استانادا ەلىمىزدىڭ ءبىلىم جانە عىلىم مينيسترلىگى مەن قازاقستان جاستار كونگرەسىنىڭ, سونداي-اق, قازاقستان حالقى اسسامبلەياسىنىڭ ۇيىتقى بولۋىمەن “جاستار – قازاقستان حالقى بىرلىگى ءۇشىن” اتتى جالپىۇلتتىق فورۋم اياقتالدى.
بىرنەشە كۇنگە سوزىلعان فورۋم اياسىندا جاستار مەن ەل بولاشاعى اراسىنداعى بايلانىس پەن ساباقتاستىق ماسەلەلەرى جان-جاقتى تالقىعا ءتۇستى. ال فورۋمنىڭ سوڭعى كۇنى قازاقستان رەسپۋبليكاسى پرەزيدەنتى اكىمشىلىگى باسشىسىنىڭ ورىنباسارى ماۋلەن اشىمباەۆ, ءبىلىم جانە عىلىم ءمينيسترى جانسەيىت تۇيمەباەۆ, قازاقستان حالقى اسسامبلەياسى توراعاسىنىڭ ورىنباسارى ەرالى توعجانوۆ جانە قازاقستان ارداگەرلەرىنىڭ ورتالىق كەڭەسى وكىلدەرى ءوز باياندامالارىن وقىپ, مەملەكەتتىڭ قالىپتاسۋىندا جاستاردىڭ ۇلكەن ءرول اتقاراتىندىعى, بۇل رەتتە ولاردىڭ ەنشىسىنە ۇلكەن امانات جۇكتەلەتىندىگى جونىندە وي تولعادى. ماسەلەن, جانسەيىت تۇيمەباەۆ ۇرپاقتار ساباقتاستىعىن قوزعاعان كەزدە ونىڭ تاۋەلسىزدىك, شەكارا تۇتاستىعى, تاتۋلىق, اۋىزبىرشىلىك سەكىلدى ماسەلەلەرمەن تىكەلەي بايلانىستى بولاتىندىعىن اتاپ ءوتتى. ول ءوز سوزىندە ەلدىڭ ەلدىك ءتىنىن شايقالتۋ ءۇشىن سىرتتان دا, ىشتەن دە كوز الارتۋشىلاردىڭ كەزدەسەتىنىن, مۇنى كورشى ەلدەردەگى وقيعالاردان انىق كورۋگە بولاتىنىن, ال مۇنداي كەدەرگىلەرگە قاسقايا قارسى تۇرۋدا, مەملەكەتتىڭ تۇتاستىعىن ساقتاۋدا كەيىنگى ۇرپاق – جاستاردىڭ ۇلكەن ءرول اتقاراتىنىن اتاپ ءوتتى. “قازىرگى تاڭدا 610 مىڭعا تارتا جاس جوعارى وقۋ ورىندارىندا, 600 مىڭعا تارتا جاس ءتۇرلى كاسىپتىك ءبىلىم بەرۋ ورىندارىندا ءبىلىم الۋدا. ءبىلىم ۇيالارىندا وقيتىن جاسوسپىرىمدەردىڭ سانى 2,5 ملن.-عا جەتەدى. بۇل – ۇلكەن كۇش. سوندىقتان ەلىمىزدىڭ ەندىگى بولاشاعى وسى جاستارمەن تىكەلەي بايلانىستى”, – دەدى ج.تۇيمەباەۆ. ول سونداي-اق, جاستاردى جانە بارلىق جاستار ۇيىمدارىن 2011-2020 جىلدار ارالىعىن قامتيتىن ءبىلىمدى دامىتۋدىڭ مەملەكەتتىك باعدارلاماسى مەن 2011 جىلى “مەملەكەتتىك جاستار ساياساتى تۋرالى” زاڭ جوبالارىن ازىرلەۋگە بەلسەنە قاتىسۋعا شاقىردى. جانسەيىت تۇيمەباەۆ, سونىمەن قاتار, مەملەكەت تاراپىنان حالىقارالىق دەڭگەيدەگى باسەكەگە توتەپ بەرەتىن تەرەڭ ءبىلىم الۋعا بارلىق جاعداي جاسالىپ وتىرعانىن باسا ايتتى. ال ماۋلەن اشىمباەۆ جاستار ساياساتى, ولاردىڭ ازاماتتىق پوزيتسياسى توڭىرەگىندەگى وي-پايىمىن جان-جاقتى جەتكىزدى. “قازىرگى تاڭدا ەلىمىزدى ىلگەرى دامىتۋ باعىتىندا ۇستانىپ وتىرعان باسىم باعىتتاردىڭ ءبىرى – جاستار ساياساتى. سول سەبەپتى دە, بۇگىندە جاستار ساياساتىنا ايرىقشا كوڭىل بولىنۋدە. ال جالپى العاندا, قازاقستاندا جاستار ماسەلەسى – مەملەكەت نازار اۋدارىپ وتىرعان بىردەن-ءبىر ماڭىزدى ماسەلە. سونىڭ ايقىن دالەلى – ەلوردادا نەگىزى قالانعان مەملەكەت باسشىسى اتىنداعى ۋنيۆەرسيتەت بولاشاقتا ۇلكەن ءبىر عىلىمي ورتالىق بولارى ءسوزسىز”, – دەدى م. اشىمباەۆ. سونداي-اق, ول ءار جاس – ءوز-ءوزىن بىلىممەن بايىتۋ ارقىلى ءوز مەملەكەتىن بايىتاتىنىن ۇمىتپاۋ قاجەتتىگىن, ول ءۇشىن ەلىمىزدە ءبىلىمدى دە بىلىكتى جاستار كوپتەپ شوعىرلانۋى ماڭىزدى ەكەنىن اتاپ ءوتتى. ەرالى توعجانوۆ قازاق جەرىندە سان ءتۇرلى ەتنوستاردىڭ بەيبىتشىلىك پەن تاتۋلىقتا تىرشىلىك كەشىپ جاتقاندىعىنا, وسى قۇندىلىقتى ساقتاۋدا جاستاردىڭ ايرىقشا ءرول اتقاراتىنىنا توقتالدى. بۇل كۇنگى وتىرىس بارىسىندا “جاستاردىڭ وڭىرلەردەگى جەتىستىكتەرىنىڭ كارتاسى” كورمە-تانىستىرىلىمى ۇيىمداستىرىلدى. فورۋمنىڭ سوڭىندا وعان قاتىسۋشىلار ەل جاستارىنا ۇندەۋ جاريالادى. ۇندەۋدە جاستاردىڭ ءوز قابىلەتتەرىن شىڭداۋعا, ارمان-ماقساتتارىن ىسكە اسىرۋعا بارلىق جاعداي جاسالعانى, مەملەكەت تاراپىنان جاسالىپ وتىرعان بۇل يگىلىكتەر – ەرتەڭگى كۇنگى باستامالارعا نەگىز قالايتىنى ايتىلعان. سونداي-اق, ۇندەۋدە “ەلىمىزدە جاڭا ينتەللەكتۋالدى الەۋەت قالىپتاستىرۋ باعىتىندا جاڭا عاسىردىڭ وزىق تەحنولوگيالارىن جەدەل يگەرۋگە ۇمتىلۋىمىز كەرەك. ءبىز قوعام دامۋىنىڭ بەرىك ىرگەتاسىنا اينالعان ەلىمىزدەگى ەتنوسارالىق كەلىسىمدى, تاتۋلىق پەن بىرلىكتى نىعايتا بەرەمىز”, – دەلىنگەن. فورۋمعا قاتىسۋشىلار, سونىمەن بىرگە, ءوز ۇندەۋلەرى ارقىلى قازاق جاستارىن ساپالى ءبىلىم الىپ, عىلىممەن, كاسىپكەرلىكپەن اينالىسۋعا, ەلىمىزدىڭ يندۋستريالىق-يننوۆاتسيالىق سالالارىندا قىزمەت ەتۋگە شاقىرىپ وتىر. ءلايلا ەدىلقىزى.
