ەكىنشى جارتىلاي جەڭىل سالماقتا ونەر كورسەتىپ جۇرگەن ايتۋلى بوكسشىلار الاتاۋ بوكتەرىندە WBO European نۇسقاسىنىڭ چەمپيوندىق بەلبەۋىن ساراپقا سالدى. سۇلتاننىڭ ەسىمى جەرگىلىكتى جانكۇيەرلەرگە جاقسى تانىس. كەزىندە اۋەسقويلار رينگىندە ءبىراز بەلەستى باعىندىرعان 25 جاستاعى قانداسىمىز قازىرگى كەزدە كاسىپقويلار اراسىندا ءتاۋىر ناتيجە كورسەتۋدە. انىقتاپ ايتساق, ول وسىعان دەيىنگى 10 كەزدەسۋىنىڭ بارلىعىن جەڭىسپەن اياقتاپ, جەتى قارسىلاسىن ەسىنەن تاندىردى. قارسىلاسى – رونني كلارك. كەزىندە ەۋروپا چەمپيونى اتانعان 36 جاستاعى شوتلانديانىڭ وكىلى 25 رەت شارشى الاڭعا كوتەرىلىپ, 21 رەت باسىمدىق تانىتتى. قوس ساڭلاق اراسىنداعى 10 راۋندقا سوزىلعان جەكپە-جەكتە سۇلتان زاۋىربەكتىڭ ۇستەمدىگى ەش كۇمان تۋعىزعان جوق. ءبىزدىڭ جىگىتتىڭ مىقتىلىعىن بارلىق تورەشى ءبىراۋىزدان مويىندادى. وسىلايشا, سۇلتان الماتىدا التىن بەلبەۋدى يەلەندى.
كوپشىلىك اسا اۋىر سالماقتاعى يۆان دىچكو مەن دەنيس باحتوۆ اراسىنداعى باسەكەنى تاعاتسىزدانا كۇتتى. وليمپيا ويىندارى مەن الەم چەمپيوناتتارىندا سان مارتە جەڭىس تۇعىرىنا كوتەرىلگەن 30 جاستاعى جەرلەسىمىز كاسىپقوي رينگتەگى ءوزىنىڭ توعىز كەزدەسۋىن اقش-تا وتكىزىپ, بارلىعىندا جەڭىس تويىن تويلادى. بۇل – دىچكونىڭ قازاقستانداعى العاشقى جارىسى. 41 جاستاعى دەنيس باحتوۆتى دا جانكۇيەرلەر جاقسى بىلەدى. قاراعاندىدا تۋىپ-وسكەن ول كەيىننەن رەسەيگە قونىس اۋداردى. دەنيستىڭ كاسىپقويلار اراسىندا جۇدىرىقتاسىپ جۇرگەنىنە تابانى كۇرەكتەي 22 جىلعا جۋىقتادى. سول ارالىقتا ول 58 مارتە رينگكە كوتەرىلىپ, 39 رەت باسىمدىق تانىتتى. كەزىندە داڭقى دۇركىرەپ تۇرعان باحتوۆتىڭ «بولدىرىپ قالعانىن» بۇل جولى انىق بايقادىق. يۆان ونى ءبىرىنشى راۋندتا-اق اۋىر نوكاۋتقا جىبەردى.
قازاقتىڭ مىقتى بوكسشىلارى – داۋرەن ەلەۋسىنوۆ پەن ارمان رىسبەك اراسىنداعى ءوزارا كەزدەسۋ دە كورەرمەندەردىڭ ەرەكشە قىزىعۋشىلىعىن تۋدىردى. اۋەسقويلار اراسىندا ەلەۋلى تابىستارعا قول جەتكىزگەن ەكى قانداسىمىز كاسىپقويلار رەتىندە دە «قارا جاياۋ ەمەس» ەكەندەرىن بايقاتتى. بۇل باسەكە بارىسىندا ولار بارىن سالدى. دەسەك تە داۋرەن قارسىلاسىنا قاراعاندا الدەقايدا الىمدى كورىندى. بەسىنشى راۋندتان سوڭ ارمان جەكپە-جەكتى جالعاستىرۋدان باس تارتتى.
كاسىپقويلار اراسىندا جۇدىرىقتاسىپ جۇرگەنىنە اسا كوپ ۋاقىت بولماسا دا, ميلليونداعان جانكۇيەردىڭ نازارىن وزىنە اۋدارىپ ۇلگەرگەن تۇرسىنباي قۇلاحمەتتىڭ دە قارقىنى قۋانتارلىق. بۇل جولى ول 35-تەن اسا كەزدەسۋ وتكىزگەن رەسەيدىڭ ساقا سپورتشىسى الەكسەي ەۆچەنكونى 10-راۋندتا نوكاۋتقا جىبەرىپ, ءبىرىنشى ورتا سالماقتاعى WBC International نۇسقاسىنىڭ التىن بەلبەۋىن يەلەندى.
سونداي-اق الماتىداعى بوكس كەشىندە ساعادات راحمانقۇلوۆ, نۇربول سۇلتانباي, تالعات شايكەن, ايدوس مەدەت, راحات سەيىتجان, ەرجان زاليلوۆ, راي سەيىتجانوۆ, قاناعات ماناۇلتى وزدەرىنىڭ كەزەكتى جەڭىستەرىنە قول جەتكىزدى.
