قازاقستان • 15 ماۋسىم، 2021

«يحسان – تاربيە نەگىزى» كىتابى جارىق كوردى

72 رەت كورسەتىلدى

بۇگىن نۇر-سۇلتان قالاسىنداعى قمدب عيماراتىندا باس ءمۇفتي ناۋرىزباي قاجى تاعان ۇلىنىڭ جەتەكشىلىگىمەن جارىققا شىققان «يحسان – تاربيە نەگىزى» كىتابىنىڭ تانىستىرىلىمى ءوتتى، دەپ حابارلايدى Egemen.kz.

ءىس-شاراعا قمدب توراعاسى، باس ءمۇفتي ناۋرىزباي قاجى تاعان ۇلى، اقپارات جانە قوعامدىق دامۋ ۆيتسە-ءمينيسترى سەرىك ەگىزباەۆ، مەملەكەت جانە قوعام قايراتكەرلەرى – مىرزاتاي جولداسبەكوۆ، ورالباي ابدىكارىم ۇلى، ءادىل احمەتوۆ، باقىتجان ەرتاەۆ، عاريفوللا ەسىم، سەنات دەپۋتاتى نۇرتورە ءجۇسىپ، ءماجىلىس دەپۋتاتى باقىتبەك سماعۇل، حالىقارالىق تۇركى اكادەمياسىنىڭ پرەزيدەنتى دارحان قىدىرالى، قازاقستان جازۋشىلار وداعىنىڭ توراعاسى ۇلىقبەك ەسداۋلەت جانە ءدىني باسقارمانىڭ ءبولىم باسشىلارى مەن وبلىس يمامدارى قاتىستى.

يگى ءىس-شارا قاسيەتتى قۇران وقۋمەن باستالىپ، باس ءمۇفتي جيىنعا قاتىسۋشىلارعا ىزگى تىلەگى مەن العىسىن ءبىلدىردى. ناۋرىزباي قاجى تاعان ۇلى يحساننىڭ باقىتىن يماننان ىزدەگەن جۇرتىمىزدىڭ جۇرەگىنە جاقىن ءىلىم ەكەنىن ايتا كەلىپ: «يحسان ءىلىمى اۋەلى پەندەنىڭ اللاعا دەگەن بويسۇنۋىنان باستالادى. ادام بالاسىنىڭ اللاعا دەگەن يحسانى: الدىمەن يمان كەلتىرۋ، بۇيىرعان امالدارىن ورىنداۋ، بارلىق تىيىم سالعان نارسەلەردەن اۋلاق بولۋ، ىزگى امالداردى ارتتىرۋ. قۇراندا: «نەگىزىندە اللا ادىلدىكتى، يگىلىكتى (يحساندى) جانە اعايىنعا قارايلاسۋدى بۇيىرادى. سونداي-اق ارسىزدىقتان، جاماندىقتان جانە زورلىق-زومبىلىقتان تىيادى. تۇسىنەرسىڭدەر دەپ سەندەرگە (وسىلايشا) ناسيحات بەرەدى»، – دەپ باياندالعان («ناحل» سۇرەسى، 90-ايات). وسى ايات ەلىمىزدەگى مۇسىلمان قاۋىمىنىڭ جۇرەگىنە جەتىپ، عيبرات الار دەگەن ۇمىتتەمىز» دەدى.

قمدب توراعاسى ءوز سوزىندە جاڭا كىتاپتىڭ جاڭاشىلدىعىنا توقتالىپ، وسى كىتاپتى شىعارۋعا ىجداھاتتىلىقپەن ۇلەس قوسقان ازاماتتارعا العىس ايتتى.

«بۇل كىتاپتان ءاربىر ادامعا اسا قاجەت ىقىلاس، نيەت، ىجداھات، تۇراقتىلىق، تياناقتىلىق، اللاعا، قۇرانعا، پايعامبارعا دەگەن ماحاببات، ناپسىمەن كۇرەسۋ جولدارى، جۇرەك دەرتىنەن ارىلۋ، رۋح تازالىعى، ءتىل تازالىعى سىندى كوركەم مىنەزدى قالىپتاستىراتىن سيپاتتاردى تۇلابويىمىزعا ءسىڭىرۋ قاجەتتىگىن تۇسىنەمىز. سونىمەن قاتار، اتا-انا، بالا-شاعا، كورشى-قولاڭ، اعايىن-تۋىس، اينالاداعى ادامداردىڭ اقىسى جايلى قۇندى ناسيحاتتار جازىلىپ، جامان ادەتتەردەن ارىلۋدىڭ جولدارى كورسەتىلدى» دەدى ناۋرىزباي قاجى تاعان ۇلى.

جيىننىڭ قۇرمەتتى قوناقتارى دا قۇندى ەڭبەكتىڭ جارىق كورۋىمەن قۇتتىقتاپ، ءدىني باسقارمانىڭ يگى باستامالارىنا جىلى لەبىز ءبىلدىردى.

ايتا كەتەيىك، «يحسان – تاربيە نەگىزى» كىتابىندا «جاراتۋشى اللاعا يحسان»، «تۇلعالىق يحسان»، «يحسان جانە قوعام» سىندى تاراۋلار قامتىلىپ، يسلام عۇلامالارىنىڭ يحسان ءىلىمى جايلى وي-تولعامدارى بەرىلگەن.

 

سوڭعى جاڭالىقتار

«ساتەمىر حان» كىم؟

رۋحانيات • بۇگىن، 23:30

«ەسىل وزەن»

ونەر • بۇگىن، 23:22

تسەنزور دەگەن بولعان...

قوعام • بۇگىن، 23:12

تاسادا قالعان تۇلعا

تاريح • بۇگىن، 22:55

ساحنا سۋرەتكەرى

ونەر • بۇگىن، 22:30

ەرتەڭ ۇكىمەت وتىرىسى وتەدى

ۇكىمەت • بۇگىن، 15:00

ۇقساس جاڭالىقتار