ۇلتتىق ۇلاننىڭ «باتىس» وڭىرلىك قولباسشىلىعى ءباسپاسوز قىزمەتىنىڭ اقپاراتىنا قاراعاندا, 13 ماۋسىمدا كەشكى ساعات 22:30-دا اتىراۋ قالالىق جەدەل باسقارۋ ورتالىعىنا جوعالعان بالالاردىڭ انالارى حابارلاسقان. ولار كورشىلەرىمەن ويناۋعا شىققان بالالارىنىڭ ۇيىنە ورالماعانىن ايتىپتى.
«جوعالعان بالالار تۋرالى اقپارات قۇقىق قورعاۋ ورگاندارىنىڭ بارلىق جەكە قۇرامىنا بەرىلدى. پاترۋل باستىعى نازار ءىزباسوۆ پەن قۇرامىندا پاترۋلدىك قاتارداعى ساربازدار ازامات يسمايلوۆ پەن بەكبولات بەيسەنباەۆ بار اسكەري نارياد «جەڭىس» ساياباعىنىڭ جانىندا جۇرگەن ءتورت بالانى بايقاعان. ولار جوعالعان بالالاردىڭ سيپاتتاماسىنا ۇقساس بولعان. ال, ازامات, ازات, راۋان جانە دانيل ەسىمدى بالالار ويناپ ءجۇرىپ, ۇيىنەن الىستاعانىن اڭعارماعانىن ايتقان», دەپ حابارلادى قولباسشىلىقتىڭ ءباسپاسوز قىزمەتى.
ۇلتتىق ۇلاننىڭ ساربازدارى جەدەل باسقارۋ ورتالىعى ارقىلى بالالاردى اتا-انالارىمەن تابىستىردى. قوعامدىق ءتارتىپتى ساقتاۋ جونىندەگى اسكەري مىندەتىن ورىنداۋ كەزىندە قىراعىلىق كورسەتكەن ساربازدارعا №5546 اسكەري ءبولىم كومانديرىنىڭ العىسى جاريالاندى.
