«1 شىلدەدەن باستاپ ەلىمىزدە اكىمشىلىك پروتسەدۋرالىق-پروتسەسسۋالدىق كودەكس كۇشىنە ەنەتىنى بەلگىلى. وسىعان وراي, وبلىستىق سوتتاردا اكىمشىلىك ىستەر جونىندەگى مامانداندىرىلعان سوت القالارى قۇرىلدى. ال, وبلىس ورتالىقتارى مەن قاسكەلەن, سەمەي, جەزقازعان جانە ەكىباستۇز قالالارىندا 21 مامانداندىرىلعان اكىمشىلىك سوت جاڭادان قۇرىلدى. قازىرگى اكىمشىلىك سوتتار اكىمشىلىك قۇقىق بۇزۋشىلىق جونىندەگى مامانداندىرىلعان سوتتار بولىپ وزگەرتىلەدى. ال جاڭادان قۇرىلعان اكىمشىلىك سوتتاردا مەملەكەتتىك ورگاندار مەن ازاماتتار اراسىنداعى داۋلار قاراستىرىلادى», دەپ حابارلادى قر جوعارى سوت كەڭەسىنىڭ اپپاراتى.
جوعارى سوت كەڭەسى جاڭا سوتتاردى كادرلارمەن قامتاماسىز ەتۋگە باعىتتالعان كونكۋرستى اياقتاپ ۇلگەردى. اتاپ ايتقاندا, وبلىستىق سوتتاعى القالاردىڭ 17 توراعاسى, اۋداندىق سوتتاردىڭ 21 توراعاسى جانە 78 سۋدياسى قىزمەتىنە كانديداتتار ىرىكتەلدى. «بۇل لاۋازىمدارعا قىزىعۋشىلىق وتە جوعارى بولدى. مىسالى, وبلىستىق سوتتاعى القا توراعاسىنىڭ 17 بوس لاۋازىمىنا بارلىعى 91 ادام قۇجات تاپسىرعان. اۋداندىق سوت توراعاسىنىڭ 21 بوس لاۋازىمى كونكۋرسىنا 89 ۇمىتكەر قاتىستى. اۋداندىق سوت سۋدياسىنىڭ 78 بوس لاۋازىمىنا – 279 ادام. ونىڭ ىشىندە, 129 ادام نۇر-سۇلتان مەن الماتى قالالارىندا قۇرىلعان جاڭا مامانداندىرىلعان اكىمشىلىك سوتتارعا ورنالاسۋعا نيەت بىلدىرگەن. ال قىزىلوردا وبلىسىنداعى جاڭا مامانداندىرىلعان اۋدانارالىق سوتقا بار جوعى 16 ادام قۇجات تاپسىردى», دەيدى جوعارى سوت.
كەيبىر لاۋازىمدارعا جاريالانعان كونكۋرس, ۇمىتكەرلەر بولا تۇرا, جۇزەگە اسقان جوق دەپ تانىلدى. سەبەبى لايىقتى تالاپكەر بولماعان. كونكۋرستىق ىرىكتەۋ ناتيجەسىندە جوعارى سوت كەڭەسى كەلەسى لاۋازىمدارعا ۇمىتكەرلەردى ىرىكتەدى: وبلىستىق سوتتاعى القا توراعاسى لاۋازىمىنا - 16 ۇمىتكەر; اۋداندىق سوت توراعاسى لاۋازىمىنا - 18 ۇمىتكەر; اۋداندىق سوت سۋدياسى لاۋازىمىنا - 60 ۇمىتكەر. ىرىكتەلىپ الىنعان 94 تۇلعانىڭ 48-ءزى ەر ادامدار, 46-سى ايەلدەر. تالاپكەرلەردىڭ 11-ءى تۇڭعىش رەت سۋديا لاۋازىمىنا ۇسىنىلىپ وتىر.
اتالعان كونكۋرس شەڭبەرىندە 27 ادام جوعارى تۇرعان لاۋازىمدارعا ۇسىنىلدى. بوس سۋديا لاۋازىمدارىنا ۇسىنىلعان تۇلعالاردىڭ تولىق ءتىزىمى, جانە كونكۋرسقا قاتىستى باسقا دا اقپارات جوعارى سوت كەڭەسىنىڭ رەسمي سايتىندا جاريالاناتىن بولادى.
