كادرلىق رەزەرۆ ەلدىڭ دامۋىنا كومەكتەسەدى

قازىر نۇر-سۇلتان قالاسى اكىمدىگىندە اپپارات باسشىسىنىڭ ورىنباسارى بولىپ جۇمىس ىستەيتىن نۇرلىبەك جەڭىسبەك ۇلى مەن ەكولوگيا، گەولوگيا جانە تابيعي رەسۋرستار مينيسترلىگىنىڭ كليماتتىق ساياسات جانە جاسىل تەحنولوگيالار دەپارتامەنتى ديرەكتورىنىڭ ورىنباسارى قىزمەتىندەگى زۋلفيا سۇلەيمەنوۆا رەزەرۆ جۇمىسىنا قاتىستى ءوز ويلارىمەن بولىسكەن ەدى.

– نەگىزى، پرەزيدەنتتىڭ كادرلىق رەزەرۆىنە وتكەننەن كەيىن ۆەرتيكالدى ەمەس، پاراللەل پوزيتسياعا اۋىستىم. بۇعان دەيىن ەنەرگەتيكا مينيسترلىگىندە اقپارات جانە ساراپتامالىق جۇيەلەۋ دەپارتامەنتىندە ديرەكتور ورىنباسارى بولىپ قىزمەت ەتتىم.

2020 جىلى اقپاندا نۇر-سۇلتان قالاسى اكىمدىگىنە اپپارات باسشىسىنىڭ ورىنباسارى قىزمەتىنە تاعايىندالدىم. ەكى قىزمەتىمدە دە بىردەي لاۋازىم بولعانىمەن، وسى جۇمىسىمدا مول تاجىريبە جيناپ، تۇيگەنىم كوپ بولدى. بۇعان دەيىن شىمكەنت قالاسىندا، تۇركىستان وبلىسىندا اكىمدىكتەردە جۇمىس ىستەدىم.

پرەزيدەنتتىڭ جاستار كادرلىق رەزەرۆى شىن مانىندە الەۋەتى جوعارى جوبا دەپ بىلەمىن. مەملەكەتتىك باسقارۋ جۇيەسىندە مەريتوكراتيانىڭ بولۋى ماڭىزدى. مەريتوكراتيا بار جەردە ادىلدىك بولادى. ال ادىلدىك كاسىبي مامانداردىڭ، كەمەلدەنگەن ازاماتتاردىڭ مەملەكەتتىك قىزمەتكە قىزىعۋىنا، كەلۋىنە جول اشادى. بۇل كوپ ارىپتەستەرىمىزگە مۇمكىندىك بەردى، – دەيدى نۇرلىبەك جەڭىسبەك ۇلى.

سونىمەن قوسا مامان مەملەكەتتىك باسقارۋ جۇيەسىندەگى كوپ ستەرەوتيپتى بۇزدى دەگەن پىكىردە. نۇرلىبەك جەڭىسبەك ۇلىنىڭ ايتۋىنشا، قازىر تانىس ارقىلى جۇمىسقا تۇرۋ، قىزمەتكە ورنالاسۋ كەزىندە جەرشىلدىك پەن رۋشىلدىق ماڭىزدى دەگەن ەسكى ويلاردىڭ قالىبىن بۇزدى.

– سوندىقتان بۇل جوبا جالعاسىن تابۋ كەرەك دەگەن پىكىردەمىن. الەۋمەتتىك باسپالداق جۇيەلى جۇمىس ىستەسە ادىلەتتى قوعامنىڭ قالىپتاسۋىنا ىقپال ەتەدى. ەكىنشىدەن، مەملەكەتتىك قىزمەتشى يميدجىنە جاڭا لەپ بەردى. بۇرىن ازاماتتار باسقا شارۋانىڭ باسىن شالىپ، ءتۇرلى كاسىپتى كورىپ، ۇلكەن جەتىستىككە جەتە الماي، مەملەكەتتىك قىزمەتكە كەلەتىن. مەملەكەت اي سايىن تۇراقتى جالاقىسىن بەرىپ وتىرادى دەپ ءتۇسىندى. ياعني سوڭعى ايالداما رەتىندە كورەتىندەر كوبەيدى. ال اتالعان جوبا قيسىنسىز پىكىردى جوققا شىعاردى. بۇل جەردە يدەولوگيا ماسەلەسى دە بار، – دەيدى نۇرلىبەك جەڭىسبەك ۇلى.

بۇگىندە مەملەكەتتىك قىزمەتتە ەڭبەك ەتىپ جۇرگەن نۇرلىبەك جەڭىسبەك ۇلى شەشىم قابىلداپ، جاۋاپكەرشىلىك الا الاتىن، بويىندا قۋاتى، ويىندا شۋاعى بار جاستاردىڭ مەملەكەتتىك قىزمەتكە كوپتەپ تارتىلۋى قۇپتارلىق دەپ تۇيىندەدى.

تاعى ءبىر رەزەرۆشى، ەكولوگيا، گەولوگيا جانە تابيعي رەسۋرستار مينيسترلىگىنىڭ كليماتتىق ساياسات جانە جاسىل تەحنولوگيالار دەپارتامەنتى ديرەكتورىنىڭ ورىنباسارى بولىپ قىزمەتكە تۇرعان زۋلفيا سۇلەيمەنوۆا بۇل جوبا تەك قىزمەتتە ءوسۋ ەمەس، ەل دامۋىنا ۇلەس قوسۋعا مۇمكىندىك دەگەن پىكىردە.

– قىزمەتتەگى نەگىزگى ماقساتىم – قازاقستاننىڭ كليماتتىق ساياساتىن جاقسارتۋ. ءبارىمىز ەستىپ، ءبىلىپ جۇرگەندەي، ەكولوگيا ماسەلەلەرى دۇنيە ءجۇزى بويىنشا وزەكتى. بۇل بەيجاي قارايتىن جايت ەمەس. كليمات ماسەلەلەرى ەكونوميكا جانە الەۋمەتپەن تىعىز بايلانىستى. جاقىندا ەۋروپالىق وداق پارنيكتىك گازداردىڭ شىعارىندىلارىنا شەكارالىق سالىق ەنگىزۋدى قاراستىرا باستادى. ەگەر بۇل ساياسات جۇزەگە اسسا، ەكونوميكامىزعا اسەر ەتەدى، ال ول الەۋمەتكە دە وڭ اسەر ەتەتىنى ءسوزسىز. مەنىڭ باستى ماقساتىم – كليمات ماسەلەلەرى بويىنشا تالداۋدى نىعايتۋ، سونىمەن بىرگە جاڭا ءارى دۇرىس ەكولوگيالىق ساياسات قالىپتاستىرۋعا اتسالىسۋ. بىزگە ەڭ باستىسى حالىقتىڭ ءومىر ساپاسىن ارتتىراتىن ساياسات قاجەت، – دەيدى ول.

جالپى، مەملەكەت باسشىسى ايتقانداي، جاستار كادرلىق رەزەرۆىنىڭ نەگىزگى ماقساتى مەملەكەتتىك قىزمەت سالاسىندا ترانزاكتسيالىق ليدەر ەمەس، ترانسفورماتسيالىق ليدەرلەر قالىپتاستىرۋ. زۋلفيا ەندىگى كەزەكتە قالىپتاسىپ جاتقان ترانسفورماتسيانى جۇزەگە اسىرۋعا مۇمكىندىك بەرىلسە دەگەن ويىن دا جەتكىزدى.

– مەملەكەتتىك قىزمەتكە كەلگەلى دە جۇيەنى وڭتايلاندىرۋعا قاتىستى ءبىراز وي قالىپتاستىرىپ ۇلگەردىم. الدا سولاردى جۇزەگە اسىرا الامىن دەگەن ويدامىن، بۇعان دەيىنگى تاجىريبەمدى، ءبىلىمىمدى پايداعا جاراتامىن دەپ سەنەمىن. مەملەكەتتىك قىزمەتتىڭ باستى ماقساتى – ەلىمىزدە ۇستەمدىك ەتەتىن دۇرىس زاڭ مەن ساياسات قالىپتاستىرۋ، ادامدارعا وزدەرىنىڭ مۇمكىندىكتەرىن جۇزەگە اسىرا الاتىن جاعداي جاساۋ. سول تۇرعىدان قاراعاندا، ءوزىمنىڭ وقىعانىمدى، تاجىريبەمدى ءتيىمدى قولدانا الامىن دەگەن نيەتتەمىن، دەيدى جاس مامان.