا وبلىستارىندا جەل كۇشەيىپ, شاڭدى داۋىل كۇتىلەدى, قىزىلوردا وبلىسىندا تۇندە جانە تاڭەرتەڭ داۋىل تۇرۋى ىقتيمال.
پاۆلودار, قاراعاندى وبلىستارىندا دا بۇرشاق, داۋىل كۇتىلەدى, قاراعاندى وبلىسىندا تۇندە تۇمان تۇسەدى.
شىعىس قازاقستان وبلىسىنىڭ, كۇندىز اقتوبە وبلىسىنىڭ كەي جەرلەرىندە جەل 15-20 م/س كۇشەيەدى.
كۇندىز الماتى وبلىسىنىڭ كەي جەرلەرىندە اپتاپ ىستىق بولادى.
قىزىلوردا, تۇركىستان, ماڭعىستاۋ, اتىراۋ, جامبىل وبلىستارىنىڭ باسىم بولىگىندە, الماتى, اقتوبە, باتىس قازاقستان, قاراعاندى وبلىستارىنىڭ كەي جەرلەرىندە ءورت قاۋپى ساقتالادى.
