باۋىر ەتى بالاسىنا اليمەنت تولەۋدەن باس تارتىپ, باس ساۋعالاپ جۇرگەن ونداعان بورىشكەر تابىلدى. شىن مانىندە ىزدەۋدە جۇرگەندەردىڭ سانى وتە كوپ. تاۋىپ الۋ دا وڭاي-وسپاق شارۋا ەمەس. بۇل ارادا ادامنىڭ جەكە ار-وجدانى عانا پارىزدى ورىنداۋعا تۇرتكى بولاتىن ءتارىزدى. قىمباتشىلىق قوس بۇيىردەن قىسىپ تۇرعان كەزدە جەتىمدى جاۋتاڭداتپاي, جان جىلۋىن توگۋ ادامشىلىقتىڭ بەلگىسى ەمەس پە؟!
– اتقارىلىپ جاتقان جۇمىس از ەمەس. 40-تان استام كوكەك اكەگە ايىپپۇل سالىندى, 45 بورىشكەر اكىمشىلىك جاۋاپكەرشىلىككە تارتىلىپ, قاماۋعا الىندى. جۇمىسپەن قامتۋ بولىمىمەن بىرلەسە جۇمىس ىستەۋدەمىز. بورىشكەرلەردى جۇمىسقا ورنالاستىرۋ ماقساتىندا بوس ورىندار جارمەڭكەسى تۇراقتى وتكىزىلىپ تۇرادى, – دەيدى جەكە سوت ورىنداۋشىسى قانات حافيزوۆ. – تاياۋدا عانا بىرنەشە ادامدى تۇراقتى جۇمىسقا ورنالاستىردىق.
سوت ورىنداۋشىسىنىڭ ايتۋىنا قاراعاندا, بورىشكەرلەردىڭ باسىم بولىگى تۇراقتى تابىس كوزىنىڭ جوقتىعىن جەلەۋ ەتەدى ەكەن. ايتسە دە جۇمىس ىستەۋگە ىنتالارىنىڭ بولماۋى ماسەلەنى تۇيىققا تىرەپ تۇر. كەيبىرەۋلەر ۋاقىتشا جۇمىس ىستەگەنىمەن, رەسمي تىركەلمەيدى. ونداعى ويلارى – تابىستارىن جاسىرۋ.
كۇنى بۇگىنگە دەيىن قولعا العان قات-قابات شارۋالاردىڭ ناتيجەسىندە جىل باسىنداعى 657 ملن تەڭگە قارىز 302 ملن تەڭگەگە قىسقارعان. بۇل ورايدا ۇگىت-ناسيحاتتان گورى ناقتى ءىس-قيمىل سەپتىگىن كوپ تيگىزۋدە. تىعىرىقتان شىعار جول ىزدەگەن سوت ورىنداۋشىلارى مەن جۇمىسپەن قامتۋ ورتالىقتارى ەلۋگە جۋىق بورىشكەردى تۇراقتى جۇمىسقا ورنالاستىرىپ, جالاقىلارىنان بالالارىنا تولەنۋگە ءتيىستى قاراجات ۇستالۋدا. وسىلاي بولا تۇرا, ماماندار سوڭعى جىلدارى اليمەنت تولەمەي جالتاراتىنداردىڭ سانى كوبەيىپ بارا جاتقاندىعىن ايتىپ الاڭداپ وتىر.
جىل باسىنان بەرى قالالىق, اۋداندىق بولىمدەرگە اليمەنتتەن جالتارۋشىلارعا ىزدەۋ سالۋ تۋرالى الپىستان استام قاۋلى ءتۇسىپتى. ىزدەستىرۋ ناتيجەسىندە ءۇش كۇننىڭ ىشىندە 12 ادامنىڭ تۇراقتى مەكەنجايى انىقتالعان. مامانداردىڭ ايتۋلارىنا قاراعاندا, قيىندىق كەيبىر بورىشكەرلەردىڭ ەل اۋماعىنان كوشىپ كەتكەندىگىندە بولىپ وتىر. ءتيىمدى ءادىس – بورىشكەرلەردىڭ جەكە كولىگىن ايىپپۇل تۇراعىنا قويۋ. اليمەنت تولەۋگە قاۋقارىمىز جوق دەپ انت سۋ ىشەتىندەر قىمبات كولىكتەرىنەن ايىرىلۋ قاۋپى تونگەنننەن كەيىن لەزدە قارىزدارىن وتەۋگە قاراجات تاباتىن كورىنەدى. جىل باسىنان بەرى بەرەشەك قارىزدارى 20 ملن تەڭگەدەن اسىپ كەتكەن 15 بورىشكەردىڭ «تەمىر تۇلپارى» الىپ قويىلعان سوڭ اليمەنت ءۇشىن تولەيتىن بەرەشەكتەرىن بىرەر كۇننىڭ ىشىندە تاۋىپ تولەگەن.
وسىعان قاراعاندا, كوكەك اكەلەرگە باۋىر ەتى بالانىڭ جاۋتاڭداعان جايىنان كولىكتىڭ قىمبات بولعانى عوي...
كوكشەتاۋ
