«اۋىل – ەل بەسىگى» ارنايى جوباسى بويىنشا 1,1 ميلليارد تەڭگە قاراستىرىلعان. ال وبلىس بيۋدجەتىنەن بولىنگەن 6,5 ميلليارد تەڭگە 218 جوبانى جۇزەگە اسىرۋعا جۇمسالادى.
«جارتى جىل ىشىندە كولىك ينفراقۇرىلىمىن رەتتەۋگە بولىنگەن قاراجاتتىڭ 5,3 ميلليارد تەڭگەسى يگەرىلدى. بۇل جىلدىق جوسپار 28%-عا ورىندالدى دەگەن ءسوز. وسى جىلدىڭ قورىتىندىسى بويىنشا, جاقسى جانە قاناعاتتانارلىق دەڭگەيدەگى وبلىستىق جانە اۋداندىق ماڭىزى بار جولداردىڭ ۇلەسى وتكەن جىلعىدان اسىپ, 78%-عا جەتەدى. بۇل كورسەتكىشتەن ءبىزدىڭ ءوڭىر ەل بويىنشا 9-شى ورىندا», دەپ ءتۇسىندىردى قوستاناي وبلىسى اكىمدىگىنىڭ جولاۋشىلار كولىگى جانە اۆتوموبيل جولدارى باسقارماسىنىڭ باسشىسى ولجاس نۇرعاليەۆ.
توبىل-تورعاي ايماعىنداعى اۆتوكولىك جولدارىنىڭ جالپى ۇزىندىعى 7 750 شاقىرىم, بۇل جونىندە ءوڭىر رەسپۋبليكادا ەكىنشى ورىندا تۇر.
ولجاس نۇرعاليەۆتىڭ ايتۋىنشا, قازىر وبلىستا «نۇرلى جول» باعدارلاماسى قارقىندى جۇزەگە اسىرىلۋدا. جوسپارلانعان 17 جوبانىڭ 15-ءى باستالىپ, ەكەۋىنە مەملەكەتتىك ساتىپ الۋ پورتالىندا كونكۋرس جاريالانعان. ال «اۋىل – ەل بەسىگى» باعدارلاماسى بويىنشا بيىل 50 جوبا قولعا الىنعان. قازىر 18 ۋچاسكەدە جوندەۋ جۇمىستارى باستالىپ كەتكەن, ال قالعان 32 جوباعا مەردىگەرلەر تاڭدالىپ جاتىر.
سونىمەن قاتار, جەرگىلىكتى بيۋدجەتتەن بولىنگەن قاراجات ەسەبىنەن 211 ۋچاسكەدە جوندەۋ جۇمىستارى باستالىنىپ, تاعى جەتى نىسانعا كونكۋرس جاريالانعان.
