ەلباسى كىتاپحاناسىنىڭ «تاۋەلسىزدىكتىڭ مادەني كودى» جوباسى اياسىندا ءوتىپ جاتقان كورمە استانا كۇنىنە ارنالعان.
ۆلاديمير گۆوزدەۆ 1960 جىلى سۆەردلوۆ وبلىسىندا دۇنيەگە كەلگەن, ءۇش جاسىندا ونىڭ وتباسى الماتىعا قونىس اۋدارعان. 1993 جىلى قازاق ۇلتتىق ونەر اكادەمياسىن بىتىرگەن.
سۋرەتشىنىڭ اكەسى, ايگىلى سۋرەتشى اندرەي گۆوزدەۆ اۆتورعا كەسكىندەمەگە دەگەن سۇيىسپەنشىلىكتى وياتىپ, ءبىلىم بەرەدى ءارى وسى الەمدى وزىنشە كورۋدى ۇيرەتەدى. بىراق سۋرەتشىگە ءوزىنىڭ بەينەلەۋ ءتىلىن, وزىندىك ءستيلىن تابۋعا قازاق حالىق شىعارماشىلىعى كومەكتەسكەن. سوندىقتان ۆلاديمير گۆوزدەۆ وزىنە لاقاپ ەسىم رەتىندە ورىس تىلىنە اۋدارعاندا «گۆوزد» دەگەن ماعىنانى بەرەتىن قازاقشا «شەگە» دەگەن ءسوزدى تاڭداپ العان.
شەگەنىڭ شىعارماشىلىعى قازاق مادەنيەتىمەن, سالت-داستۇرىمەن تىعىز بايلانىستى. سۋرەتشى ءوزى ويلاپ تاپقان «ەتنوسيمۆوليزم» ستيلىندە جۇمىس ىستەيدى.
كوپتەگەن جىلدار بۇرىن كىلەم كاسىبىمەن اينالىسقان كورمە اۆتورى ءداستۇرلى قولمەن توقىلعان كىلەم توقۋ ونەرىمەن تانىسىپ, كونە سيمۆولداردىڭ بايلىعى مەن تەرەڭ ماعىناسىنا تاڭدانعان. شەبەر كىلەمدەردى «وقي الاتىن» بولعان.
ەجەلگى قازاقتاردىڭ تاريحىن, كىلەم توقۋدىڭ ويۋ-ورنەگىن, پەتروگليفتەردىڭ ەلەمەنتتەرىن زەردەلەي وتىرىپ, كوشپەندىلەردە سيمۆولدىق جۇيەنىڭ دامىعانىن انىقتادى: جىلان – دانالىق, بۇركىت – ەركىندىك, تاۋەلسىزدىك, اعاش – ءومىر بەلگىسى. قازاقتىڭ ەجەلگى تاڭبالىق جۇيەسى شەبەر كەسكىندەمەسىنىڭ نەگىزىنە اينالدى. سۋرەتشىنىڭ جۇمىستارى ەجەلگى قولونەرشىلەر كىلەمگە سالعان اقپاراتپەن ۇقساس. ونەرتانۋشىلاردىڭ پىكىرىنشە, شەگەنىڭ تۋىندىلارى – ۇلى دالا مادەني نەگىزى بەلگىلەنگەن بارلىق تىلدەردە قولجەتىمدى ءماتىن.
اۆتوردىڭ كەسكىندەمەسى – بۇل مايلى بوياۋمەن سالىنعان ءداستۇرلى قازاقى كىلەمدەر, كورپەشەلەر, جاستىقتار. مۇنداي ءادىس «كەنەپكە مايلى بوياۋمەن توقىلعانداي» دەپ ايتىلادى. نەگىزىنەن كورمەنىڭ اۆتورى قىلقالاممەن ەمەس, ماستيحينمەن جۇمىس ىستەيدى.
ۆ.گۆوزدەۆتىڭ جۇمىستارى, قازاقستان, گەرمانيا, رەسەي, اۆستراليا, اقش, اۆستريا, ۇلىبريتانيا, شۆەيتساريا, گوللانديا, دانيا, فرانتسيا, ۆەنگريا, پولشا, تۇركيا, گرۋزياداعى گالەرەيالاردا جانە جەكە كوللەكتسيالاردا ساقتاۋلى.
