ۆەدومستۆونىڭ مالىمەتىنە سەنسەك, ساپار شەڭبەرىندە مينيستر يسپانيا كورولى فەليپە VI اۋدەنتسيادا بولىپ, يسپانيا سەناتىنىڭ توراعاسى پيلار يوپپەن كەزدەسۋ جانە يسپانيا كورولدىگىنىڭ سىرتقى ىستەر, ەۋروپالىق وداق جانە ىنتىماقتاستىق ءمينيسترى ارانچا گونسالەس لايامەن كەلىسسوز وتكىزدى. كورول فەليپە VI مەن كەزدەسۋدە تاراپتار ەكى ەل اراسىنداعى قاتىناستاردىڭ ستراتەگيالىق سيپاتىن راستادى.
نۇر-سۇلتان مەن مادريد اراسىنداعى ءوزارا ءتيىمدى ىنتىماقتاستىقتى ودان ءارى تەرەڭدەتۋدىڭ, ونىڭ ىشىندە جوعارى دەڭگەيدەگى ساياسي ديالوگتى نىعايتۋ تۇرعىسىنان پەرسپەكتيۆالار تۋرالى جان-جاقتى پىكىر الماستى. اتاپ ايتقاندا, كورول يسپانيانىڭ قازاقستانمەن ءوزارا ءىس-قيمىل دەڭگەيىن جوعارى باعالادى جانە تۇڭعىش پرەزيدەنت - ەلباسى نۇرسۇلتان نازارباەۆقا ونىڭ تۋعان كۇنىنە وراي جىلى قۇتتىقتاۋلارىن جەتكىزدى. يسپانيا ءسىم باسشىسى ارانچا گونسالەس لايامەن كەلىسسوز بارىسىندا ساياسي جانە ساۋدا-ينۆەستيتسيالىق سالالارداعى ەكىجاقتى ىنتىماقتاستىقتىڭ كەڭ اۋقىمدى ماسەلەلەرى تالقىلاندى.
مينيسترلەر سونداي-اق بۇۇ, ەقىۇ جانە ەۋروپا كەڭەسى سياقتى حالىقارالىق ۇيىمدار مەن ەۋروپالىق قۇرىلىمدار اياسىنداعى ءوزارا ءىس-قيمىلعا ەرەكشە نازار اۋدارا وتىرىپ, وزەكتى حالىقارالىق ماسەلەلەر بويىنشا «ساعات تەڭەستردى». قازاقستان مەن ەۋروپالىق وداق اراسىنداعى كەڭەيتىلگەن ارىپتەستىك پەن ىنتىماقتاستىق تۋرالى كەلىسىمدى ىسكە اسىرۋدىڭ ماڭىزى اتاپ ءوتىلدى.
سونداي-اق, كۇن تارتىبىندە ەكى ەلدىڭ COVID-19 پاندەمياسىنىڭ تارالۋى مەن سالدارىمەن كۇرەسۋ شارالارى تالقىلاندى. ازاماتتاردىڭ ءوزارا ساپارلارىن جەڭىلدەتۋ جانە تۋريستىك سالاداعى ىنتىماقتاستىقتى دامىتۋ ءۇشىن قازاقستان تاراپى ۆاكتسيناتسيانىڭ ۇلتتىق سەرتيفيكاتىن ءوزارا نەگىزدە تانۋ مۇمكىندىگىن قاراستىرۋدى ۇسىندى. سونىمەن قاتار, تاراپتاردىڭ قازاقستان مەن يسپانيا اراسىندا اۋە قاتىناسى تۋرالى كەلىسىم جاساسۋ جونىندەگى ودان ءارى جۇمىسقا مۇددەلىلىگى راستالدى.
كەلىسسوز قورىتىندىسى بويىنشا عىلىمي-تەحنيكالىق ىنتىماقتاستىق تۋرالى ۇكىمەتارالىق كەلىسىمگە, اۋىل شارۋاشىلىعى جانە قورشاعان ورتانى قورعاۋ سالاسىنداعى ءوزارا تۇسىنىستىك تۋرالى مەموراندۋمدارعا, سونداي-اق «KazAID» قازاقستاندىق حالىقارالىق دامۋ اگەنتتىگى مەن «AECID» يسپاندىق دامۋ ماقساتىنداعى حالىقارالىق ىنتىماقتاستىق اگەنتتىگى اراسىنداعى ىنتىماقتاستىق تۋرالى كەلىسىمگە قول قويىلدى.
يسپانيا سەناتىنىڭ توراعاسى پيلار يوپپەن پارلامەنتارالىق بايلانىستاردى نىعايتۋ جولدارى تالقىلاندى, ونىڭ ىشىندە جاڭادان قۇرىلاتىن قازاقستان-يسپان پارلامەنتارالىق ىنتىماقتاستىق توبىنىڭ جەلىسى بويىنشا.
ەكى ەل پارلامەنتتەرىنىڭ كوپجاقتى قۇرىلىمدار – پارلامەنتارالىق وداق, ەقىۇ جانە ەۋروپا كەڭەسى پارلامەنتتىك اسسامبلەيالارى جانە تاعى باسقالار اياسىنداعى ءوزارا ءىس-قيمىلىنا ەرەكشە كوڭىل ءبولىندى. سونىمەن قاتار, مينيستر م.تىلەۋبەردى جەتەكشى يسپان كومپانيالارىمەن «دوڭگەلەك ۇستەلگە» قاتىستى.
قازاقستان تاراپىمەن ينۆەستيتسيالىق جوبالار جانە ولاردى كولىك ينفراقۇرىلىمى, جاڭارتىلاتىن قۋات كوزدەرى, قورعانىس جانە اەروعارىش ونەركاسىبى, اگروونەركاسىپتىك كومپلەكس, فارماتسەۆتيكا, ماشينا جاساۋ, مەتاللۋرگيا جانە باسقا سالالاردا ىسكە اسىرۋ مۇمكىندىكتەرى ۇسىنىلدى. ءىس-شاراعا 20-دان استام ءىرى يسپاندىق كومپانيالاردىڭ باسشىلارى قاتىستى. م.تىلەۋبەردى سونداي-اق يسپانيانىڭ بۇرىنعى پرەمەر-ءمينيسترى حوسە لۋيس ساپاتەرومەن كەزدەسۋ وتكىزىپ, «Airbus» كومپانياسىنىڭ وندىرىستىك الاڭى مەن حالىقارالىق ترەنينگ ورتالىعىنا باردى.
يسپانيا قازاقستاننىڭ ءىرى ساۋدا سەرىكتەستەرىنىڭ وندىعىنا كىرەدى. پاندەمياعا قاراماستان, 2020 جىلى قازاقستان مەن يسپانيا اراسىنداعى تاۋار اينالىمىنىڭ كولەمى 1,4 ملرد اقش دوللارىن قۇرادى, ال بيىل قاڭتار-مامىردا تاۋار اينالىمى 80%-دان استامعا ءوسىپ, 842 ملن اقش دوللارىن (نەگىزىنەن قازاقستاندىق ەكسپورت ەسەبىنەن) قۇردى.
2005-2020 جىلدار كەزەڭىندە يسپانيادان قازاقستانعا تىكەلەي ينۆەستيتسيالار كولەمى 245 ملن. اقش دوللارىن قۇرادى.
