ون كۇن بويى استانالىقتار مەن قالا قوناقتارىنا تاڭداۋلى تۋىندىلار ۇسىناتىن تەاتر مەرەكەسىن وتكىزۋگە مادەنيەت جانە سپورت مينيسترلىگى مەن نۇر-سۇلتان قالاسى اكىمدىگى قولداۋ كورسەتىپ وتىر.
شىعارماشىلىق كەزدەسۋگە الىستان ات ارىتىپ كەلگەن وزبەك ۇلتتىق اكادەميالىق دراما تەاترى مەن ب.قىدىكەەۆا اتىنداعى قىرعىز مەملەكەتتىك جاستار تەاترى جانە ەلىمىزدىڭ ق.قۋانىشباەۆ اتىنداعى مەملەكەتتىك اكادەميالىق قازاق مۋزىكالىق دراما تەاترى, ع.مۇسىرەپوۆ اتىنداعى قازاق مەملەكەتتىك اكادەميالىق بالالار مەن جاسوسپىرىمدەر تەاترى, م.گوركي اتىنداعى مەملەكەتتىك اكادەميالىق ورىس دراما تەاترى, ۇلتتىق ۇلان ءان-بي ءانسامبلى, نۇر-سۇلتان قالاسى اكىمدىگىنىڭ جاستار تەاترى, Astana Musical مەملەكەتتىك تەاترى جانە ءا.مامبەتوۆ اتىنداعى مەملەكەتتىك دراما جانە كومەديا تەاترلارى اتسالىسىپ, مادەني شارانىڭ كورىگىن قىزدىرادى.
جالپى شىعارماشىلىق كەزدەسۋدىڭ ماقساتى – قازاق تەاتر ونەرىن دامىتۋ, كورشىلەس ەلدەردىڭ تەاترلارىمەن اراداعى بايلانىستى نىعايتۋ جانە ەلوردانى مادەنيەت ورتالىعى رەتىندە تانىتىپ, كورەرمەندەردى تەاتر ونەرىندەگى تاڭداۋلى قويىلىمدارمەن تانىستىرۋدى كوزدەيدى. تەاتر ۇجىمدارىنىڭ ونەرىن باعالايتىن ساراپشىلار القاسىنىڭ قۇرامىندا قازاقستاننىڭ ەڭبەك سىڭىرگەن قايراتكەرى, ونەرتانۋ كانديداتى ەركىن جۋاسبەك, حالىقارالىق تەاتر سىنشىلارى بىرلەستىگىنىڭ پرەزيدەنتى, انار ەركەباي, تەاترتانۋشى, ونەرتانۋ كانديداتى باقىت نۇرپەيىس, تەاترتانۋشى ايزات قادىراليەۆا, سىنشى گۇلنار ابىكەەۆا, تەاترتانۋشى ميراس ءابىل بار.
ايتۋلى ءىس-شارانىڭ الدىندا پرەزيدەنت جانىنداعى ورتالىق كوممۋنيكاتسيالار قىزمەتىندە ءباسپاسوز ءماسليحاتى ءوتىپ, وندا مادەنيەت جانە سپورت ۆيتسە-ءمينيسترى نۇرعيسا داۋەشوۆ بىرەگەي ونەر وردالارىنىڭ كەزدەسۋى ەل تاۋەلسىزدىگىنىڭ مەرەيلى تويى مەن قالا كۇنى قارساڭىندا تاجىريبە الماسۋ ماقساتىندا ۇيىمداستىرىلعاندىعىن اتاپ ءوتتى. سونىمەن قاتار ول ازاتتىق العاننان بەرگى وتاندىق تەاتر ونەرىنىڭ دامۋىنا قىسقاشا شولۋ جاسادى.
− قازىر ەلىمىزدە 65 تەاتر بار, ونىڭ 53-ءى مەملەكەتتىك بولىپ سانالادى. تاۋەلسىزدىك جىلدارى 22 مەملەكەتتىك تەاتر اشىلىپ, نۇر-سۇلتان, ورال, قاراعاندى, وسكەمەن, قوستاناي, شىمكەنت, تالدىقورعان, تۇركى- ستان قالاسىندا 9 تەاترعا جاڭا عيمارات سالىندى. بىلتىر ەلوردادا مۋزىكالىق جاس كورەرمەندەر تەاترى اشىلسا, قاليبەك قۋانىشباەۆ اتىنداعى مەملەكەتتىك اكادەميالىق مۋزىكالىق دراما تەاترى, بيىل تۇركىستان شاھارىنداعى تۇركىستان مۋزىكالىق دراما تەاترى جاڭا عيماراتقا كوشتى. مادەنيەت ۇيىمدارىنىڭ كاسىبي دەڭگەيىن كوتەرۋ ماقساتىندا ەگەمەندىك العاننان بەرى 9 تەاترعا ۇكىمەت قاۋلىسىمەن «اكادەميالىق» مارتەبە بەرىلدى. سونداي-اق تاريحتا العاش پرەزيدەنت جارلىعىمەن م.اۋەزوۆ اتىنداعى قازاق مەملەكەتتىك اكادەميالىق دراما تەاترى, اباي اتىنداعى قازاق مەملەكەتتىك اكادەميالىق وپەرا جانە بالەت تەاترى, م.لەرمونتوۆ اتىنداعى مەملەكەتتىك اكادەميالىق ورىس دراما تەاترى «ۇلتتىق» مارتەبە اتاعىن الدى, دەدى.
نۇرعيسا داۋەشوۆ قازىرگى پاندەميا كەزىندە تەاترلاردىڭ حالىقتىڭ ەڭسەسىن كوتەرىپ, رۋحاني قولداۋعا زور ۇلەس قوسقانىن باسا ايتىپ, وسى سالادا جۇزەگە اسقان جوبالارعا توقتالدى.
− بۇگىندە تەاتر سالاسىن دامىتۋ باعىتىندا اتقارىلىپ جاتقان جۇمىس كوپ. مادەنيەت جانە سپورت مينيسترلىگىنىڭ ۇيىمداستىرۋىمەن رەسپۋبليكالىق, حالىقارالىق دەڭگەيدە تەاتر فەستيۆالدارى ءجيى وتەدى. اسىرەسە «رۋحاني جاڭعىرۋ» باعدارلاماسىنىڭ «جاھانداعى زاماناۋي قازاقستاندىق مادەنيەت» جوباسى اياسىندا ەلىمىزدىڭ جەتەكشى تەاترلارى الەمدىك دەڭگەيدەگى ساحنالاردا ونەر كورسەتىپ جاتقانىن ايتۋعا بولادى. مادەنيەت سالاسىنداعى جۇيەلى ىنتىماقتاستىق پەن سەرىكتەستىكتى جاڭارتۋ ماقساتىندا بىلتىر رەسپۋبليكالىق سالالىق مادەنيەت ۇيىمدارىنىڭ جانىنان ۇيىمداستىرۋ ورتالىقتارى قۇرىلدى.
سونداي-اق م.اۋەزوۆ اتىنداعى قازاق ۇلتتىق اكادەميالىق دراما تەاترى جانىنان مەملەكەتتىك تەاترلار مەن تەاتر ۇيىمدارىنىڭ گاسترول قىزمەتىن ۇيلەستىرەتىن رەسپۋبليكالىق ورتالىق جۇمىسىن باستادى. ءبىلىم بەرۋگە ارنالعان ونلاين پلاتفورمالارعا ارناپ تەاتر ونەرىمەن تانىستىراتىن بەينەساباقتار دايىندالدى, − دەي كەلىپ, مەملەكەت باسشىسىنىڭ بىلتىرعى جولداۋىندا ايتىلعان بالالارعا شىعارماشىلىق پەن قولونەر نەگىزدەرىن ۇيرەتۋ تۋرالى تاپسىرماسىن ورىنداۋ ماقساتىندا وتكەن جىلعى قازاننان باستاپ «ۇلاعاتتى ۇرپاق» اتتى ءبىلىم بەرۋگە ارنالعان ونلاين پلاتفورما ىسكە قوسىلىپ, اتالعان جوبا اياسىندا وقۋشىلار تەاتر, مۋزىكا, كينەماتوگرافيا, بەينەلەۋ ونەرى جانە «كيەلى قازاقستان» سەكىلدى 5 باعىت بويىنشا قازاق جانە ورىس تىلىندە ءبىلىم بەرۋ بەينەساباقتارىنا ەركىن قاتىسۋعا مۇمكىندىك العانىن جەتكىزدى. قازىرگى كۇنى وعان تىركەلگەن ءجاسوسپىرىم قاتارى 11 مىڭنان اسىپ, بەينەساباقتاردى 5 ميلليون ادام قاراعان.
