تۇرىكمەنستان سىرتقى ىستەر مينيسترلىگى ءباسپاسوز قىزمەتىنىڭ مالىمەتى بويىنشا, سوڭعى كۇندەرى بىرقاتار رەسەيلىك باق تاراپىنان «تۇرىكمەن-اۋعان شەكاراسىنداعى جاعدايعا قاتىستى تەكسەرىلمەگەن جانە وبەكتيۆتى ەمەس حابارلامالار» تاراتىلعان.
«ربك تەلەارناسى اۋعانستان شەكاراسىنا تۇرىكمەنستاننىڭ اسكەري تەحنيكاسى مەن ارتيللەرياسىن تارتۋ تۋرالى شىندىققا جاناسپايتىن اقپارات تاراتتى. بۇل سەنساتسيا ءۇشىن جاسالعان جانە باسقا ەشتەڭە بىلدىرمەيدى», دەلىنگەن حابارلامادا.
سونىمەن قاتار تۇرىكمەنستان سىرتقى ىستەر مينيسترلىگى ەكى كورشى مەملەكەتتىڭ باۋىرلاستىق قاتىناسى ارقاسىندا تۇرىكمەن-اۋعان شەكاراسى دوستىق پەن ىنتىماقتاستىقتىڭ شەكاراسى ەكەنىن ايتتى.
تۇرىكمەنستان قورعانىس مينيسترلىگىنىڭ اقپاراتى بويىنشا, ونىڭ قاراماعىنداعى بارلىق اسكەري بولىمشە, ولاردىڭ جەكە قۇرامى مەن اسكەري تەحنيكاسى تۇراقتى ورنالاسقان جەرلەردە قالادى جانە كوزدەلگەن باعدارلاماعا سايكەس جوسپارلى وقۋ دايارلىعىن جالعاستىرادى.
«تاتۋ كورشى داستۇرىنە سايكەس, سونداي-اق ەكىجاقتى كەلىسىمدە بەكىتىلگەن حالىقارالىق قۇقىق پەن مىندەتتەمەلەردىڭ مىزعىماس قاعيداتتارىن بەرىك ورىنداي وتىرىپ, تۇرىكمەنستان باۋىرلاس اۋعانستانمەن بەيبىت جانە تاتۋ كورشىلىك بايلانىستاردى قولداۋعا جانە نىعايتۋعا ۇمتىلادى», دەيدى ءسىم وكىلى.
