– قازاقستان تاۋەلسىزدىگىنىڭ 30 جىلىندا ەلىمىزدە وراسان جۇمىستار ىسكە اسىرىلىپ, الەۋمەتتىك-ەكونوميكالىق دامۋىمىز ەسەلەندى. بۇل رەتتە قازاقستان حالقى اسسامبلەياسى مەن قازاقستان حالقى نۇر-سۇلتان قالالىق اسسامبلەياسىنىڭ ۇلەسى ەلەۋلى ەكەنىن زور ىلتيپاتپەن ايتامىز. جالپى ايتقاندا, ەلىمىزدەگى تۇراقتىلىقتىڭ ورنىعۋىنا, ىنتىماق, بىرلىك پەن بەرەكەنىڭ نىعايۋىنا قازاقستاننىڭ تۇڭعىش پرەزيدەنتى – ەلباسى نۇرسۇلتان نازارباەۆتىڭ سىڭىرگەن ەڭبەگى ۇشان-تەڭىز. وسى وزىق دامۋ جولىنىڭ ساباقتاستىعىن ءساتتى جالعاستىرىپ كەلە جاتقان مەملەكەت باسشىسى قاسىم-جومارت توقاەۆتىڭ دا وراسان ۇلەسىن لايىقتى اتاپ وتكەن ءجون, – دەدى نۇر-سۇلتان قالاسىنىڭ اكىمى, قالالىق اسسامبلەيانىڭ توراعاسى التاي كولگىنوۆ.
قازاقستان حالقى اسسامبلەياسى توراعاسىنىڭ ورىنباسارى مارات ءازىلحانوۆ جيىنعا قاتىسۋشىلارعا يگى لەبىزىن جەتكىزىپ, ورتاق ماقساتتى كوزدەگەن ىستەر تۋرالى باياندادى.
– ءبىز نۇر-سۇلتان قالاسىنىڭ ەتنومادەني بىرلەستىكتەرىنىڭ جەتەكشىلەرىمەن ءاردايىم ەرەكشە ىقىلاسپەن جۇزدەسىپ كەلەمىز. سىزدەر وڭىرلەرگە ۇلگى بولاتىنداي قوعامدىق كەلىسىم مەن بىرلىكتى كۇشەيتۋ ماقساتىندا قىزمەت ەتىپ كەلەسىزدەر. وزدەرىڭىزگە ءمالىم, قازاقستاننىڭ تۇڭعىش پرەزيدەنتى – ەلباسى نۇرسۇلتان نازارباەۆتىڭ تاپسىرماسىمەن قازاقستان حالقى وڭىرلىك اسسامبلەيالارى ءۇشىن ۇلگىلىك مودەل رەتىندە نۇر-سۇلتان قالاسىنىڭ اسسامبلەياسىن 2025 جىلعا دەيىن دامىتۋ باعدارلاماسى بەكىتىلىپ, ىسكە اسىرىلۋدا. بۇگىنگى باسقوسۋ استانامىزداعى قىزمەتىمىزدىڭ بۇدان ءارى دامۋىنىڭ مەيلىنشە وزەكتى ماسەلەلەرىنە ارنالادى, – دەدى مارات ءازىلحانوۆ.
سەسسيا جۇمىسىنىڭ بارىسىندا نۇر-سۇلتان قالاسى ەتنومادەني بىرلەستىكتەرىنىڭ وكىلدەرى ءوز قىزمەتتەرىنە قاتىستى اتقارىلعان جۇمىستاردى باياندادى. سونىمەن قاتار قازاقستان حالقى نۇر-سۇلتان قالالىق اسسامبلەياسى XIX سەسسياسىنىڭ ۇندەۋى جاريالاندى.
