جاستاردىڭ ونەر ورداسىن وبلىستىق دراما تەاترىنىڭ ارتىستەرى گۇلنۇر قايىرليەۆا مەن ءامىرجان نۇرلان ۇلى قۇرعان ەدى. ولار ترۋپپا مۇشەلەرىن ستۋدەنتتەر مەن جوعارى سىنىپ وقۋشىلارىنىڭ اراسىنان تاڭدادى. جاس بۋىننىڭ تاراپىنان ونەرگە بەت بۇرۋعا نيەت بىلدىرۋشىلەر از بولمادى.
– كاستينگ كەزىندە اكتەرلىك ونەرگە بەيىم جاستاردىڭ كوپ ەكەنىن بايقادىق. العاشقى سپەكتاكلدى جايىق جاعالاۋىندا, قالالىق ساياباقتاردا قويدىق. بۇگىنگى جاستاردىڭ كوڭىلىنەن شىعاتىن, اۋديتورياسىنا لايىق تاقىرىپتاردى رەپەرتۋارعا ەنگىزۋگە تىرىستىق, – دەيدى تەاتر جەتەكشىسى ءا.نۇرلان ۇلى.
جاقىندا جاستاردىڭ ونەر ۇجىمى كەرچ قالاسىندا تۇراقتى وتەتىن «بوسپورسكيە اگونى» حالىقارالىق تەاتر فەستيۆالىنە اتتانعان ەدى. بۇل فەستيۆالگە اتىراۋلىق جاستار اعىلشىن جازۋشىسى بەرنارد شوۋدىڭ «تسەزار جانە كلەوپاترا» پەساسىنىڭ جەلىسىمەن «كلەوپاترا» دراماسىنىڭ پرەمەراسىن ۇسىندى. باس رەجيسسەرى – مۇقانعالي تومانوۆ.
– بۇل – كارانتين كەزىندەگى العاشقى گاسترول. سپەكتاكل پرەمەراسى وزگە ەلدىڭ ساحناسىندا العاش رەت ۇسىنىلدى, – دەيدى تەاتر ديرەكتورىنىڭ ورىنباسارى نۇرگۇل قۇمارقىزى.
ونىڭ ايتۋىنشا, كەرچتە «بوسپورسكيە اگونى» فەستيۆالى 1999 جىلدان بەرى وتكىزىلىپ كەلەدى. بۇل فەستيۆالدە ەجەلگى ونەردى قازىرگى ەۋروپالىق مادەنيەتتىڭ نەگىزى رەتىندە تانىمال ەتۋ كوزدەلگەن. اتىراۋلىق اكتەرلەر اتالعان فەستيۆالگە 2017 جىلى «مەدەيا» سپەكتاكلىمەن قاتىسقان ەدى. سول كەزدە تەاتر ۇجىمى «ەجەلگى تاقىرىپتى زاماناۋي وقۋ» اتالىمىنا يە بولدى.
ال بيىل ءححىىى رەت وتكەن حالىقارالىق فەستيۆالدە 11 تەاتر باق سىنادى. سولاردىڭ اراسىنان اتىراۋلىق جاستار تەاترى ەكى جۇلدەنى يەلەندى. فەستيۆالدىڭ باس جۇلدەسى – «ۇزدىك سپەكتاكل» اتالىمى مۇنايلى ءوڭىردىڭ جاس ورەندەرى ۇسىنعان «كلەوپاترا» قويىلىمىنا بەرىلدى. سونداي-اق كلەوپاترانى سومداعان اتىراۋلىق جاس اكتەر عايني كۋكاتوۆا «ەڭ ۇزدىك ايەل ءرولى» اتالىمىن يەلەندى.
ونەرگە دەگەن قىزىعۋشىلىق جاستار تەاترىنىڭ ارتىستەرىن وسىنداي تابىسقا كەنەلتتى.
