اگەنتتىك توراعاسىنىڭ ايتۋىنشا, پارلامەنت جۇمىسى اياقتالعانعا دەيىن ماجىلىسكە ءتيىستى تۇزەتۋلەر ەنگىزىلگەن.
«تۇزەتۋلەردىڭ ءبىرى نەگىزسىز بايۋ ءۇشىن جاۋاپكەرشىلىكتى ەنگىزۋ بولادى. بۇل بيىلدان باستاپ ىسكە قوسىلعان جالپىعا بىردەي دەكلاراتسيالاۋ تەتىگىنىڭ لوگيكالىق جالعاسى», دەدى ول.
اگەنتتىك شىعىسى زاڭدى كىرىسىنەن ەداۋىر اساتىن مەملەكەتتىك قىزمەتشىلەردىڭ جاۋاپكەرشىلىگىن كۇشەيتۋدى ۇسىنعان. بۇل جاعدايدا شەنەۋنىككە ايىپپۇل سالۋ نەمەسە ونى جۇمىستان بوساتۋ قاراستىرىلادى. وسى رەتتە قازاقستان ەىدۇ-نىڭ سالىق اقپاراتىن اۆتوماتتى الماسۋدىڭ دۇنيەجۇزىلىك جۇيەسىنە قوسىلىپ جاتىر.
«ونىڭ كومەگىمەن ءبىز شەتەلدىك شوتتار مەن اكتيۆتەر تۋرالى مالىمەتتەر الۋ مۇمكىندىگىنە يە بولامىز. ەندى جەمقورلار اقشانى شەتەلدە جاسىرا المايدى», دەپ اتاپ ءوتتى احمەتجانوۆ.
ۆەدومستۆو باسشىسى سوزىنشە انتيكور قىزمەتىندە سىبايلاس جەمقورلىقتىڭ الدىن الۋ ءبىرىنشى ورىنعا شىعادى. ونىڭ ايتۋىنشا, 6 ايدا 180-نەن استام تالداۋ مەن مونيتورينگ جۇرگىزىلدى. ولار بويىنشا 2200-گە جۋىق ۇسىنىم مەن ۇسىنىس بەرىلدى.
اگەنتتىك توراعاسى مەملەكەتتىك ورگاندار ەنگىزىلگەن ۇسىنىستاردى ءاردايىم ورىنداي بەرمەيتىنىن دە اتاپ ءوتتى.
«وتكەن جىلدىڭ ءساۋىر ايىندا ءبىز ەنەرگەتيكا مينيسترلىگىنە وتىنىمدەردى قاراۋ جانە گاز كولەمىن ءبولۋ ءتارتىبىن وزگەرتۋ بويىنشا ۇسىنىس بىلدىردىك. وندا سىبايلاس جەمقورلىق نورمالارى كوپ بولدى. مينيسترلىك ەلەمەدى. ناتيجەسىندە قاراشا ايىندا نارىق سۋبەكتىلەرىنەن پارا العان باسقارما باسشىسى ن.امانگەلدى ۇلى ۇستالدى. وسىدان كەيىن عانا راسىمدەر وزگەرتىلدى», دەدى ۆەدومستۆو باسشىسى.
شەشىم رەتىندە اگەنتتىك مەملەكەتتىك باقىلاۋدىڭ جەكە سالاسى رەتىندە سىبايلاس جەمقورلىققا قارسى ءىس-قيمىل ماسەلەلەرىن ايقىنداۋ جولىمەن باقىلاۋدىڭ, باعالاۋدىڭ جانە ىقپال ەتۋدىڭ ءتيىمدى تەتىگىن قۇرۋدى ۇسىنادى.
«بۇل بىزگە قوسىمشا وكىلەتتىكتەر بەرمەيدى, بىراق مەملەكەتتىك اپپارات پەن ازاماتتاردى قىلمىستىق وربيتادان قورعاۋعا مۇمكىندىك بەرەدى», دەپ تۇيىندەدى ول.
