ەكپىندى دامۋ ديناميكاسىنىڭ ارقاسىندا قازاقستان وزا دامىعان وزگە مەملەكەتتەردىڭ ءىرى ترانسۇلتتىق كورپوراتسيالارىنىڭ نازارىنا ىلىگىپ, ولارمەن دە تىعىز بايلانىس ورناتىپ كەلەدى. سەبەبى ءبىزدىڭ ەلىمىز ورتالىق ازياداعى گەوگرافيالىق سيپاتى بويىنشا ەڭ اۋقىمدى مەملەكەت قانا ەمەس, ەكونوميكالىق الەۋەتى تۇرعىسىنان دا كوشباسشىلىق تىزگىنىنە يە. سونداي-اق ەلىمىزدىڭ بولاشاقتاعى دامۋ مۇمكىندىكتەرىنىڭ مول ەكەنىن دە ەستەن شىعارماعان ءجون.
بۇگىنگى كۇنى ءبىزدىڭ ديپلوماتيالىق ساياساتتاعى باسىمدىعىمىز ءبىرىنشى كەزەكتە رەسەي, قىتاي, اقش, ەۋروپا وداعى جانە ورتا ازيا ايماعىنداعى وزبەكستان, قىرعىزستان, تاجىكستان, تۇرىكمەنستان مەملەكەتتەرىمەن, سول سياقتى ازەربايجان, تۇركيا جانە كۇللى يسلام الەمىمەن ەكونوميكالىق قارىم-قاتىناستاردى بارىنشا دامىتۋ جانە تۇركىتىلدەس مەملەكەتتەر ىنتىماقتاستىق كەڭەسىنىڭ اياسىندا تۇركى الەمىمەن مادەني بايلانىستارىمىزدى نىعايتا ءتۇسۋ بولىپ وتىر.
بۇل ورايدا نازاردا بولاتىن باستى نىسانا مىناۋ: ءبىز قانداي دا ءبىر ەكونوميكالىق, ساياسي نەمەسە مادەني بايلانىستاردى كۇشەيتۋگە تىرىسقاندا بىرەۋلەرگە قاۋىپ ءتوندىرۋ نەمەسە قايسىبىرەۋلەردى قورقىتۋ-ۇركىتۋ ءۇشىن ەمەس, كەرىسىنشە ەشكىمنەن قورىقپاس ءۇشىن جانە كۇللى الەممەن تاتۋ-ءتاتتى قارىم-قاتىناس جاساپ, قولدان كەلگەن شارالاردىڭ ءبارىن دە بەيبىت جاعدايدا, ياعني ديپلوماتيالىق جولمەن ىسكە اسىرۋدى كوزدەيمىز.
2001-2002 جىلدارى ۇلىبريتانيادا, يرلانديا رەسپۋبليكاسىندا جانە نورۆەگيا كورولدىگىندە توتەنشە جانە وكىلەتتى ەلشى بولعان كاسىبي مامان رەتىندە ەلىمىزدىڭ ديپلوماتتارىن قازاقستاننىڭ ديپلوماتيالىق قىزمەتى كۇنىمەن قۇتتىقتاي وتىرىپ, ويلارىندا ءجۇرسىن دەگەن نيەتپەن بىرەر ۇسىنىس ايتقىم كەلەدى.
بىرىنشىدەن, ءبىزدىڭ ەلشىلەرىمىز ءبىرىنشى كەزەكتە ەكونوميكالىق ديپلوماتياعا ەڭ ۇلكەن باسىمدىق بەرگەنى ابزال. ناقتىراق ايتقاندا, ەكسپورتقا نە شىعارا الاتىنىمىزدى, شەتەلدىك ترانسۇلتتىق كورپوراتسيالار ءبىزدىڭ ەكونوميكامىزدىڭ قاي سالاسىنا ينۆەستيتسيا سالسا, ەكى جاقتىڭ دا ۇتاتىنىن جاتپاي- تۇرماي دارىپتەۋى كەرەك.
ەكىنشىدەن, ءبىزدىڭ شەت مەملەكەتتەردە قىزمەت اتقارىپ جۇرگەن ديپلوماتتارىمىز بەن كونسۋلدارىمىز سول ەلدەردەن ءومىردىڭ بارلىق سالاسى بويىنشا, اتاپ ايتار بولساق, ەكونوميكا سالاسىنان, الەۋمەتتىك سالادان, بيزنەس سالاسىنان, بانك جانە قارجى جۇيەسىنەن, وزىق مادەنيەتىنەن, وزىق ءبىلىم سالاسىنان, عىلىم مەن تەحنولوگيالاردى وندىرىسكە ەنگىزۋ تاجىريبەسىنەن, شاعىن نەمەسە ورتا بيزنەستىڭ مايىن ىشكەن كوشباسشىلارىنان, دەنساۋلىق جانە سپورت سالاسىنان نە ۇيرەنۋگە بولادى, نەدەن جيرەنۋگە بولادى دەگەن سياقتى دۇنيەلەردى دارىپتەۋلەرى كەرەك.
ول ءۇشىن تەك ەلشىلەر عانا ەمەس, ەلشىلىكتەگى ديپلوماتتار دا, كونسۋلدار دا جوعارىدا اتالعان سالالاردى زەرتتەپ-زەردەلەپ, تەرەڭ مازمۇندى اناليتيكالىق ماقالالار مەن ەسسەلەر جازىپ, ولاردى ۇزبەي رەسپۋبليكالىق بۇقارالىق اقپارات قۇرالدارىندا جاريالاپ تۇرۋى كەرەك.
ءادىل احمەتوۆ,
ەلشى-ديپلومات, قازاقستاننىڭ ەڭبەك سىڭىرگەن قايراتكەرى, حالىقارالىق جوعارى مەكتەپ عىلىم اكادەمياسىنىڭ اكادەميگى
