وقيعا • 18 ماۋسىم، 2021

قىزىلوردادا مەديتسينا ۇزدىكتەرىنە ميلليون تەڭگە تابىستالدى

47 رەت كورسەتىلدى

بۇگىن وبلىس اكىمى گۇلشارا ابدىقالىقوۆا مەديتسينا قىزمەتكەرلەرى كۇنىنە ارنالعان سالتاناتتى شاراعا قاتىسىپ، دارىگەرلەرگە قۇرمەت كورسەتتى، دەپ حابارلايدى Egemen.kz.

ايماق باسشىسى كۇردەلى كەزەڭدە ۇلكەن جاۋاپكەرشىلىك تانىتىپ، شىنايى جاناشىرلىقپەن كۇندىز-ءتۇنى ەڭبەك ەتكەن ءاربىر اق حالاتتى ابزال جانداردىڭ ەڭبەگىن ەرەكشە اتاپ ءوتىپ، كاسىبي ماماندارعا يگى تىلەگىن ارنادى.

«اۋىرعان جاندى ەمدەۋ، ونىڭ ءومىرىن ساقتاۋ سىزدەردىڭ وتان، ادامزات الدىنداعى قاسيەتتى بورىشتارىڭىز. سوڭعى جىلدارى الەمدىك ىندەت بىزگە مەديتسينا ماماندارىنىڭ قاجەتتىلىگىن بۇرىنعىدان دا ارتىق سەزىندىرىپ، مارتەبەسىن بيىكتەتە ءتۇستى.

سىزدەردىڭ بۇل ەڭبەكتەرىڭىز شىن مانىندە بارلىق قۇرمەتكە لايىق! بۇل ورايدا، الەمدەگى ەڭ ىزگى، ەڭ قاستەرلى ماماندىق يەلەرىنىڭ قىزمەتى مەملەكەت تاراپىنان جوعارى باعالانىپ كەلەدى. ارينە، ەڭ ۇلكەن باعا – حالىقتىڭ شىنايى كوڭىلى ەكەنى ءسوزسىز. سىندارلى كەزەڭدە دەرتىنە شيپا ىزدەگەن ءاربىر جەرلەسىمىز بۇل رەتتە سىزدەرگە ءدان ريزا دەپ بىلەمىن»، دەدى گۇلشارا ابدىقالىقوۆا.

ىندەتتى اۋىزدىقتاۋدا الدىڭعى شەپتە جۇرگەن مەديتسينا ماماندارىنا مەملەكەت تاراپانىنان قولداۋ جوعارى دەڭگەيدە جۇرۋدە. وتكەن جىلى وبلىس بويىنشا ۆيرۋسپەن كۇرەسكەن 3 مىڭعا جۋىق مەديتسينا قىزمەتكەرىنە 3 ملرد تەڭگە كولەمىندە ۇستەماقى تولەندى. ال، جيىرمادان استام مەديتسينا قىزمەتكەرى جوعارى مەملەكەتتىك ناگرادامەن، 107 قوعام بەلسەندىسى «حالىق العىسى» مەدالىمەن ماراپاتتالدى.

كاسىبي مەرەكەدە وبلىس اكىمى قاجىرلى ەڭبەك ەتكەن، قىسىلتاياڭ شاقتا كاسىبيلىكتىڭ جوعارى ۇلگىسىن كورسەتكەن بىرقاتار مەديتسينا ماماندارىن ماراپاتتادى. قر دەنساۋلىق ساقتاۋ مينيسترلىگىنىڭ «ەڭبەك ارداگەرى» مەدالىمەن وبلىستىق فتيزيوپۋلمونولوگيا ورتالىعىنىڭ فتيزياتر دارىگەرى تورەحان بەكتەگەن، كوپبەيىندى وبلىستىق اۋرۋحانانىڭ حيرۋرگ دارىگەرى مامىتبەك كارىباەۆ، وبلىستىق كەڭەس بەرۋ دياگنوستيكالىق ورتالىعىنىڭ نەفرولوگ دارىگەرى پاتماش قۇرماناەۆا، «سەنىم» ەمحاناسىنىڭ اكۋشەر-گينەكولوگ دارىگەرى زويا دايروۆا، «ارال» دارىگەرلىك ەمحاناسىنىڭ مەيىرگەرى يباگۇل بالشىمباەۆا لايىق دەپ تانىلدى. ال، «رەسپۋبليكالىق ەلەكتروندى دەنساۋلىق ورتالىعى» قىزىلوردا وبلىسى بويىنشا فيليال ديرەكتورى ساۋلە نالىباەۆا ۇلتتىق مەديتسينالىق اسسوتسياتسياسىنىڭ «التىن دارىگەر» توسبەلگىسىنىڭ يەگەرى اتاندى. سونىمەن بىرگە 7 ازامات وبلىس اكىمىنىڭ العىس حاتىمەن، 13 مامان «دەنساۋلىق ساقتاۋ ءىسىنىڭ ۇزدىگى» توسبەلگىسىمەن، 11 دارىگەر «دەنساۋلىق ساقتاۋ ىسىنە قوسقان ۇلەسى ءۇشىن» توسبەلگىسىمەن ماراپاتتالادى.

سالتاناتتى جيىندا ء«بىزدىڭ سۇيىكتى دارىگەر - 2021» كونكۋرسىنىڭ جەڭىمپازدارى دا قۇرمەت تورىنەن كورىندى. «ۇزدىك دەنساۋلىق مەنەدجەرى» نوميناتسياسىمەن وبلىستىق پسيحيكالىق دەنساۋلىق ورتالىعىنىڭ باس دارىگەرى ءادىلباي مەدەتباەۆ ماراپاتتالسا، «ۇزدىك اۋرۋحانا دارىگەرى» نوميناتسياسىن ارال اۋدانارالىق اۋرۋحاناسنىڭ دارىگەرى گۇلجانات ءتولەپوۆا جەڭىپ الدى. قوس ماراپات يەسىنە 1 ميلليون تەڭگەنىڭ اقشالاي سەرتيفيكاتى تابىستالدى. ال، كوپبەيىندى قالالىق اۋرۋحاناسىنىڭ مەيىربيكەسى راۋشان تومانوۆا «ۇزدىك اۋرۋحانا مەيىرگەرى» نوميناتسياسىنا لايىق دەپ تانىلىپ، 700 مىڭ تەڭگە قارجىلاي سىياقىنى يەلەندى.

ەڭبەگى ەلەنگەن مەديتسينا ماماندارىنا شىنايى العىسىن جەتكىزگەن وبلىس اكىمى گۇلشارا ابدىقالىقوۆا ىندەتتىڭ بەتى ءالى تولىق قايتپاعانىن قاپەرگە سالىپ، قالىپتى تىرشىلىككە ورالۋ ءۇشىن ەكپە ەگۋدىڭ ماڭىزدى ەكەنىن ايتىپ، دارىگەرلەرگە سەنىم ءبىلدىردى.

سوڭعى جاڭالىقتار

ۇقساس جاڭالىقتار