ءبىلىم • 19 ماۋسىم، 2021

جوعارى ءبىلىم بەرۋدىڭ بىرىڭعاي ورتالىق ازيا كەڭىستىگى قۇرىلادى

30 رەت كورسەتىلدى

ورتالىق ازيا ەلدەرىندە جوعارى ءبىلىم بەرۋدىڭ بىرىڭعاي ورتالىق ازيا كەڭىستىگى قۇرىلادى. مۇنداي شەشىم تۇركىستانداعى ورتالىق ازيا ەلدەرى ءبىلىم مينيسترلەرىنىڭ قاتىسۋىمەن وتكەن بۇگىنگى فورۋمنىڭ قورىتىندىسى بويىنشا قابىلداندى، دەپ حابارلايدى Egemen.kz.

وفلاين جانە ونلاين فورماتتا وتكەن ءىس-شاراعا قازاقستان، وزبەكستان، تۇركىمەنستان جانە قىرعىزستان ءبىلىم مينيسترلىكتەرىنىڭ باسشىلارى، سونداي-اق ورتالىق ازيا ەلدەرىندەگى ءبىلىم مينيسترلىكتەرىنىڭ وكىلدەرى، ەۋروپا كەڭەسىنىڭ حالىقارالىق ۇيىمدارى، ەۋروپالىق كوميسسيا، بولون پروتسەسى باقىلاۋ توبىنىڭ وكىلدەرى، ەرازمۋس+ جانە ورتالىق ازيا ەلدەرىنىڭ جوعارى وقۋ ورىندارىنىڭ رەكتورلارى قاتىستى.

قازاقستاننىڭ ءبىلىم جانە عىلىم ءمينيسترى اسحات ايماعامبەتوۆ ورتالىق ازيا كەڭىستىگىن قۇرۋ تۋرالى ۇسىنىسىن ءبىلدىرىپ، شەتەلدىك ارىپتەستەر اسحات ايماعامبەتوۆتىڭ باستاماسىنا قولداۋ ءبىلدىردى. فورۋم قورىتىندىسى بويىنشا تۇركىستان دەكلاراتسياسى قابىلداندى.

وسى قۇجاتقا سايكەس، ەندى ورتالىق ازيا مەملەكەتتەرى وڭىرلىك ىنتىماقتاستىقتى كەڭەيتىپ، بۇكىل ورتالىق ازيا جوعارى وقۋ ورىندارىنىڭ عىلىمي، زياتكەرلىك جانە شىعارماشىلىق الەۋەتىن بىرىكتىرەتىن بولادى.

سونداي-اق تاراپتار ءبىلىم الۋشىلارمەن الماسۋ ءۇشىن ءبىلىم بەرۋ باعدارلامالارىنىڭ، بىرلەسكەن عىلىمي جوبالاردىڭ سانىن ۇلعايتۋعا جانە وا ەلدەرىنىڭ كوشباسشى ستۋدەنتتەرى اراسىندا ءوزارا بايلانىس ورناتۋعا، تاجىريبە الماسۋ جانە جۇمىس باعىتتارىن تالقىلاۋ ءۇشىن وا ەلدەرىنىڭ جوعارى وقۋ ورىندارى رەكتورلارىنىڭ فورۋمدارىن وتكىزۋگە كەلىستى. 

ورتالىق ازيا كەڭىستىگىنە قاتىسۋشى ەلدەردىڭ ىنتىماقتاستىعى بولون پروتسەسى قاعيداتى بويىنشا ۇيىمداستىرىلاتىن بولادى.  سونداي-اق جوعارى ءبىلىم سالاسىنداعى ورتالىق ازيا كەڭىستىگى جانىنان وا ەلدەرىنىڭ ءبىلىم مينيسترلىكتەرى اراسىنداعى جۇمىستى ۇيلەستىرۋ، ورتالىق ازياداعى جوعارى ءبىلىمنىڭ تارتىمدىلىعىن ارتتىرۋ جانە وا مەملەكەتتەرى اراسىنداعى باسەكەگە قابىلەتتىلىكتى كۇشەيتۋ ءۇشىن حاتشىلىق قۇرىلاتىن بولادى.

«جوعارى ءبىلىم بەرۋدىڭ بىرىڭعاي ورتالىق ازيا كەڭىستىگىن قۇرۋ بۇگىنگى تاڭدا وبەكتيۆتى قاجەتتىلىك بولىپ وتىر. جىل سايىن تانىلاتىن ءبىلىم تۋرالى قۇجاتتاردىڭ جالپى سانىنىڭ 70%-عا جۋىعى ورتالىق ازيا جوعارى وقۋ ورىندارىنىڭ قۇجاتتارى. بۇگىندە ورتالىق ازيا ەلدەرىنىڭ ازاماتتارى بولىپ تابىلاتىن 20 مىڭعا جۋىق ستۋدەنت قازاقستاندىق جوعارى وقۋ ورىندارىندا ءبىلىم الىپ جاتىر جانە بۇل كورسەتكىش جىل سايىن ءوسىپ كەلەدى. وسىعان بايلانىستى، جوعارى ءبىلىمنىڭ بىرىڭعاي كەڭىستىگى شەڭبەرىندە بۇگىنگى تاڭدا جوعارى ءبىلىمنىڭ ەۋروپالىق كەڭىستىگى ەلدەرىندەگى سياقتى بىلىكتىلىكتى تانۋدىڭ جەڭىلدەتىلگەن نەمەسە اۆتوماتتى ءراسىمى ماسەلەسىن قاراستىرۋعا بولادى»، دەپ اتاپ ءوتتى ءبىلىم جانە عىلىم ءمينيسترى اسحات ايماعامبەتوۆ.

سوڭعى جاڭالىقتار

جەڭىس داۋىسى

تاريح • كەشە

ەرتەڭىن ويلاعان ەكپە الادى

كوروناۆيرۋس • كەشە

ۇقساس جاڭالىقتار