سقو سايلاۋ كوميسسياسىنىڭ توراعاسى تىلەگەن قاسكيننىڭ ايتۋىنشا, اۋىل اكىمدەرىنىڭ سايلاۋىنا تۇسۋگە 237 كانديدات تىركەلسە, سونىڭ 74-ءى ساياسي پارتيالاردان, 163 ادام – ءوزىن-ءوزى ۇسىنۋشى. ءبىر ورىنعا شامامەن 3 ادام تالاسپاق.
قىزىلجار اۋدانى بۋگروۆوە اۋىلدىق وكرۋگىندە 5 كانديدات تىركەلدى, 61 سايلاۋ وكرۋگىندە - 3, 9 وكرۋگتە 4 كانديداتتان بار.
«237 كانديداتتىڭ قۇجاتتارى ۋاكىلەتتى ورگاندارمەن زاڭدىلىققا تەكسەرىلدى, ولاردىڭ 223-ءىنىڭ قۇجاتتارى سايكەس كەلەدى. تەكسەرىستىڭ قورىتىندىسى بويىنشا 14 كانديداتقا ءارى قاراي سايلاۋعا قاتىسۋعا رۇقسات بەرىلمەدى. جالپى 237 كانديداتتىڭ 70-ءى – ايەل, بۇل بارلىق كانديداتتاردىڭ 29,5%-ى. 110 كانديدات – مەملەكەتتىك قىزمەتشى, سونىڭ ىشىندە 43-ءى اۋىل اكىمى بولىپ جۇمىس ىستەيدى. 13-ءى – كوممەرتسيالىق قۇرىلىمنىڭ وكىلى, 88-ءى – بيۋدجەتتىك ۇيىمنىڭ قىزمەتكەرلەرى, 6-ۋى – ۋاقىتشا جۇمىس ىستەمەيدى», دەيدى تىلەگەن قاسكين.
كانديداتتاردىڭ بىرەۋى - «بولاشاقتىڭ» تۇلەگى.
سونداي-اق كانديداتتاردىڭ ىشىندە ەكونوميستەر, زاڭگەرلەر, ۇستازدار, اۋىل شارۋاشىلىعى قىزمەتكەرلەرى بار. سايلانۋشىلاردىڭ ورتاشا جاسى – 41. ەڭ جاسى – 27-دە بولسا, ەڭ ەرەسەگى – 62-دە.
ء«بىر كانديدات ءوز ەركىمەن قۇجاتتارىن الدى. وڭىردە ەكى كانديداتتان از اۋىلدىق وكرۋگ جوق. ءالى كانديداتتار تىركەلىپ جاتىر.
بۇل پروتسەسس 14 شىلدە, ساعات 18.00-گە دەيىن جالعاسادى. تىركەۋ اياقتالعاننان كەيىن كانديداتتار ۇگىت-ناسيحات جۇمىسىن باستايدى. ول 24 شىلدەگە دەيىن جالعاسادى. بۇل ماقساتقا اۋداندىق ماڭىزداعى قالا اكىمىنە كانديداتقا – 230 مىڭ تەڭگە, اۋىلدىق وكرۋگ اكىمىنە كانديداتقا 220 مىڭ تەڭگە بەرىلەدى», دەيدى وبلىستىق سايلاۋ كوميسسياسىنىڭ توراعاسى.
