ءورت سوندىرۋشىلەر جوعارعى قاباتتاعى پاتەرلەردىڭ بىرىندە ەس-ءتۇسسىز جاتقان ەكى ايەلدى تاۋىپ الدى. ولاردىڭ ءبىرى قايتىس بولدى, ەكىنشىسى اۋىر حالدە.
«25 ماۋسىم كۇنى ساعات 19:22-دە قاراعاندى وبلىسى, جاڭاارقا اۋدانىندا بولعان ءورت تۋرالى حابارلاما كەلىپ ءتۇستى. ءورت ءسوندىرۋ بولىمشەلەرى كەلگەن ساتتە ءۇش قاباتتى تۇرعىن ءۇيدىڭ 1-قاباتىنداعى اۋدانى 60 شارشى مەتر ءۇش بولمەلى پاتەردى وت شارپىعانى انىقتالدى. جانىپ جاتقان پاتەردەن باسپالداق مارشى بويىنشا 4 ادام, ونىڭ ىشىندە 3 بالا قۇتقارىلدى. سونىمەن قاتار, جوعارعى قاباتتاردىڭ پاتەرلەرىن تەكسەرۋ كەزىندە 3-قاباتتاعى پاتەرلەردىڭ بىرىنەن كومىرقىشقىل گازىمەن ۋلانۋ بەلگىلەرى بار ەس-ءتۇسسىز جاتقان ەكى ايەل تابىلدى. زارداپ شەككەندەردىڭ ءبىرى, 1969 جىلى تۋعان ايەل اۋرۋحانادا قايتىس بولدى, 1961 جىلى تۋعان ازاماتشانىڭ جاعدايى اۋىر. زارداپ شەككەن ءۇي تۇرعىنى كورۋ قابىلەتى ناشار مۇگەدەك, ال قايتىس بولعان كەلىنشەك ونىڭ كومەكشىسى بولعان», دەپ حابارلادى قاراعاندى وبلىسى تجد ءباسپاسوز قىزمەتىنەن.
قىزىل جالىن ساعات 20:11-دە اۋىزدىقتالدى. ونىڭ شىعۋ سەبەبى انىقتالۋدا. وقيعا ورنىندا قاراعاندى وبلىسى تجد سىناق زەرتحاناسىنىڭ ماماندارى جۇمىس ىستەۋدە.
