جالپى, مەديتسينالىق وڭالتۋ ءۇش كەزەڭنەن تۇرادى:
ءبىرىنشىسى اۋرۋى اسقىنىپ تۇرعان ناۋقاستارعا, حيرۋرگيالىق وپەراتسيا جاساتقان, جاراقات العان ادامدارعا ارنالعان. ول ستاتسيونارلاردىڭ قۇرىلىمدىق بولىمشەلەرىندە جۇرگىزىلەدى.
ەگەر پاتسيەنتتى اۋرۋحاناعا جاتقىزۋ قاجەت بولماسا, مەديتسينالىق كومەك كورسەتىلگەننەن كەيىن جانە نەگىزگى اۋرۋ ەمدەلىپ بولعاننان كەيىن پاتسيەنت وڭالتۋدىڭ ەكىنشى نەمەسە ءۇشىنشى كەزەڭىنە جىبەرىلەدى.
وڭالتۋدىڭ ەكىنشى كەزەڭى مامانداندىرىلعان بولىمشەلەردە نەمەسە رەسپۋبليكالىق دەنساۋلىق ساقتاۋ ۇيىمدارى, مامانداندىرىلعان وڭالتۋ ورتالىقتارى مەن كوپبەيىندى ستاتسيونارلار بازاسىندا وتەدى. بۇل كەزەڭ اۋرۋ باستالعان ساتتەن باستاپ توعىز اي ىشىندە جۇرگىزىلۋى قاجەت. كۋرستىڭ ۇزاقتىعى مەن جيىلىگى نوزولوگياعا, ناۋقاستى دەنساۋلىق جاعدايىنا, تاعى دا باسقا فاكتورلارعا بايلانىستى.
ءۇشىنشى كەزەڭدە مەديتسينالىق وڭالتۋ ەمحانا-امبۋلاتوريا دەڭگەيىندە, كۇندىزگى جانە تاۋلىك بويعى ستاتسيونارلاردا, وڭالتۋ ورتالىقتارىندا, شيپاجايلار مەن كۋرورتتاردا, ۇيدەگى ستاتسيونار جاعدايىندا, سونداي-اق قاشىقتىقتان جۇرگىزىلەدى. كۋرستىڭ جيىلىگى مەن ۇزاقتىعى پاتسيەنتتىڭ دەنساۋلىعىنا قاراي بەلگىلەنەدى.
«الەۋمەتتىك مەديتسينالىق ساقتاندىرۋ قورىنىڭ نۇر-سۇلتان قالاسى بويىنشا فيليالى 2021 جىلى وڭالتۋ قىزمەتتەرىن كورسەتەتىن 45 مەديتسينا ۇيىمىمەن كەلىسىمشارت جاساعان. ولاردىڭ ىشىندە: 20 جەكەمەنشىك, 22 مەملەكەتتىك, 3 رەسپۋبليكالىق مەديتسينا ۇيىمى بار.
جىل باسىنان بەرى ەلوردادا 3,23 ملرد تەڭگەدەن اسا سوماعا وڭالتۋ قىزمەتى كورسەتىلدى. امبۋلاتوريالىق-ەمحانالىق دەڭگەيدە 204 ملن تەڭگە سوماسىنا 252 001 قىزمەت كورسەتىلدى», دەپ اتاپ ءوتتى الەۋمەتتىك مەديتسينالىق ساقتاندىرۋ قورىنىڭ نۇر-سۇلتان قالاسى بويىنشا فيليالىنىڭ ديرەكتورى نۇرلىبەك قابدىقاپاروۆ.
كوروناۆيرۋستىق پاندەميا وڭالتۋدىڭ قانشالىقتى ماڭىزدى ەكەنىن جانە بۇل باستاما قانشالىقتى ۋاقىتىلى جۇزەگە اسىرىلعانىن كورسەتتى. الەۋمەتتىك مەديتسينالىق ساقتاندىرۋ قورى حالىق ءۇشىن وڭالتۋدىڭ قولجەتىمدىلىگىن ارتتىرۋ بويىنشا بەلسەندى جۇمىستاردى جالعاستىرۋدا.
كوروناۆيرۋس ينفەكتسياسى كوۆيدتەن كەيىنگى ءتۇرلى اسقىنۋلارمەن اۋىرعاندار ءۇشىن قاۋىپتى. كوۆيدتەن ايىعىپ شىققان ناۋقاستاردىڭ باسىم كوپشىلىگى, دەمىكپەمەن قوسا, جۇرەك, بۋىن اۋرۋلارىنىڭ بەلگىسى مازالايدى. سوندىقتان ناۋقاس كورونوۆيرۋسپەن اۋرۋحاناعا تۇسكەن كەزدە ەم-شارامەن بىرگە دارىگەر رەابيليتولوگتىڭ دا كەڭەسىن الادى. مامان ءوزىنىڭ قوسىمشا ەمدەۋىن تاعايىندايدى. ول تەگىن مەديتسينالىق كومەكتىڭ كەپىلەندىرىلگەن كولەمى اياسىندا كورسەتىلەدى. ال ەكىنشى جانە ءۇشىنشى وڭالتۋ كەزەڭىن پاتسيەنت مىندەتتى الەۋمەتتىك مەديتسينالىق ساقتاندىرۋ اياسىندا الادى.
ن.قابدىقاپاروۆتىڭ ايتۋىنشا, مەديتسينالىق ساقتاندىرۋ قورىنىڭ نەگىزگى باسىمدىقتارىنىڭ ءبىرى – پاتسيەنت قۇقىعىن قورعاۋ. وسىعان وراي كەرى بايلانىس قۇرالدارى ارقىلى تۇسەتىن شاعىم-وتىنىشتەر ەرەكشە باقىلاۋدا بولادى.
«مەديتسينالىق ۇيىمدار پاتسيەنتتەردى قولداۋ قىزمەتىنىڭ جۇمىسىن جولعا قويىپ, تىركەلگەن تۇرعىنداردىڭ مۇقتاجدىقتارىنا-سۇرانىستارىنا جاۋاپكەرشىلىكپەن قاراۋى قاجەت», دەدى ول.
ايتا كەتەيىك, قانداي دا ءبىر مەكەمە ەمدەلۋشىگە مەديتسينالىق كومەك بەرۋدەن باس تارتسا نەمەسە وڭالتۋ ەرەجەلەرىنە قاتىستى سۇراقتار تۋىنداسا, 1406 بايلانىس ورتالىعىنا حابارلاسۋعا نەمەسە «Qoldau - 24/7» موبيلدىك قوسىمشاسى ارقىلى ءوتىنىش قالدىرۋعا بولادى.
