قازاقستان • 16 ماۋسىم، 2021

قازاقستاندىق عالىمدار تاعى ءبىر ۆاكتسينانى كلينيكالىق سىناقتان وتكىزە باستادى

203 رەت كورسەتىلدى

تاراز قالاسىنداعى كوپبەيىندى قالالىق اۋرۋحانادا 18-50 جاس ارالىعىنداعى ەرىكتىلەردىڭ قاتىسۋىمەن QazCoVac-P سۋببىرلىكتى ۆاكتسيناسىنىڭ كلينيكالىق سىناعى باستالدى. بۇل تۋرالى بيولوگيالىق قاۋىپسىزدىك پروبلەمالارىنىڭ عىلىمي-زەرتتەۋ ينستيتۋتىنىڭ رەسمي سايتى جازدى، دەپ حابارلايدى Egemen.kz.

«دەنساۋلىق ساقتاۋ مينيسترلىگى SARS-CoV-2 ۆيرۋسىنىڭ جاساندى سينتەزدەلگەن اقۋىزدارى نەگىزىندە جاسالعان QazCoVac-P سۋببىرلىكتى ۆاكتسيناسىن I جانە II فازادا كلينيكالىق زەرتتەۋ جۇرگىزۋگە رۇقسات بەردى. بۇل – بقپعزي-دىڭ دەنساۋلىق ساقتاۋ مينيسترلىگىنىڭ مامانداندىرىلعان كاسىپورنىندا كلينيكاعا دەيىنگى سىناقتان ءساتتى وتكەن جانە ءوزىنىڭ قاۋىپسىزدىگىن كورسەتكەن ەكىنشى ۆاكتسيناسى»، دەپ جازىلعان رەسمي اقپاراتتا.

سايتتىڭ جازۋىنشا، ۆاكتسينا جاساۋعا قاتىسقان ماماندار مولەكۋلالىق بيولوگيانىڭ زاماناۋي تەحنولوگيالارىن پايدالانا وتىرىپ، SARS-CoV-2 ۆيرۋسىنىڭ RBD جانە N اقۋىزدارى شىعاراتىن يممۋندىق جۇيەگە تانىس باكتەريالاردىڭ شتامدارىن العان.

ۆاكتسينانىڭ ادام اعزاسىنا تۇسكەندە كەرى اسەرى بولماس ءۇشىن الىنعان اقۋىزدار كۇردەلى تاسىلدەرمەن تازارتىلىپ، ساپا باقىلاۋىنان وتكەن كورىنەدى.

ياعني، ۆاكتسينا قۇرامىندا باكتەريالىق شتامم بولعانىمەن، ۆيرۋستىڭ ءوزى جوق.

«ۆاكتسينا ەگىلگەن زەرتحانا جانۋارلارىنىڭ بۇلشىقەتىنە ەكىنشى دوزانى ەنگىزگەننەن كەيىن يممۋنيتەتتى 14 تاۋلىككە ىنتالاندىرادى. سۋببىرلىكتى ۆاكتسينالار دا يناكتيۆتى ۆاكتسينا سياقتى، قۇرامىندا ءتىرى پاتوگەندى كومپونەنت جوق جانە وتە قاۋىپسىز. ۆاكتسينانىڭ قۇرامىنداعى اديۋۆانت ۆاكتسيناتسيالانۋشىنىڭ اعزاسىنا تەرىس اسەر ەتپەي، يممۋندىق جاۋاپتى ءتيىمدى ىنتالاندىرادى. بۇل ۆاكتسينانىڭ قۇرامىنا تەك قاجەتتى انتيگەندەر كىرەدى جانە ۆيرۋستىڭ باسقا كومپونەنتتەرى كىرمەيدى. وسىنىڭ ارقاسنىدا جاناما اسەرلەر از كەزدەسەدى. مىسالى، تۇماۋعا، ۆ گەپاتيتى مەن پنەۆموكوكك، مەنينگوكوكك جانە گەموفيلدى ينفەكتسيالارعا قارسى وسى تيپتەگى ۆاكتسينالار ەگىلەدى»، دەپ جازادى ينستيتۋت سايتى.

سوڭعى جاڭالىقتار

ەرتەڭ ۇكىمەت وتىرىسى وتەدى

ۇكىمەت • بۇگىن، 15:00

ۇقساس جاڭالىقتار