پرەزيدەنت • 12 ماۋسىم، 2021

ق. توقاەۆ: پرەزيدەنتتىك كادر رەزەرۆىندە بولۋ – جاستار ءۇشىن تاپتىرماس مۇمكىندىك

72 رەت كورسەتىلدى

ەلوردادا پرەزيدەنتتىك جاستار كادرلىق رەزەرۆى فورۋمى باستالدى. قر پرەزيدەنتىنىڭ كومەكشىسى ەرلان قارين قاسىم-جومارت توقاەۆتىڭ قۇتتىقتاۋ حاتىن وقىپ بەردى، دەپ حابارلايدى Egemen.kz.

«قۇرمەتتى دوستار! بارشاڭىزدى پرەزيدەنتتىك جاستار كادرلىق رەزەرۆى فورۋمىنىڭ اشىلۋىمەن قۇتتىقتايمىن. بۇل – جۇزدەن جۇيرىك، مىڭنان تۇلپار شىققان ۇزدىكتەردىڭ باسقوسۋى. مەن جاس ۇرپاقتىڭ ەلدىك مۇددەگە بەرىك، مەملەكەتشىل تۇلعا بولىپ وسۋىنە باسا ءمان بەرەمىن. ءبىلىمدى دە بىلىكتى، بەلسەندى ءارى وتانشىل ورەندەرگە جول اشۋ – ماڭىزدى مىندەتتەردىڭ ءبىرى. ءبىز ولاردىڭ جاۋاپتى قىزمەت اتقارىپ، شىڭدالا تۇسۋىنە تولىق جاعداي جاسايمىز»، دەلىنگەن پرەزيدەنت قۇتتىقتاۋىندا.

پرەزيدەنت مەملەكەتتىك باسقارۋ ىسىندەگى ساباقتاستىقتى ساقتاي وتىرىپ، باسشىلاردىڭ جاڭا شوعىرى قالىپتاستىرىلاتىنىن، سول ءۇشىن ارنايى قۇرىلعان كوميسسيا كونكۋرس جاريالاپ، اڭداۋلى 300 ادامدى ىرىكتەپ العانىن ەسكە سالدى.

«مەن بايقاۋ جەڭىمپازدارىمەن بىلتىر قاڭتار ايىندا كەزدەستىم. الداعى مىندەتتەر تۋرالى ويىمدى ورتاعا سالىپ، باعىت-باعدار بەردىم. سودان بەرى كوپشىلىگىڭىز ءتۇرلى لاۋازىمعا تاعايىندالدىڭىزدار. بيىل ارالارىڭىزدان ماجىلىسكە ەكى دەپۋتات سايلاندى. سونىمەن بىرگە، ەكى ازامات ۇلتتىق قوعامدىق سەنىم كەڭەسىنە مۇشە بولدى. وڭىرلەرگە بارىپ ەڭبەك ەتىپ جۇرگەن قىز-جىگىتتەردى دە بىلەمىن. جاس مامانداردىڭ ەلمەن ەتەنە جۇمىس ىستەۋى – قۇپتارلىق قادام. سەبەبى بۇل – ناعىز ءومىر مەكتەبى»، دەيدى مەملەكەت باسشىسى.

ق. توقاەۆ جاستاردىڭ جان-جاقتى ىزدەنىپ، اۋقىمدى باستامالار مەن ناقتى جوبالار ۇسىنعانىن اتاپ ءوتتى.

«مۇنىڭ ءبارى جاس وركەنىڭ الەۋەتى قانشالىقتى زور ەكەنىن كورسەتەدى. پرەزيدەنتتىك كادر رەزەرۆىندە بولۋ – تالاپتى جاستار ءۇشىن تاپتىرماس مۇمكىندىك ەكەنى انىق. الايدا ونى بيلىككە جەتۋدىڭ ەمەس، حالىققا قىزمەت ەتۋدىڭ توتە جولى دەپ ءبىلۋ كەرەك. شىن مانىندە ەڭ ۇلكەن مارتەبە دە، ابىروي دا وسىندا. بيىل قاستەرلى تاۋەلسىزدىگىمىزگە 30 جىل تولادى. سىزدەر – ەركىن ەلدە تۋىپ-وسكەن رۋحى ازات، ساناسى اشىق ازاماتسىزدار. قازاقستاندى ودان ءارى وركەندەرۋ – وزدەرىڭىزگە جۇكتەلەتىن ۇلكەن جاۋاپكەرشىلىك. وسى ورايدا وسكەلەڭ ۇرپاق ەل ءۇمىتىن اقتايدى دەپ سەنەمىن. بارشاڭىزعا مىقتى دەنساۋلىق، باق-بەرەكە تىلەيمىن. فورۋمنىڭ جۇمىسى تابىستى بولسىن»، دەيدى قاسىم-جومارت توقاەۆ.

سوڭعى جاڭالىقتار

اقتوبەدە قوقىس پوليگونى ورتەندى

ايماقتار • بۇگىن، 19:58

تۋريستكە دە ءتارتىپ بار

ايماقتار • بۇگىن، 18:06

دوللار قايتا قىمباتتاي باستادى

ەكونوميكا • بۇگىن، 11:47

ۇقساس جاڭالىقتار