اعىلشىندار جىلدام گول سوقتى. ويىننىڭ نەبارى 2 مينۋتىندا ليۋك شوۋ عالامات گول سوقتى. بۇل «مانچەستەر يۋنايتەد» قورعاۋشىسىنىڭ ۇلتتىق قۇراما ساپىنداعى العاشقى گولى ەكەنىن دە ايتا كەتۋ كەرەك. ايتپاقشى, شوۋدىڭ گولى – ەۋروپا چەمپيوناتى تاريحىنداعى ەڭ جىلدام گول. ول ماتچ باستالا سالىسىمەن 1 مينۋت 57 سەكۋندتان سوڭ ەسەپ اشتى. بۇعان دەيىنگى رەكورد يسپان فۋتبولشىسى حەسۋس پەرەداعا تيەسىلى ەدى. 1964 جىلعى دودادا ول 5 مينۋت 17 سەكۋندتا مەرگەندىك تانىتقان.
ەسەپ 67 مينۋتقا دەيىن وزگەرىسسىز تۇردى. 67 مينۋتتا يتاليا قۇراماسىنىڭ قورعاۋشىسى لەوناردو بونۋچچي گول سوعىپ, جاعدايدى تەڭەستىردى. كوماندالار قوسىمشا ۋاقىتتا دا جەڭىمپازدى انىقتاي الماي, پەنالتي سەرياسىنا جۇگىندى. لوتورەيادا روبەرتو مانچيني شاكىرتتەرى 3:2 ەسەبىمەن جەڭىپ كەتتى. سوڭعى ساتتە پيكفورد يتاليا ويىنشىسى دجوردجينونىڭ سوققىسىن قايتارىپ, ءۇمىت وتىن وياتقان. الايدا سوڭعى بولىپ دوپقا جاقىنداعان اعىلشىن قۇراماسىنىڭ جاس ويىنشىسى ساكا سوققىسىنىڭ تراەكتورياسىن دوننارۋما ءدال تاپتى.
بۇل يتاليا قۇراماسىنىڭ ەۋروپا چەمپيوناتىنداعى ەكىنشى جەڭىسى. سوڭعى رەت 1968 جىلى جەڭىسكە جەتكەن ەدى. ال انگليا قۇراماسى تۋرنير فينالىنا تۇڭعىش رەت شىقتى جانە ونىسى ءساتسىز اياقتالدى.
يتاليا توپتىق كەزەڭدەگى ءۇش ويىننان تولىق 9 ۇپاي جيىپ, پلەي-وفف كەزەڭىنە سەنىمدى شىققان بولاتىن. ودان ءارى قاراي دا روبەرتو مانچيني شاكىرتتەرى جانكۇيەرلەر سەنىمىنە سەلكەۋ تۇسىرگەن جوق. ءار كەزدەسۋ سايىن بابى كەلىسكەن, باعى شاپقان قۇراماعا اينالعانىن دالەلدەۋمەن بولدى. 1/8 فينالدا بەيل باستاعان ۋەلس جىگىتتەرىن 2:1 ەسەبىمەن جەڭسە, شيرەك فينالدا كوپشىلىك ءۇمىت كۇتكەن بەلگيادان دا ءدال وسى ەسەپپەن باسىم ءتۇستى. جارتىلاي فينالدا يسپانيا قۇراماسىمەن يتجىعىس ءتۇستى. الايدا پەنالتي سەرياسىندا لۋيس ەنريكە شاكىرتتەرىنە قاراعاندا دوپتى ءتۇزۋ تەبەتىندەرىن بايقاتتى. ءسويتىپ, فينالعا كەلگەن ەدى.
انگليا دا ءوز توبىندا ءبىرىنشى ورىن الدى. جيعانى – 7 ۇپاي. اعىلشىنداردى توپتىق كەزەڭدە اپىرىپ-جاپىرىپ ونەر كورسەتپەي-اق, ءتىپتى توپىرلاتىپ گول دا سوقپاي-اق فينالعا شىعۋعا بولاتىنىن دالەلدەي العان بىرەگەي ۇجىم دەسە دە بولعانداي. ولار حورۆاتيانى 1:0 ەسەبىمەن جەڭسە, شوتلانديامەن تەڭ ءتۇستى (0:0), توپتاعى سوڭعى ماتچتا چەح قۇراماسىن تاعى دا 1:0-مەن جەڭە الدى. 1/8 فينالدا نەمىس فۋتبولشىلارى ءمالىم دە بەيمالىم اعىلشىندارعا قارسى ايلا جاساي المادى. بۇل ويىن 2:0 ەسەبىمەن ساۋتگەيت كومانداسىنىڭ جەڭىسىمەن اياقتالىپ ەدى. ال شيرەك فينالدا ۋكراينانى 4:0 ەسەبىمەن ويسىراتا جەڭدى. ودان سوڭ جارتىلاي فينالدا دانيا قۇراماسىمەن جولىقتى. 1992 جىلعى ەرلىكتى قايتالاۋعا بارىن سالعان دات جىگىتتەرى اعىلشىن فۋتبولشىلارىنىڭ وسال تۇسىن تابا العان جوق. ەسەپ 2:1, انگليا قۇراماسىنىڭ پايداسىنا. ەكسترا-تايمدا پەنالتيدى ءساتتى ورىنداعان كاپيتان ءحارري كەين ءوز قۇراماسىن فينالعا الىپ شىقتى.
ەۋروپا چەمپيوناتىن جارتى جولدان تامامداعانىنا قاراماستان كريشتيانۋ رونالدۋ مەن پاتريك شيك (چەحيا) ءتۋرنيردىڭ باس سۇرمەرگەندەرى اتاندى. ەكەۋىنىڭ دە ەنشىسىندە 5 گولدان بار. ناتيجەلى پاس بەرۋ بويىنشى شۆەيتساريا قۇراماسىنىڭ ويىنشىسى ستيۆەن تسۋبەرگە تەڭ كەلەر ەشكىم بولعان جوق. ول تۋرنير بارىسىندا ءتورت رەت گولعا اينالار پاس اسىرعان ەكەن.
