ايگىلى شەبەردىڭ قولتاڭباسىنان شىققان مۇسىندىك كومپوزيتسيالارسىز جانىمىزعا جاقىن قالالاردىڭ اسەم اسپەتىن ەلەستەتۋ مۇمكىن ەمەس. ول جاساعان تۋىندىلار الماتى مەن نۇر-سۇلتان شاھارىنىڭ, بالقاش پەن تالعاردىڭ, ءۇشارال مەن ارقالىقتىڭ, جاركەنت پەن ەسىكتىڭ ەڭ كورنەكى جەرلەرىندە ءسان تۇزەگەن. كوشەلەر مەن الاڭدار, ساياباقتار مەن اللەيالار, جاياۋ جۇرگىنشىلەر مەن سەرۋەندەۋ ايماقتارىن بەزەندىرگەندە شەبەر قالالىق كەڭىستىكتىڭ ءسانىن كەلتىرىپ, ءوزىنىڭ باتىل يدەيالارىن جۇزەگە اسىرا بىلەدى. ەڭ باستىسى, ءاربىر تۋىندىسى سول ايماقتىڭ ەرەكشەلىگىنە ساي بەدەرلەنگەن.
ء«ار ايماقتان, ءار قالادان شابىت الامىن. سول مەكەنگە ءتان داستۇرلەردى دارىپتەي وتىرىپ, تۇسىنىكتى, تابيعي جانە تولىقتاي زاماناۋي بەينەلەر جاساۋعا كۇش جىگەرىمدى جۇمسايمىن. شىعارماشىلىق نىساناما اينالعان جاندى دا جانسىز وبرازداردى تاستان, مەتالدان, اعاشتان نەمەسە ءارتۇرلى ماتەريالداردىڭ جيىنتىعىنان جاسايمىن»,– دەيدى پاۆەل شوروحوۆ.
ءمۇسىنشىنىڭ قىزىعۋشىلىق سالاسى دا الۋان ءتۇرلى. شوروحوۆ شىعارمالارىندا ەجەلگى يكار, قازاق دالاسىنىڭ داڭقتى باتىرلارى, بي مەن مۋزىكانىڭ سينتەزى, ايەلدەردىڭ كەربەزدىگى, انا مەن بالا تاقىرىپتارىنىڭ شوقتىعى بيىك. اسىرەسە انيماليستىك جانر ونىڭ جانىنا بارىنشا جاقىن. فاۋنا الەمىنىڭ بايلىعى مەن الۋان تۇرلىلىگىن بەينەلەيتىن مۇسىندەر سانى بويىنشا كەيىپكەرىمىزگە تەڭ كەلەر ءمۇسىنشى از.
– پاۆەل شوروحوۆ اعاش, مەتالل نەمەسە تاس بولسىن, كەز-كەلگەن ماتەريالدى باعىندىرا بىلەدى. ەڭ ەرتەرەكتەگى مۇسىندىك كومپوزيتسيالارىنا – «بالالىق شاق», «تازشا بالا», «قوقيقاز» جانە «ويناپ جۇرگەن بالالار» سەكىلدى شىعارمالارى جاتادى. «شارىقتاۋ كەزىندە», «اتا-انا قامقورلىعى», «بالالار شىعارماشىلىعى», «شەرۋ» كومپوزيتسيالارى, «كاسىپكەر», «قۇيۋشى», «پوشتاشى» جانە «ۇلۋ» تۋىندىلارى, «جابايى مىسىق», «بۇركىتشى», «قاناتتى بارىس» سەكىلدى ەڭبەكتەرى جۇرتشىلىققا جاقسى تانىس. ولار الماتى مەن نۇر-سۇلتانداعى ونەر وشاقتارى مەن دەمالىس ساياباقتارىنا كورىك بەرىپ تۇر. شەبەردىڭ شىعارماشىلىق اۋقىمى ايتارلىقتاي كەڭ. ستانوكتىك مۇسىندەر مەن بەدەرلى پورترەتتەر, مەموريالدى تاقتالار, قابىر ۇستىندەگى ەسكەرتكىشتەر شەبەردىڭ ۇزاق جىلداردان بەرگى تاباندى ەڭبەگى. ول ەلگە بەلگىلى تۇلعالار يسا بايزاقوۆ, باۋىرجان مومىش ۇلى, دىنمۇحاممەد قوناەۆ, تاراس شەۆچەنكو, قانىش ساتپاەۆ, مۇحتار اۋەزوۆ, جامبىل, اباي, پۋشكيندەردىڭ ءمۇسىنىن كەيىپتەدى. قازىرگى تاڭدا ءمۇسىنشى الماتىداعى تەمىرجول ۆوكزالى مەن نۇر-سۇلتان قالاسىنداعى بالەت تەاترىنىڭ ورتالىق قاسبەتىن بەزەندىرۋدى جالعاستىرۋدا. ۇنەمى ىزدەنىستە جۇرەتىن ونەر يەسىنىڭ شىعارماشىلىعىنا ارنالعان كورمە تىڭ تۋىندىلارمەن تولىققان, – دەيدى كورمە جەتەكشىسى وكسانا تانسكايا.
كورمەنى ارنايى بارىپ تاماشالاۋدىڭ ءساتى ءتۇستى. پاۆەل شوروحوۆ قورشاعان الەمگە تاڭدانىپ, ونداعى ەڭ ادەمى قۇبىلىستاردى كوڭىلىنە قوندىرىپ, ولاردى مەتالدا, تاستا, اعاشتا كەيىپتەۋ ارقىلى ۋاقىتتى توقتاتىپ قويادى. بۇل مۇسىندىك پىشىندەردىڭ ارقايسىسى – ەڭ كىشىسىنەن ىرىسىنە دەيىن ۇزدىك كوركەمدىك داستۇرلەر مەن شىنايى شەبەرلىكتىڭ جەمىسى.
الماتى
