شىمكەنت قالاسىندا قوعامدىق كولىككە «تولەم» ەلەكتروندى جۇيەسى وتكەن جىلدىڭ 15 قازانىنان باستاپ ەنگىزىلگەن. بۇگىنگى كۇنگە دەيىن 305 929 تولەم كارتاسى ساتىلىپ, جۇيە ارقىلى 80 پايىزدان استام ترانزاكتسيا جاسالدى. ناتيجەسىندە تاسىمالداۋشىلاردىڭ سالىقتىق تولەمدەرى وتكەن جىلدىڭ كورسەتكىشىنە قاراعاندا ءتورت ەسەگە ارتتى.
شىمكەنتتە جولاۋشىلار كولىگىن دامىتۋدىڭ كەشەندى سحەماسى دايىندالىپ, بەكىتىلدى. وسىنىڭ اياسىندا قوعامدىق كولىكتەردى جاڭارتۋ باعدارلاماسى ىسكە اسىرىلىپ جاتىر. بۇرىن قالا تۇرعىندارىن «Ankai» ماركالى ديزەل وتىنىمەن جۇرەتىن 300 اۆتوبۋس تاسىمالسادا, بۇگىندە اۆتوبۋس پاركى «Yutong» ماركالى 300 جاڭا, مەتان گازىمەن جۇرەتىن اۆتوبۋسپەن تولىققان. جىل سوڭىنا دەيىن تاعى 290 جاڭا اۆتوبۋس لينياعا شىقپاق. وسىلايشا, قوعامدىق كولىكتىڭ 80 پايىزى جاڭارادى. بۇل اۆتوبۋستار دا گازبەن جۇرەتىن بولادى.
قالادا 16 تاسىمالداۋشى 1050 قوعامدىق كولىكتىڭ قىزمەتىن كورسەتۋدە. جولاۋشىلار تاسىمالىن جۇزەگە اسىراتىن 78 مارشرۋتتىڭ 57-ءسى الەۋمەتتىك ماڭىزى بار مارشرۋتقا جاتادى.
سونداي-اق قالادا تۇرعىندارىنا ساپالى ءارى تۇراقتى قىزمەت كورسەتۋ ماقساتىندا اۆتوبۋس باعىتتارىن ونلاين رەجيمىندە كورۋگە ارنالعان «I-kolik» موبيلدىك قوسىمشاسى ىسكە قوسىلدى.
