ۇكىمەت • 18 ماۋسىم، 2021

بالامالى ەنەرگەتيكانى دامىتۋ ماسەلەلەرى تالقىلاندى

12 رەت كورسەتىلدى

قر پرەمەر-ءمينيسترى اسقار ءماميننىڭ توراعالىعىمەن وتكەن ينۆەستيتسيالىق احۋالدى جاقسارتۋ جونىندەگى كەڭەس وتىرىسىندا جاڭارتىلاتىن ەنەرگيا كوزدەرىن دامىتۋ جانە قر تومەن كومىرتەكتى ەكونوميكاعا كوشۋى ماسەلەلەرى قارالدى، دەپ حابارلايدى Egemen.kz.

«جاسىل ەكونوميكانى» دامىتۋ جانە جاڭارتىلاتىن ەنەرگيا كوزدەرىنە شەتەلدىك ينۆەستيتسيالاردى تارتۋ پەرسپەكتيۆالارى تۋرالى 26-شى كليماتتىق ءسامميتتىڭ وڭىرلىك ەلشىسى دەۆيد مورگان، امەريكالىق ساۋدا پالاتاسىنىڭ قر-داعى اتقارۋشى ديرەكتورى دوريس برەدبيۋري، قازاقستاندا اككرەديتتەلگەن اقش ەلشىسى ۋيليام موزەر، نيدەرلاندى ەلشىسى اندرە كارستەنس، كانادا ەلشىسى نيكوليا برۋسسو، حالىقارالىق ەنەرگەتيكا اگەنتتىگى باس ديرەكتورىنىڭ ورىنباسارى مەري ۋورليك، قر-داعى ەقدب وكىلدىگىنىڭ ديرەكتورى اگريس پرەيمانيس، سونداي-اق GE، Chevron، Morgan Lewis جانە ت. ب. كومپانيالاردىڭ وكىلدەرى بايانداما جاسادى.

قابىلدانعان شارالار تۋرالى ەكولوگيا، گەولوگيا جانە تابيعي رەسۋرستار ءمينيسترى ماعزۇم مىرزاعاليەۆ پەن ەنەرگەتيكا ءبىرىنشى ۆيتسە-ءمينيسترى مۇرات جۇرەبەكوۆ اقپارات بەردى. قازاقستان ەكونوميكاسىن دەكاربونيزاتسيالاۋ جانە ەنەرگيا تيىمدىلىگىن ارتتىرۋ ماسەلەلەرى، پاريج كەلىسىمى بويىنشا مىندەتتەمەلەردى ورىنداۋ تەتىكتەرى، كليماتتىڭ وزگەرۋىنە بەيىمدەلۋ شارالارى، سونداي-اق جاڭارتىلاتىن ەنەرگيا كوزدەرى سالاسىنداعى ينۆەستيتسيالىق جوبالاردى ىسكە اسىرۋدىڭ پراكتيكالىق اسپەكتىلەرى تالقىلاندى.

«2020 جىلعى جەلتوقساندا بۇۇ اياسىندا ۇيىمداستىرىلعان كليماتتىق امبيتسيالار جونىندەگى سامميتتە قر پرەزيدەنتى قاسىم-جومارت توقاەۆ قازاقستاننىڭ 2060 جىلعا قاراي كومىرتەكتى بەيتاراپتىققا قول جەتكىزۋ ماقساتى تۋرالى جاريالادى. ءبىز ەنەرگيا ءوندىرىسىنىڭ جالپى كولەمىندە جاڭارتىلاتىن ەنەرگيا كوزدەرىنىڭ ۇلەسىن ارتتىرۋ بويىنشا بارىنشا كۇش-جىگەر جۇمسايمىز. ماسەلەن، 2020 جىلعى جاعداي بويىنشا بۇل كورسەتكىش 3%-دى قۇرادى، 2022 جىلى ونى 6%-عا دەيىن ەكى ەسەگە ارتتىرۋ جوسپارلانۋدا. 2030 جىلعا قاراي قازاقستاننىڭ ەنەرگەتيكاسىنداعى جاسىل ەنەرگيانىڭ ۇلەسى 15%-عا دەيىن جەتكىزىلەدى»، دەدى ا. مامين.

ۇكىمەت باسشىسى 2020 جىلى قر-نىڭ «جاسىل ەكونوميكاعا» كوشۋى جونىندەگى تۇجىرىمدامانى ىسكە اسىرۋدىڭ 2021-2030 جىلدارعا ارنالعان جاڭارتىلعان ءىس-شارالار جوسپارى قابىلدانعانىن اتاپ ءوتتى. جوسپار ەو سەرىكتەستەرىمەن تىعىز ىنتىماقتاستىق ورناتا وتىرىپ ازىرلەندى، وندا ەل الدىندا تۇرعان اسا ەلەۋلى ەكولوگيالىق سىن-تەگەۋرىندەردى جويۋ جونىندەگى شارالار قاراستىرىلعان. جوسپارلانعان ءىس-شارالاردى ورىنداۋ الەمنىڭ اسا دامىعان 30 ەكونوميكاسىنىڭ تىزىمىنە كىرۋ جونىندەگى ماقساتقا قول جەتكىزگەن كەزدە قازاقستاننىڭ «جاسىل» ءوسىم بويىنشا ۇزاق مەرزىمدى مىندەتتەمەلەرىنىڭ ساقتالۋىن قامتاماسىز ەتۋگە مۇمكىندىك بەرەدى. پرەمەر-مينيستر قازاقستاننىڭ بالامالى ەنەرگەتيكانى دامىتۋ ءۇشىن ينۆەستيتسيالىق ورتانى جاقسارتۋ جونىندە شارالار قابىلداعانىن اتاپ ءوتتى.

ء«بىز جاڭارتىلاتىن ەنەرگيا كوزدەرىن وندىرۋشىلەردى قولداۋ جانە نارىقتىڭ ينۆەستيتسيالىق تارتىمدىلىعىن جاقسارتۋ بويىنشا بىرقاتار كەشەندى شارا قابىلدادىق. ماسەلەن، سۇرانىس قۇرىلىمىن وندىرۋشىلەر ءۇشىن بارىنشا بولجامدى ءارى ەلەۋلى ەتۋ ءۇشىن جاڭارتىلاتىن ەنەرگيا كوزدەرى بويىنشا اۋكتسيوندار ەنگىزىلدى. سونىڭ ناتيجەسىندە سوڭعى 6 جىلدا جەك-ءتىڭ بەلگىلەنگەن قۋاتى شامامەن 10 ەسەگە – 2014 جىلعى 180 مۆت-تان 2020 جىلى 1650 مۆت-قا دەيىن ۇلعايدى»، دەدى ا. مامين.

تۇراقتى دامۋ مىندەتتەرىن ىسكە اسىرۋ ماقساتىندا قازاقستاندا جاڭا ەكولوگيالىق كودەكس قابىلداندى، ول قر-دا جاڭارتىلاتىن ەنەرگيا كوزدەرىنىڭ وزىق تەحنولوگيالارىن جەدەل ەنگىزۋگە ىقپال ەتەتىن بولادى. قازاقستاننىڭ 50 ءىرى كاسىپورنى ءوزىنىڭ وندىرىستىك پروتسەسىندە ەڭ وزىق قولجەتىمدى تەحنولوگيالاردى پايدالانۋدى كەڭەيتۋگە مىندەتتى بولادى.

سوڭعى جاڭالىقتار

ۇقساس جاڭالىقتار