اقتوبە وبلىسىندا ءبىر تاۋلىكتە 55 ادامنان كوروناۆيرۋس ينفەكتسياسى انىقتالدى. كوبى اقتوبە قالاسىنان. وبلىستىق سانيتاريالىق-ەپيدەميولوگيالىق باقىلاۋ دەپارتامەنتى باسشىسىنىڭ ورىنباسارى مۇحتار سەرباەۆتىڭ ايتۋىنشا, 7-11 شىلدە ارالىعىندا 510 ادام اۋىرىپ, ەم ىزدەدى.
«ەپيداحۋال كۇردەگى دەپ ايتساق بولادى. ءوسىم بار. سوندىقتان يممۋنداۋ شاراسىنا بەلسەندى قاتىسۋعا شاقىرامىز. ءارى ماسكا تاعۋ, انتيسەكتيك قولدانۋ جانە اراقاشىقتىقتى ساقتاۋدى ۇمىتپاۋ كەرەك», دەدى مۇحتار سەرباەۆ.
اقتوبە وبلىسىنداعى ينفەكتسيالىق ستاتسيونارلاردا قازىر 244 ادام ەم الىپ جاتىر. ونىڭ 24-ءى جانساقتاۋ بولىمىندە بولسا, بىرەۋ وكپەنى جەلدەتۋ اپپاراتىنا قوسىلدى.
«ينفەكتسيالىق كەرەۋەت جۇكتەمەسى 56, جانساقتاۋ بولىمىندەگى جۇكتەمە 40,5 پايىزدى قۇراپ وتىر. جاپلى وبلىستاعى اۋدانداردا ءوسىم بايقالمايدى. دەگەنمەن اقتوبە قالاسىندا ۆيرۋس جۇقتىرعاندار سانى ارتتى. جۇكتەمە ارتقان سوڭ قوسىمشا ينفەكتسيالىق ستاتسيونار اشۋدى قاراستىرىپ جاتىرمىز. تۇرعىنداردىڭ يممۋنيتەتىن قالىپتاستىرۋ ءۇشىن قازىر قوسىمشا ۆاكتسينا پۋنكتتەرى اشىلدى. ولار ءىرى بازارلار مەن ساۋدا ۇيلەرى, گيپەرماركەتتەردە ورنالاسقان», دەدى وبلىستىق دەنساۋلىق ساقتاۋ باسقارماسى باسشىسىنىڭ ورىنباسارى بەكبولات ءىزباساروۆ.
