باسقوسۋعا اقش, تۇركيا, قىتاي, يتاليا, نيدەرلاند, فرانتسيا, مىسىر, بەلارۋس, فينليانديا, گرۋزيا, ۋكراينا, كۋبا, سلوۆاكيا, ۆەتنام, يندونەزيا, ءباا, بولگاريا, يزرايل سەكىلدى ەلدەردىڭ ەلشىلەرى مەن ەلشىلەردىڭ ورىنباسارلارى قاتىسىپ, قازاقستاننىڭ سوت جۇيەسىندەگى رەفورمالاردىڭ ناتيجەلەرى تۋرالى مالىمەتتەرمەن تانىستى.
بريفينگتە ءسوز سويلەگەن جوعارعى سوتتىڭ توراعاسى جاقىپ اسانوۆ ەلىمىزدە قولعا الىنعان سوت رەفورماسى, سوتتاردىڭ تاۋەلسىزدىگى ماسەلەسى, سىبايلاس جەمقورلىققا قارسى شارالار, سوت تورەلىگىنىڭ ساپاسى تۋرالى باياندادى.
ءىس-شارا بارىسىندا قازاقستاننىڭ الەمدىك رەيتينگتەردە «سۋديالىق» كورسەتكىشتەر بويىنشا ءوز ورنىن جاقسارتقانى ايتىلدى. وتكەن جىلعى تاۋەلسىز زەرتتەۋلەرگە سايكەس, دۇنيەجۇزىلىك بانكتىڭ جوباسى بويىنشا حالىقتىڭ 53 پايىزى سوتتارعا سەنەتىنىن بىلدىرسە, سوتتاردىڭ قىزمەتىن پايدالانۋشىلاردىڭ 67 پايىزى ولاردىڭ جۇمىسىن وڭ باعالاعان.
كەزدەسۋدە پالەستينا ەلشىسى مۋنتاسەر ابۋ زەيد, گەرمانيا ەلشىسى تيلو يوحاننەس كليننەر قازاقستانداعى ينۆەستورلارمەن اراداعى داۋلاردى شەشۋ جولدارى تۋرالى ويلارىن ورتاعا سالسا, «استانا» حالىقارالىق قارجى ورتالىعى سوتىنىڭ تىركەۋشىسى كريستوفەر حولت سوڭعى 4 جىلدىڭ ىشىندە 400-دەن استام ءىستىڭ ءساتتى شەشىلگەنىن اتاپ ءوتتى. ول بۇل ناتيجەنى «سوت پەن ورتالىق ءۇشىن بۇرىن-سوڭدى بولماعان كورسەتكىش» دەپ سانايتىنىن دا اشىق مالىمدەدى.
ال قازاقستاننىڭ سوت جۇيەسىن بۇرىنعى كەڭەستىك ەلدەردىڭ ىشىندەگى ەڭ ۇزدىكتەردىڭ ءبىرى دەپ سانايتىن «بەيكەر جانە ماكەنزي» قازاقستاندىق كەڭسەسىنىڭ ديرەكتورى كۋرتيس ماستەرس رەفورمالاردىڭ ىشىندە تسيفرلاندىرۋدىڭ دامۋ دەڭگەيىن ەرەكشە اتاپ ءوتتى. اۋعانستاننىڭ ۋاقىتشا سەنىمدى وكىلى ازيزۋللا وماردىڭ سوت شەشىمدەرىن ورىنداۋدىڭ جانە سەنىمدى قارىم-قاتىناستى قالپىنا كەلتىرۋدىڭ ماڭىزدىلىعىنا توقتالا كەلىپ, مەدياتورلار جۇمىس ىستەيتىن عيماراتتىڭ سۋديالاردىڭ كابينەتتەرىنە قاراعاندا زاماناۋي ەكەنىن دە تىلگە تيەك ەتتى.
جيىن بارىسىندا ديپلوماتتاردىڭ ءتۇرلى وزەكتى سۇراقتارىنا جان-جاقتى جاۋاپ بەرگەن جوعارعى سوت توراعاسى «ەڭ باستى ماسەلە – پروبلەمالاردى قالاي جەڭۋگە بولاتىنىن ناقتى كورە ءبىلۋ, كاسىبي كوماندا, پرەزيدەنتتىڭ ەرىك-جىگەرى, الەمدىك ستاندارتتار بويىنشا جۇمىس ىستەۋ» دەپ اتاپ ءوتتى.
العاش رەت ۇيىمداستىرىلىپ وتىرعان بريفينگ سوڭىندا ديپلوماتتار سوت رەفورماسىنا قاتىستى ساۋالداماعا جاۋاپ بەرىپ, وسىنداي باسقوسۋدى وتكىزۋدى داستۇرگە اينالدىرۋدى ۇسىندى.
