تۋ ۇستاۋشىلاردى قازاقستان ۇلتتىق وليمپيادا كوميتەتىنىڭ اتلەتتەر كوميسسياسى ۇسىنعان.
«تاريحي توكيو وليمپياداسىنىڭ باستالۋىنا ءبىر ايدان از ۋاقىت قالدى. ساعىنا كۇتكەن وليمپيادا ويىندارى وتەدى جانە دە وعان قازاقستان ماقتانىشپەن ءوزىنىڭ ەڭ ۇزدىك سپورتشىلارىن اتتاندىرادى. ەڭ لايىقتىلارى ىرىكتەلدى. مەن ولگا رىپاكوۆانىڭ وليمپيادانىڭ اشىلۋ سالتاناتىندا قازاقستان تۋىن الىپ شىعاتىنىنا قۋانىشتىمىن. سەبەبى, ولگانىڭ ارقاسىندا كوك بايراعىمىز وليمپيادا كوگىندە ءبىر ەمەس, بىرنەشە رەت جەلبىرەدى. قامشىبەك قوڭقاباەۆ – قازاقستاندىق سپورتتىڭ كۇشى مەن شەبەرلىگىنىڭ ۇلگىسى, وليمپيادا شارشى الاڭىندا زور جاۋاپكەرشىلىككە يە بولعان بوكس قۇراماسىنىڭ كاپيتانى. ەكى سپورتشى دا قاتارلاستارىنىڭ الدى, قۇرامانىڭ كوشباسشىلارى جانە جاس بۋىنعا ۇلگى. قوس اتلەتكە جانە بارلىق وليمپيادالىق قۇرامعا ساتتىلىك تىلەيمىن», دەدى قازاقستان ۇوك باسشىسى تيمۋر ق ۇلىباەۆ.
ولگا رىپاكوۆا ءۇشىن توكيوداعى جارىس ونىڭ سپورت مانسابىنداعى ءتورتىنشى وليمپيادا بولماق. ول ءۇش قارعىپ سەكىرۋ بويىنشا 2008 جىلى بەيجىڭ وليمپياداسىندا كۇمىس, 2012 جىلى لوندوندا التىن جانە 2016 جىلى ريودا قولا مەدال جەڭىپ الدى. بۇدان بولەك, ولگانىڭ ەنشىسىندە ۋنيۆەرسيادا «التىنى» جانە ازيا ويىندارىنىڭ 6 التىن مەدالى بار. سونداي-اق, ول الەم چەمپيونى جانە 2010 جىلعى قۇرلىقتىق كۋبوگتىڭ يەگەرى.
«وليمپيادا ويىندارىنداعى قازاقستانعا تيەسىلى 16 «التىنىنىڭ» ۇشەۋىن ايەلدەر جەڭىپ الدى. جىلدان-جىلعا سپورتتاعى ايەلدەر سانى ارتىپ, ولار جاڭا رەكوردتار ورناتادى دەپ سەنەمىن. وليمپيادا ويىندارىنىڭ اشىلۋ سالتاناتىندا ەلىمىزدىڭ تۋى سەنىپ تاپسىرىلعانى كەرەمەت اسەر, سەزىمگە بولەيدى. ءدال وسى ميسسيانىڭ ماعان ۇسىنىلعانىنا جانە سەنىپ تاپسىرىلعانىنا قۋانىشتىمىن», دەيدى ولگا رىپاكوۆا.
قامشىبەك قوڭقاباەۆ - بوكستان قازاقستان ەرلەر ۇلتتىق قۇراماسىنىڭ كاپيتانى. ول 2014 جىلى اسكەريلەر اراسىندا وتكەن الەم چەمپيوناتىنىڭ جەڭىمپازى. ازيا چەمپيوناتىنىڭ ەكى دۇركىن جەڭىمپازى جانە 2017 مەن 2019 جىلعى الەم چەمپيوناتتارىنىڭ كۇمىس جۇلدەگەرى. توكيو وليمپياداسى 29 جاستاعى قىزىلوردالىق سپورتشى ءۇشىن العاشقى وليمپيادا ويىندارى بولماق.
«توكيوداعى وليمپيادا ويىندارىنىڭ اشىلۋ سالتاناتىندا تۋدى ۇستاپ شىعۋدى ماعان سەنىپ تاپسىرعانى ءۇشىن قازاقستان مەن ەلىمىزدىڭ سپورت قوعامىنا العىس بىلدىرگىم كەلەدى. بۇل مەن ءۇشىن ۇلكەن جاۋاپكەرشىلىك جانە ۇلكەن مارتەبە», دەدى قامشىبەك قوڭقاباەۆ.
وليمپيادا ويىندارىنىڭ اشىلۋ سالتاناتى 23 ماۋسىمدا توكيو وليمپيادا ستاديونىندا وتەدى.
