سونىمەن ەلىمىزدىڭ مەملەكەتتىك باس سانيتار دارىگەرىنىڭ قاۋلىلارىمەن ەگىلگەندەرگە بەرىلەتىن, كورسەتىلەتىن ارتىقشىلىقتار ۇلعايىپ كەلەدى. تسيفرلىق دامۋ, يننوۆاتسيالار جانە اەروعارىش ونەركاسىپ ءمينيسترى باعدات مۋسين وسى اپتانىڭ ىشىندە COVID-19 ەكپەسىنىڭ تولىق كۋرسىنان وتكەن قازاقستان ازاماتتارى قوعامدىق ورىنداردىڭ دەرلىگىنە ەركىن كىرىپ-شىعۋعا مۇمكىندىك بەرەتىن Ashyq قولدانباسىندا «جاسىل» احۋالعا يە بولادى دەگەندى حابارلادى. جاسىل احۋالدىڭ مەرزىمى جارتى جىلعا جارامدى, الايدا, بۇل احۋالدىڭ مەرزىمى ءالى دە رەتتەلەتىن بولادى.
ەكپە العاندار باسقالارعا قاراعاندا قانداي مۇمكىندىكتەرگە يە؟ COVID-19-عا قارسى ەكپەنىڭ تولىق كۋرسىن قابىلداعاندى راستايتىن قۇجات ۇسىنىلعان جاعدايدا قازاقستان رەسپۋبليكاسىنا اۋە جولدارى ارقىلى شەت ەلدەن كەلگەن تۇلعالارعا (دەنە قىزۋى قالىپتى جاعدايدا بولۋ شارتىمەن) پتر ادىسىمەن COVID-19 تەستىسىنەن ءوتۋ تالابى قويىلمايدى. سول سياقتى ەلدەگى تەمىر جول, تەڭىز, وزەن ترانسپورتى مەن اۆتوكولىك ارقىلى مەملەكەتتىك شەكارانى قيىپ وتەتىن تۇلعالارعا (دەنە قىزۋى قالىپتى جاعدايدا بولۋ شارتىمەن) پتر ادىسىمەن COVID-19 تەستىسىنەن ءوتۋ تالابى قويىلمايدى.
«بۇدان بولەك, COVID-19-عا قارسى ەكپەنىڭ تولىق كۋرسىن قابىلداعاندى راستايتىن قۇجات ۇسىنىلسا سەرىكتەستىك بوسانۋلارعا قاتىسقاندا, ناۋقاستاردى, ونىڭ ىشىندە جۇكتىلەردى, جاس بوسانعانداردى جانە بالالاردى ستاتسيونارعا (سونىڭ ىشىندە كۇندىزگى ستاتسيونارعا) جوسپارلى تۇردە اۋرۋحاناعا جاتقىزعاندا پتر انىقتاماسى تالاپ ەتىلمەيدى. ەكپە العاندارعا سابيلەر جانە بالالار ۇيلەرىنە بارعاندا, الەۋەتتى اتا-انالاردىڭ ارىدەن ۇل اسىراپ الۋ/قىز اسىراپ الۋ, قامقورشى تاعايىنداۋ, قورعانشىلىق ءۇشىن جەتىم بالالارمەن كەزدەسۋ ءۇشىن تەست تاپسىرۋدىڭ قاجەتى جوق. الەۋمەتتىك-مەديتسينالىق نىساندارعا قايتا تۇسكەن ناۋقاستارعا (قارتتار ۇيلەرى, مۇگەدەكتەر جانە باسقالارى, ناۋقاس بالانىڭ كۇتىمىمەن مەديتسينالىق ۇيىمدارعا جاتاتىن تۇلعالارعا, ۇزاق جانە قىسقا مەرزىمدى كەزدەسۋگە رۇقسات الۋ ءۇشىن پەنيتەنتسيارلىق (قىلمىستىق اتقارۋ جۇيەسى) مەكەمەلەرمەن قامتىلعان تۇلعالاردىڭ تۋىستارىنا دا شەكتەۋلەر قويىلماعان. بۇل تەك بۇگىنگى كۇنگە, كەلەشەك كۇندەردە وزگەرۋى مۇمكىن», دەيدى الماتى قالاسى №11 ەمحاناسىنىڭ دارىگەر-ەپيدەميولوگى قارلىعاش ورازباەۆا.
COVID-19 ەكپەسىمەن ەگىلمەگەندەر مەن COVID-19 ىندەتىنە شالدىقپاعاندار سوڭعى 6 اي ىشىندە قاشىقتان جۇمىس ىستەۋگە كوشەدى. بۇلار – ونەركاسىپ مەكەمەلەرى مەن ءوندىرىس نىساندارىنىڭ جۇمىسشىلارى, ونىڭ ىشىندە جۇمىسشىنىڭ وندىرىستىك نىساندا بولۋىن قاجەت ەتپەيتىن جۇمىستار, ۆاحتالىق ادىسپەن جۇمىس ىستەيتىندەر. سونىمەن قاتار بۇل تالاپتار شيپاجاي, دەمالىس ورىندارى, قوناق ءۇي, مەيرامحانا, مادەنيەت, مەملەكەتتىك ورگاندار, بيزنەس ورتالىقتار, مەكتەپكە دەيىنگى بالالار مەكەمەلەرىنىڭ قىزمەتكەرلەرى, ياعني قاشىقتان مىندەتتەرىن اتقارۋ مۇمكىن ەمەس جۇمىسشىلاردان باسقاسىنا قاتىستى.
«قان تازارتۋ ەسەبىندەگى ناۋقاستار الدىن الۋ ماقساتىمەن ايىنا 1 رەت پتر ادىسىمەن COVID-19 تەستىلەۋىنەن ءوتۋى ءتيىس. ەگەر, مۇنداي ناۋقاس ەكپەنىڭ تولىق كۋرسىن قابىلداعان بولسا, وندا اي سايىنعى پتر ادىسىمەن COVID-19 تەستىسىن تاپسىرۋدان بوساتىلادى. ستۋدەنتتىك جاتاقحاناعا قاتىستى تاعى ءبىر نورما. شەكتەۋ شارالارىن ەنگىزۋ كەزەڭىندە ستۋدەنتتىك جاتاقحانالاردا بولمەگە قونىستانۋدى 50%-عا دەيىن تولتىرۋعا بولادى, بولمەگە 2 ادام عانا تۇرۋىنا رۇقسات. الايدا ستۋدەنتتەردىڭ 80%-ى ەكپەنىڭ تولىق كۋرسىنان وتەتىن بولسا, وندا بولمەنى 100%-عا دەيىن تولتىرۋعا بولادى, تيىسىنشە, ورىن سانى كوبەيەدى», دەدى ق.قۋاندىققىزى.
