«اقتوبە وبلىسى ايتەكە بي اۋدانىنىڭ باسقۇدىق, جاباساق, سارات, اقتاستى, اقكول جانە قۇمكۇدىق اۋىلدىق وكرۋگتەرىنىڭ اۋماعىندا شەگىرتكەنىڭ يتاليالىق پرۋس تۇرىمەن كۇرەس بويىنشا فيتوسانيتاريالىق قورعاۋ شارالارى جالعاسۋدا. بۇل جۇمىستارعا 9 بىرلىك تەحنيكا, ونىڭ ىشىندە ەكى گاز گەنەراتورى, ءبىر ۇشاق جانە 6 جەرۇستى بۇرىككىشتەرى جۇمىلدىرىلدى. وڭدەۋ ۋاقتىلى, عىلىمي نەگىزدەلگەن مەرزىمدە باستالدى», دەدى قر اۋىل شارۋاشىلىعى مينيسترلىگىنىڭ اگروونەركاسىپ كەشەنىندەگى مەملەكەتتىك ينسپەكتسيا كوميتەتىنەن.
ماماندار حيميالىق وڭدەۋدىڭ ماكسيمالدى تيىمدىلىگىن قامتاماسىز ەتۋ ءۇشىن شەگىرتكەلەر بەلسەندى ەمەس كۇيدە بولعان كەزدە كەشكى جانە تاڭەرتەڭگى ۋاقىتتا جۇرگىزىلەتىنىن ايتادى.
سونداي-اق, كوميتەت ينسەكتيتسيدتەردىڭ بارلىق قاجەتتى كولەمى ايماققا ۋاقتىلى جەتكىزىلگەنىن, حيميالىق وڭدەۋ قىزمەتتەرىن اتقاراتىندارمەن الدىن الا كەلىسىمشارتتار جاسالعانىن اتاپ ءوتتى. ايتەكە بي اۋدانىنىڭ اۋماعىندا «ەنجيو», «لوكۋستين», «زەلەنىي بارەر», «گرينگولد», «ۆانتەكس» جانە «تسيپروفەن»پرەپاراتتارىمەن وڭدەۋ جۇمىستارى جۇرگىزىلۋدە.
قر اشم اوك مەملەكەتتىك ينسپەكتسيا كوميتەتىنىڭ اقپاراتى بويىنشا, بيىل اقتوبە وبلىسىندا ءۇيىرلى شەگىرتكەلەر 70,39 مىڭ گەكتارعا تارالۋى مۇمكىن دەگەن بولجام بار. ال جالپى رەسپۋبليكا بويىنشا زيانكەستەر 640 مىڭ گەكتاردان استام الاڭعا تارالۋى مۇمكىندىگى بولجانۋدا.
«پەستيتسيدتەر مەن حيميالىق وڭدەۋ قىزمەتتەرى بارلىق بولجامدى الاڭعا ساتىپ الىندى. سونىمەن قاتار, 223 مىڭ گەكتارعا جەتەتىن پەستيتسيد قورى بار.
ءۇيىرلى شەگىرتكەلەردى ءتيىمدى وڭدەۋ ءۇشىن پەستيتسيدتەردىڭ ءتۇرلى توپتارىنىڭ پرەپاراتتارى ساتىپ الىندى. بۇل باعىت بويىنشا وبلىس اكىمدىكتەرىمەن بىرلەسە جۇمىس ىستەۋ جۇيەسى ازىرلەندى. قازىرگى ۋاقىتتا وبلىس اكىمدەرىنىڭ ورىنباسارلارى باسقاراتىن جەدەل شتابتار قۇرىلدى. سونداي-اق مونيتورينگ جانە حيميالىق وڭدەۋ جۇمىستارىن ۇيىمداستىرۋ جونىندەگى جۇمىس جوسپارلارى بەكىتىلدى», دەپ قوستى كوميتەتتەن.
مالىمەتكە سۇيەنسەك, ءۇيىرلى شەگىرتكە زيانكەستەرىنىڭ وشاقتارىن انىقتاۋ ءۇشىن 38,4 ملن گەكتار جەر زەرتتەلەدى. بۇل جۇمىستى جۇرگىزۋ ءۇشىن 524 اۆتوكولىك پەن 1230 تەكسەرۋشى تارتىلادى.
«رەسپۋبليكانىڭ تۇركىستان جانە جامبىل وبلىستارىندا ماروككو شەگىرتكەسىنە قارسى وڭدەۋ جۇمىستارى اياقتالدى. ال, اقتوبە وبلىسىندا يتاليالىق پرۋسقا قارسى وڭدەۋ جۇمىستارى جالعاسۋدا.
ءۇيىرلى شەگىرتكەگە قارسى كۇرەس بويىنشا جاعداي قازاقستان رەسپۋبليكاسى اۋىل شارۋاشىلىعى مينيسترلىگىنىڭ تۇراقتى باقىلاۋىندا», دەدى قر اشم اگروونەركاسىپ كەشەنىندەگى مەملەكەتتىك ينسپەكتسيا كوميتەتىنەن.
