قازاقستان • 12 ماۋسىم، 2021

قورعانىس ءمينيسترى مەرزىمدى اسكەري قىزمەتتەگى ساربازدارمەن كەزدەستى

54 رەت كورسەتىلدى

قورعانىس ۆەدومستۆوسىنىڭ باسشىسى شىعىس قازاقستان وبلىسىنا جۇمىس ساپارىمەن بارىپ، سەمەي مەن جاڭعىزتوبە اسكەرلەرىنىڭ تىنىس-تىرشىلىگىنە قاتىستى نەگىزگى ماسەلەلەردى قارادى، دەپ حابارلايدى Egemen.kz قر قورعانىس مينيسترلىگىنىڭ ءباسپاسوز قىزمەتىنە سىلتەمە جاساپ.

سەمەي گارنيزونىندا گەنەرال-لەيتەنانت نۇرلان ەرمەكباەۆ مەحانيكالاندىرىلعان جانە ارتيللەريا بريگادالارىنىڭ وقۋ-ماتەريالدىق بازاسىمەن تانىستى.

قورعانىس مينيسترىنە جاۋىنگەرلىك باسقارۋ سىنىپتارىن، ارتيللەريا اتىسىن باسقارۋ جانە اتىس ترەناجەرلارىن، سونىمەن قاتار بولىمدەر اۋماعىنداعى جابدىقتالعان اتىس ءتيرىن كورسەتتى. كومانديرلەردىڭ بايانداماسىنا سايكەس ولاردى قولدانۋ جاۋىنگەرلىك دايارلىق ساباقتارىنىڭ قارقىنى مەن ساپاسىن ارتتىرۋعا ىقپال ەتەدى. جاقىندا ءبولىم اۋماعىندا جابدىقتالعان اتىس قارۋىنا ارنالعان پوليگونداعى اشىق تيردە ساباقتار تەكسەرىلدى.

سوڭعى ۋاقىتتا بارلىق وڭىرلىك قولباسشىلىقتاردا جانە قارۋلى كۇشتەر تۇرلەرىندە ونەرتاپقىشتىق جۇمىستار بەلسەندى دامۋدا. سەمەي گارنيزونى اسكەري قىزمەتشىلەرى جاساعان كوپتەگەن ازىرلەمەلەرىمەن تانىسقان مينيستر لاۋازىمدى تۇلعالاردىڭ وقۋ-ماتەريالدىق بازانى جەتىلدىرۋ جونىندەگى باستاماسىن اتاپ ءوتتى. نۇرلان ەرمەكباەۆ بارلىق اسكەري بولىمدەردە وسىنداي جۇمىستى ۇيىمداستىرۋ قاجەتتىگىن ايتىپ، قارۋلى كۇشتەردە ۇزدىك ونەرتاپقىشتار كونكۋرسىن ۇيىمداستىرۋدى تاپسىردى.

ساپار بارىسىندا وق-دارىلەردى ساقتاۋ قويمالارىنىڭ ديۆەرسياعا جانە ورتكە قارسى قاۋىپسىزدىگىن قامتاماسىز ەتۋ جاعدايى تەكسەرىلدى. قورعانىس ۆەدومستۆوسىنىڭ باسشىسى قويمالار مەن ساقتاۋ بازالارى جانىنداعى تىيىم سالىنعان اۋدانداردىڭ شەكارالارىن ناقتىلاۋ جۇمىستارىن جەدەلدەتۋدى تاپسىردى. بۇدان وزگە، مينيستر اسكەري نىساندارعا جاقىن ورنالاسقان شارۋاشىلىق سۋبەكتىلەرىمەن جۇمىس جۇرگىزۋگە ءتيىستى جەرگىلىكتى اتقارۋشى ورگاندارمەن ءوزارا تىعىز ءىس-قيمىل ۇيىمداستىرۋدى ەسكەرتتى.

قارۋلى كۇشتەردە ازاماتتىق ينفراقۇرىلىم مەن تۇرعىندار ءۇشىن اسكەري وبەكتىلەردىڭ قاۋىپسىزدىگىن قامتاماسىز ەتۋدە جۇيەلى جۇمىس جۇرگىزىلۋدە. قورعانىس مينيسترلىگىنىڭ باستاماسىمەن 2020 جىلى زاڭعا قاجەتتى وزگەرىستەر ازىرلەنىپ، ەنگىزىلگەن. تىيىم سالىنعان ايماقتار مەن اۋدانداردى ناقتىلاۋدى ەسەپتەۋ ادىستەمەسى قابىلداندى.

قازىرگى كەزدە جەرگىلىكتى اتقارۋشى ورگاندارمەن بىرلەسىپ تىيىم سالىنعان ايماقتاردى اپاتتى جاعدايدان جانە زاڭسىز قۇرىلىستاردان بوساتۋ جۇمىستارى جۇرگىزىلۋدە.

وسى ورايدا «جول كارتاسى» باعدارلاماسى ازىرلەنىپ، ىسكە اسىرىلۋدا. وق-دارىلەردىڭ جەكەلەگەن تۇرلەرى ەلدى مەكەندەردەن الىس قويمالارعا كوشىرىلىپ، ساقتاۋ وبەكتىلەرىن جابدىقتاۋ مەن  جوندەۋ جۇرگىزىلۋدە.

بۇدان وزگە، العاش رەت قورعانىس ۆەدومستۆوسى اسكەري تەحنيكالارعا كەشەندى تۇگەندەۋ جۇرگىزىپ، ونىڭ جاعدايىنا باعا بەردى. پايدالانۋ مەرزىمى وتكەن جانە پايدالانىلمايتىن اسكەري م ۇلىك ءارى قاراي جويۋ نەمەسە كادەگە جاراتۋ ءۇشىن ۋاكىلەتتى ورگاننىڭ ۆەدومستۆولىق (يندۋستريا جانە ينفراقۇرىلىمدىق دامۋ مينيسترلىگىنىڭ) ۇيىمدارىنا بەرىلەدى.

مەحانيكالاندىرىلعان بريگادانىڭ جاۋىنگەرلىك دايارلىق بارىسى دەربەس تەكسەرىلدى. قازىرگى ۋاقىتتا ماماندىق بويىنشا وقۋ جۇرگىزىلۋدە. ونىڭ اياسىندا بارلىق اسكەري قىزمەتشىلەر وزدەرىنە بەكىتىلگەن تەحنيكا مەن قارۋ-جاراقتى، اتقاراتىن لاۋازىمى بويىنشا مىندەتتەردى ورىنداۋ كەزىندەگى ءىس-قيمىل ءتارتىبىن زەردەلەيدى. مينيستر ساباقتاردىڭ ساپاسىنا جانە جاۋىنگەرلىك وقۋ-جاتتىعۋ ناتيجەلەرىنىڭ ناقتى باعالانۋىنا نازار اۋداردى.

قورعانىس ۆەدومستۆوسىنىڭ باسشىسى سونداي-اق، شىعىس-قازاقستان وبلىسىنداعى جەرگىلىكتى باسقارۋ ورگاندارىنىڭ اسكەرگە شاقىرۋ ناۋقانىن ۇيىمداستىرۋىمەن تانىستى.

اسكەري بولىمدەردى ارالاۋ بارىسىندا قورعانىس ءمينيسترى 2021 جىلدىڭ كوكتەمىندە مەرزىمدى اسكەري قىزمەتكە شاقىرىلعان اسكەري قىزمەتشىلەرىمەن اڭگىمەلەستى. جاس جاۋىنگەرلەر اسكەري قىزمەتتەن العان العاشقى اسەرلەرىمەن ءبولىستى. اسىرەسە، جاۋىنگەرلىك وقۋ-جاتتىعۋ، اسكەري ءومىردىڭ قاعيدالارى، تاماقتانۋ ساپاسى، بوس ۋاقىت پەن دەمالىستى ۇيىمداستىرۋ تۋرالى ايتتى. گەنەرال-لەيتەنانت نۇرلان ەرمەكباەۆ ساربازداردى قىزىقتىرعان سۇراقتارعا، ونىڭ ىشىندە كەلىسىمشارت بويىنشا اسكەري قىزمەتتى جالعاستىرۋ مەن اسكەري وقۋ ورىندارىنا ءتۇسۋ مۇمكىندىكتەرى جونىندە اناعۇرلىم كوپ كوتەرىلگەن تاقىرىپتارعا جاۋاپ بەردى.

سوڭعى جاڭالىقتار

دوللار قايتا قىمباتتاي باستادى

ەكونوميكا • بۇگىن، 11:47

ۇقساس جاڭالىقتار