باس قولباسشىلار مەن قولباسشىلار بارىنشا جەكە قۇرام جۇمىلدىرىلعان ماماندىق بويىنشا دايارلىق بارىسىن باياندادى. جاۋىنگەرلىك وقۋدىڭ بۇل كەزەڭىنىڭ قورىتىندىسى الداعى اپتاداعى باقىلاۋ ساباقتارىنىڭ ناتيجەلەرىنە قاراي شىعارىلاتىن بولادى.
اسكەري وقۋ ورىندارىن ءبىتىرۋ راسىمدەرىنە بايلانىستى, شىلدەدە جاس وفيتسەرلەر مەن سەرجانتتار اسكەرلەردە قىزمەت اتقارۋعا بارادى. قولباسشىلارعا ولاردىڭ قىزمەتتىك مىندەتتەرگە بەيىمدەلۋىن, لاۋازىمدى قابىلداۋىن, سونداي-اق الەۋمەتتىك ماسەلەلەردى شەشۋدى قاراستىرۋىن قامتاماسىز ەتۋگە نۇسقاۋ بەرىلدى.
قارۋلى كۇشتەردەگى COVID-19-عا ۇجىمدىق يممۋنيتەت قالىپتاسقانىن ەسكەرە وتىرىپ, جاۋىنگەرىلىك دايارلىق شارالارى تولىق دەڭگەيدە وتكىزىلۋى ءتيىس. باس اسكەري-مەديتسينالىق باسقارماسىنىڭ باستىعى جەكە قۇرامنىڭ 82 پايىزى ەكپەنىڭ ەكى كومپونەنتىن العانىن باياندادى. سونىمەن قاتار, الەۋمەتتىك قاشىقتىق پەن بەتپەردە رەجيمىن ساقتاۋ وزەكتى كۇيىندە قالىپ وتىر.
بۇدان وزگە دە, قورعانىس ءمينيسترى ەلدەگى سانيتارلىق-ەپيدەميولوگيالىق شارالاردى كۇشەيتۋگە بايلانىستى وڭىرلەردەگى اكىمشىلىكتەرمەن الدىن الۋ شارالارىنا قارۋلى كۇشتەردى قاتىستىرۋ ماسەلەسىن قاراۋدى تاپسىردى. اتاپ وتسەك, وبەكتىلەردى دەزينفەكتسيالاۋ, اسكەري-دالالىق گوسپيتالدەردى اشۋ, ازاماتتارعا كومەك كورسەتۋ ءۇشىن مەديتسينا توپتارىن قۇرۋ.
«ارميا مەملەكەت اتقارىپ جاتقان شارالاردان تىس قالماۋى كەرەك», دەپ اتاپ ءوتتى گەنەرال-لەيتەنانت نۇرلان ەرمەكباەۆ.
مينيستر قاتىسقان ماسكەۋدەگى IX حالىقارالىق قاۋىپسىزدىك جونىندەگى كونفەرەنتسيانىڭ قورىتىندىسىن ەسكەرىپ, ۇلتتىق قورعانىس ۋنيۆەرسيتەتى مەن باس اسكەري-مەديتسينالىق باسقارماسىمەن بىرىگىپ اسكەري مەديتسينانى تاجىريبەدە قولدانۋ شەڭبەرىندە عىلىمي زەرتتەۋلەر جۇرگىزۋدى تاپسىردى. ولار وتاندىق جانە شەتەلدىك تاجىريبەگە جۇگىنە وتىرىپ, ەمدەۋ باعىتىن عانا ەمەس, سونداي-اق مەديتسينالىق قىزمەتتىڭ كۇشتەرى مەن قۇرالدارىن ەشەلونداپ ورنالاستىرۋ, لوگيستيكا, جاۋىنگەرلىك ازىرلىككە كەلتىرۋگە قاجەتتى مەرزىمدەر, مەديتسينالىق پەرسونالمەن جاساقتاۋ جانە ەرەكشە جاعدايدا قوسىمشا مەديتسينالىق مەكەمەلەردى جابدىقتاۋ سياقتى اسكەري قىرلارىن دا نەگىزگە الىپ, ەسكەرۋلەرى قاجەت.
قورعانىس ۆەدومستۆوسىندا قارجى ءتارتىبىنىڭ ماسەلەلەرى دە قارالدى. وتكەن 5 ايعا جۇرگىزىلگەن مونيتورينگ پەن قىزمەتتىك تالداۋدىڭ ناتيجەسىنە كەلسەك, وبەكتيۆتى جانە سۋبەكتيۆتى سەبەپتەرگە وراي بيۋدجەت قاراجاتىن ۋاقىتىلى يگەرمەۋ جاعدايى ورىن العان. مينيستر مەملەكەتتىك ساتىپ الۋدى زاڭعا سايكەس ۇنەمى باقىلاۋدا ۇستاۋدى, اسكەرگە بولىنگەن قاراجاتتى ماقساتقا ساي ۋاقىتىلى يگەرۋدى, ال بۇزۋشىلىقتار ورىن العان جاعدايدا – كىنالى تۇلعالاردى جاۋاپكەرشىلىككە تارتۋدى تاپسىردى.
قورعانىس ۆەدومستۆوسىنىڭ باسشىسى قارۋلى كۇشتەر ارداگەرلەرىنىڭ جۇيەلى جۇمىسىنا نازار اۋداردى. اسكەردىڭ مۇددەسى ءۇشىن وسى قىزمەتتە مول تاجىريبەسى بار بۇرىنعى اسكەري قىزمەتشىلەردى كوپتەگەن سالالارعا تارتۋ قاجەت. بۇل اسكەري-پاتريوتتىق تاربيە, قولدانىستاعى زاڭدى جەتىلدىرۋ, سونداي-اق قارۋلى كۇشتەردىڭ كەيبىر باعىتتارىن دامىتۋ بولىپ تابىلادى. تاربيە جانە يدەولوگيالىق جۇمىستار دەپارتامەنتىنە «قارۋلى كۇشتەردىڭ ارداگەرلەرى» رەسپۋبليكالىق قوعامدىق بىرلەستىگىنىڭ جۇمىسىن جانداندىرۋ تاپسىرىلدى.
اسكەري قىزمەتشىلەر اسكەري كيىم كيىپ, مەملەكەتتى كوپشىلىك الدىندا سىنعا الىپ جۇرگەن, جاۋىنگەرلىك ءمۋنديردىڭ ابىرويىنا نۇقسان كەلتىرەتىن بۇرىنعى ارىپتەستەرىن تالقىلادى. اسكەري ىسكە ۇيرەتكەن, ءبىر كەزدەرى ەلگە ادال بولۋعا انت بەرگەن مەملەكەتتى سىنعا الۋدا.
اتالمىش وتىرىستا اسكەردى قايتا جاراقتاندىرۋ ءىس-قيمىلى باياندالدى. بۇگىندە اۋە شابۋىلىنا قارسى قورعانىس قۇرالدارى باستى نازاردا. 2019-2020 جىلدارى قازاقستان اسكەرىنىڭ قارۋلانۋىنا رەسەيدىڭ «بۋك» زەنيتتىك-زىمىران كەشەندەرى, بەلورۋسسيانىڭ «روسا» راديولوكاتسيالىق ستانتسيالارى, سونداي-اق ەلىمىزدىڭ اۋە شەپتەرىن قورعاۋىندا تۇرعان وتاندىق «نۇر» رلس جەتكىزىلدى.
جۋىردا زاماناۋي «تور-م2ك» زەنيتتىك-زىمىران كەشەندەرىن جەتكىزۋ جوسپارلانۋدا. «تور-م2ك» كەز-كەلگەن ۇلگىدەگى ۇشاقتار مەن تىكۇشاقتاردى, سونىڭ ىشىندە «كورىنبەيتىن» تەحنولوگيامەن جاسالعان تىكۇشاقتاردى عانا ەمەس, سونىمەن قاتار ۇشقىشسىز ۇشۋ اپپاراتتارىن, جوعارى دالدىكتەگى قارۋدى, سونىڭ ىشىندە راديولوكاتسياعا قارسى جانە قاناتتى زىمىرانداردى, باسقارىلاتىن اۆياتسيالىق بومبالاردى انىقتاپ, جويۋعا قابىلەتتى.
قازىرگى ۋاقىتتا ۋاكىلەتتى ورگان (يندۋستريا جانە ينفراقۇرىلىمدىق دامۋ مينيسترلىگى) جەتكىزۋشىمەن شارتتار جاساسۋدا. قورعانىس مينيسترلىگى اتالعان كەشەندى ازىرلەگەن زاۋىتتا وتاندىق اشقق اسكەرلەرىنىڭ ماماندارىن وقىتۋدى جوسپارلاپ وتىر.
